ROMA 11 - Kitta' Passitallikang Bau KAREBA BAJI'

Sesa ri Israele 11:1-10

¹ Injomo saba'na, nakke akkuta'nang: Ma'ringika Allataala labokoi umma'Na? Gelei appakonjo! Saba' manna nakke inni tau Israele to'jua, rituina Abraham, battu ripinangka'na Benyamin.

² Allataala gele labokoi umma'Na numaeng lapile injo minang riolo mariolo. Iyareka geleika muisseki nulapau injo lalang Kitta' Tangkasa ripassala'na Elia, rihattu lapa'jammakanna Israele mange ri Allataala,

³ ”Karaeng, maeng lahunoimu sikonjo nabbiMu, mejang panaroang pappassidakkaamMu maeng ngase'mu lapanraki; sangga nakke mamo attallasa na a'ra'i pole laalle nyahaku.”

⁴ Mingka anteekamua pauna Allataala mange ri ia? ”Nakke lannanro juapa tujungsa'bu tau tappa' mae ri Nakke, tau gele minang joppa' nyomba mange ri Baal.”

⁵ Appakonjo todo'i rikonni-konnina rie' se're sesa, assituru' pileang lapammentengi pangamaseang.

⁶ Mingka ampa passala injo a'jari assituru' pangamaseang, injo gelemu asituru' panggeokang, saba' ampa gelei appakonjo, barakka' injo gele todo'i barakka'.

⁷ Jari, anteekamua? Israele gelei lauppa nulaboja injo, mingka sikuanna tau ripile injo maemmu lauppa. Na sikuanna tau maraeng, maeng ripakaterasa atina,

⁸ assimpole rie' ta'ukiri: ”Allataala labua'i assimpole tura'ra', na lasare mata gele laanjanjang na toli gele laallangngere, sa'genna mae ri allo inni.”

⁹ Appaui pole Daud, ”Lappasammu mejang panganreannai a'jari jango surang sappo'-sappo', batu patatto'roang na pa'balasa mange ri iyai.

¹⁰ Na lappasammu matanna a'jari kalammang, sa'genna gelei anjanjang, na paa'jari bokona bungku' sitarrusu'na.”

Tau Israele tatto'ro, tau maraeng salama' 11:11-24

¹¹ Injomo saba'na, nakke akkuta'nang: Apa iyai injo tatto'ro na parallu a'dappe'? Gelei appakonjo! Mingka saba' rikasalaanna, kasalamakang injo ambattumu mange risikuanna tau maraeng, solanna nyannungi.

¹² Saba' ampa kasalaanna a'battuangi kakalumannyanganna lino inni, na kakuranganna a'jari kakalumannyangang mange risikuanna tau maraeng, la'bipa pole sangka'na.

¹³ Nakke appau mange ri kaui, oe tau gele intu Yahudi. Injomo kanarana nakkemo inni suro lamange risikuanna tau gele injo Yahudi, kurapangi passala injo kala'birang ripanjampangingku,

¹⁴ iamo intu so'di injo nakke akkulle kupa'rie' panyannung lalang ri atina julu kampongku na nakke akkulle appakasalama' lohe tau battu ri iyai.

¹⁵ Saba' ampa panollakinna a'battuangi passidameang ri lino, akkulle juaika panarimaanna rie' battuang maraenganna lalang tallasa battu ritangnga-tangngana tau mate inni?

¹⁶ Ampa bageang bungasa injo tangkasa, injo tangkasa ngase' todo'i labu' lamaang injo, na ampa aka' injo tangkasa, injo tangkasa todo'i pangka-pangkana.

¹⁷ Injomo saba'na, ampa lohemo pangka maeng risappe na assimpoleko su'la' sule timbona maeng ripadakki' assimpole passambena na minahangi nguppa dahuang ri aka' poong kaju Zaitun lohe injo polona,

¹⁸ akomo a'bangga-bangga mange ri pangka-pangka injo! Ampa laa'bangga-banggako, u'rangi ma'nassana gele kau mutumpa'i aka' injo, mingka aka' injomo latumpa'ko.

¹⁹ Barang lamukua: Rie' pangka-pangka risappe, solanna nakke ripadakki'.

²⁰ Baji'mu! Iyai injo risappe-sappe kanara gelena tappa', na kau tau ammenteng ka'jangi intu lalang rikatappakang. Akolalo tampo, mingka ngali'ko!

²¹ Saba' ampa Allataala gele lakamaseang pangka-pangka toje' injo, Ia gele todo'ko lakamaseang.

²² Injomo saba'na, pariati baji'sai kangissekanna Allataala na panggeokang karrasa'Na todo' mange risikuanna tau maeng a'boko injo, mingka kalammoranNa mange ri kau ampa tuli rie'ko lalang rikalammoranNa.

²³ Mingka manna iyai tularipadakki' injo, ampa gele tuli a'jannang lalang rikageleanna tappa', saba' Allataala a'kahasa lalapadakki' ngase'i muliang.

²⁴ Saba' ampa kaui assimpole pangka ri poong kaju Zaitun utang, maeng ngase'moko ritatta', na assisa'la'mu ta'ra tallasa'mu injo maeng ripadakki'moko intu muliang ri poong Zaitun toje' injo, la'bipa pole iyai inni, assimpole pangka-pangka toje' injo, iyai inni laripadakki'i ri poong zaitunna to'jua.

Pappasalama' ri Israele 11:25-36

²⁵ Urang siana', solanna kau andai murapang kalemmu sara'de', kukaa'raki solanna kau muisse'i harasia inni: Sibageang battu ri Israele maeng a'jari terasa atimu sa'genna lohemo tau maraeng antama'.

²⁶ Rita'ra appakonjona, sikuanna tau Israele laripakasalama', assimpole rie' ta'ukiri, ”Battu ri Sion larie' Pappasalama', Ia laappalili sikonjo nudaa battu ri Yakub.

²⁷ Na iamo inni passisapattaangKu surangang iyai, ampa Kulappasi kadorakaanna.”

²⁸ Assituru' surangang Injili, iyaimo balinna Allataala rikanara kau, mingka assituru' surangang pileang, iyaimo bahaang Allata-ala rikanara pappuwa-puwaang.

²⁹ Saba' Allataala gele lasasali sikonjo pangamaseang na pakkeo'Na.

³⁰ Saba' assimpole kau riolo gele tunru' mange ri Allataala, mingka konni-konnina nguppai pangamaeang rikanara gelena tunru',

³¹ appakonjo todo'i iyai konni-konnina gele tunru', solanna ripangamaseng numaeng muuppa injo, iyai nguppa todo'i pangamaseang.

³² Saba' Allataala maeng lagurung ngase'mu sikuanna tau lalang rikageleanna tunru', solanna Ia akkulle lapappijanjangang pangamaseanNa ri iyai ngase'.

³³ O, sanna' lohena kakalumannyangang, pangisse' na kasara'dekanna Allataala! Toje'i gele akkulle risalidiki sikonjo katappukanNa na toje'i gele akkulle riamu-amu sikonjo pa'lalanganNa!

³⁴ Saba', inaimo laisse'i pikkiranna Karaeng? Iyareka inaimo minang a'jari pappainga'Na?

³⁵ Iyareka inaimo minang assare mange ri Ia, sa'genna Ia parallui lalasambei?

³⁶ Saba' iangase'na injo nubattu ri Ia, na nurie' ri Ia, na mange jua ri Ia: Ri Iamo kala'birang sa'genna situlusu'na! Aming.