ROMA 12 - Kitta' Passitallikang Bau KAREBA BAJI'

Passidakka nutoje' injo 12:1-8

¹ Injomo saba'na, urang siana', rikabajikanna Allataala nakke appainga' mange ri kau, solanna mupassidakkaangi kalemmu assimpole passidakka nuattallasa, nutangkasa na nulangai Allataala: Injomo sambajang toje'mu.

² Akolalo a'jari assimpole lino inni, mingka appinrako ripappinrana akkala pikkirammu, jari akkulle mupassisa'lakang anteeang a'ra'na Allataala: Antee nubaji', nulangai Allataala na nusangka'.

³ Assituru' barakka' nuripassareang injo mae ri nakke, nakke appau mange risikuanna tau ritangnga-tangngamu: Akolalo pikkiri sikonjo passala nula'bi langkasa rinugele injo laambang naha-nahammu, mingka paralluko appikkiri appaantee jua kamua, jari akkulle mukahasai kalemmu assituru' ukkurang katappakang, nulapassareang injo Allataala mange ri kau ngase'.

⁴ Saba' assimpole rise're batangkale, ditte lohei bageang, mingka gele iangase'na bageang injo assimpole jama-jamaanna,

⁵ appakonjo todo'i ditte, manna injo lohe, mingka se'reki intu batangkale lalang ri Almase; jari ditte ngase' intu a'jari se'reki bageang mange ri tau maraeng.

⁶ Appakonjomu ditte nguppa barakka', assimaraengi assituru' barakka' nulapassareang injo mae ri ditte: Ampa barakka' injo laanjanjang rinulaa'jari injo sallo' baji'mu narigeokangi assituru' katappakanta.

⁷ Ampa barakka' laanjampangi, baji'mu ampa anjampangiki; ampa barakka' injo langajara, baji'mu ampa ngajaraki;

⁸ ampa barakka' injo laappiu'rangi, baji'mu ampa appiu'rangiki. Inai rie' anunna lalapaa'dahu-dahuang, parallui lageokang lalang ri ati baji'; a'jari ponggaha parallui lageokang lalang rikadettokang; inai laappappijanjangang pangamaseang, injo parallui lageokang lalang rikate'neang pa'mai'.

Pappainga' laattallasa lalang ripangamaseang 12:9-21

⁹ Parallui pangamaseang injo gele bura-bura jua! Kadereilalo sipa' daa injo na geokangi nubaji' inni.

¹⁰ Paralluko assikamaseang assimpole urang siana' na assikarioloiko sipakatau.

¹¹ Andalalo lamma kadettokammu, pakabakka'i sumanga'na nyahamu na jampangii Karaeng.

¹² Sunggulaloko lalang ripattajalliang, sabbarako lalang rikamarasaiang, na sannangko lalang ripangera dowaang!

¹³ Assareko sokongang lananggong kakuranganna sikuanna tau tangkasa na parri-parrilalo kalemmu latulusu assare pamminsamboang!

¹⁴ Barakkakilalo tau lapa'ri-pa'risi injoko, barakkakilaloi na ako attadea!

¹⁵ Te'nelaloko surangang tau te'ne injo, apparauko surangang tau apparau injo!

¹⁶ Paralluko a'julu akkala pikkirang lalang ritallasa'mu; akolalo mupikkiri sikonjo passala langkasa, mingka pa'batu pikkirammu mange risikonjo passala appaantee jua kamua. Akolalo rapangi kalemmu sara'de'!

¹⁷ Akolalo a'balasa nudaa surangang nudaa; geokanglaloi apa nubaji' mange risikuanna tau!

¹⁸ Pakkulle-kulleangi, ampa passala injo rie' juai ri kau, tallasalaloko lalang dame surangang sikuanna tau!

¹⁹ Urang siana' mala'biri'ku, akolalo kau to'jua a'boja pa'balasang, mingka sarei tampa' rikuku'na Allataala, saba' rie' ta'ukiri: Pa'balasang injo dahuangKu. Nakkemo laa'boja pa'balasang, pau Karaeng.

²⁰ Mingka, ampa pa're balimmu, sarelalo kanre; ampa tirere, sarelalo ere inung! Ria'geo' appakonjomu injo mupisoongimu bara api ri ulunna.

²¹ Akolalo a'ra' ribeta rinudaa, mingka pibetai nudaa injo surangang kabajikang!