ROMA 10 - Kitta' Passitallikang Bau KAREBA BAJI'

¹ Urang siana', sarro a'ra'na atiku surang pangera dowaangku mange ri Allataala iamo intu, solanna iyai injo ripakasalama'.

² Saba' nakke akkulle assare sa'bi ripassala'na ma'nassana iyai injo toje'i ri Allataala, mingka gele rie' pappahanna.

³ Saba', kanara rigeleinna laisse' kanabaang ri Allataala surang rikanara apparri-parrina laappaenteng kanabaang assituru' a'ra' kale-kalena to'jua, jari iyai injo gele tunru' mange rikanabaang ri Allataala.

Kanabaang assituru' katappakang 10:4-15

⁴ Saba' panyangkakinna hukkung Tora' iamo intu Almase, sa'genna kanabaang injo lauppai sikuanna tau tappa'.

⁵ Saba' Musa ngukiri passala kanabaang assituru' hukkung Tora': ”Tau lageokang injo, laattallasai ri kanarana.”

⁶ Mingka kanabaang assituru' katappakang appakonni pauna: ”Ako paui lalang ri atimu: Inaimo lalaerangi nai' ri suruga?”, iamo intu: Lalaerangi Almase naung mae,

⁷ iyareka: ”Inaimo lanaung ri lanta' kamateang?”, iamo intu: Lalaerangi Almase nai' battu ritangnga-tangngana tau mate.

⁸ Mingka apa pauna? Appakonni, ”Pau injo seppa'i ri kau, iamo intu lalangi ri babamu na lalangi ri atimu.” Iamo injo pau katappakang, nutapala'bang injo.

⁹ Saba' ampa babamu ngaku ma'nassana Isamo intu Karaeng, na tappa'i atimu ma'nassana Allataala maeng lapakaattallasai muliang battu ritangnga-tangngana tau mate inni, injo kau laripakasalama'.

¹⁰ Saba' lalang ri atina tau inni tappa' na ripa'naba, na lalang ri babana tau inni ngaku na ripakasalama'.

¹¹ Saba' Kitta' Tangkasa appau, ”Inai jua tappa' mange ri Ia, gele laripakasiri'.”

¹² Saba' gele rie' passisalana tau Yahudi inni surang tau Yunani. Saba', Karaeng assimpolemo injo Karaeng mange risikuanna tau na ngamaseangi mange risikuanna tau akkeo' injo mange ri Ia.

¹³ Saba', inai jua akkeo' mange ri arenna Karaeng, injo laripakasalama'i.

¹⁴ Mingka anteekamua tau inni laakkulle akkeo' mange ri Ia ri tau gele injopa lakatappaki? Anteekamua tau inni laakkulle tappa' mange ri Ia ri tugele injopa minang allangngere? Anteekamua laallangngere passala'na Isa, ampa tide' tau lapappauwangi passala'Na?

¹⁵ Na anteekamua tau inni akkulle laappala'bang ripassala'Na, ampa gelei risuro? Assimpole rie' ta'ukiri, ”Sanna' baji'na ririe'na mae tungerang injo kareba baji'!”

Pagelena tappa' tau Israele 10:16-21

¹⁶ Mingka gele iangase'na tau maeng narima kareba baji'. Yesayamo appau, ”Karaeng, inaimo latappa' mange ripau numupabattu injo?”

¹⁷ Jari, tappa' inni ammumbai battu rinurilangngere, na apa nurilangngere injo assala'na nubattu ripau passala'na Almase.

¹⁸ Mingka nakke akkuta'nang: Gelepaika iyai injo maeng lalangngeri? Sitoje'na iyai injo maemmu lalangngere, ”Sa'ranna tungerang injo kareba maeng lala'bammu sibatu lino, na pauna ambattumu mange riappa'na lino.”

¹⁹ Mingka nakke akkuta'nang: Apa tau Israele inni gele lapahang? Ripakaramulana appaui Musa, ”Nakke lakubua'ko nyannung mange risikuanna tau gele injo umma' na lakupaentengi kuku'mu mange ri tau gele injo a'ra' allangngere.”

²⁰ Rie' pole, appaui Yesaya lalang ri kabaraniang, ”Nakke maeng a'ra'ma ripiuppai ri iyai tugele injo a'ra' a'boja ri Nakke, Nakke maeng Kupappijanjangammu kalengKu mange ri iyai tugele injo minang lapakkuta'nangang arengKu.”

²¹ Mingka passala'na Israele ia appaui, ”Siallomu bujuru maeng Kupatanjo limangKu mange ri tau gele injo a'ra' tunru' na tua'gaga injo.”