PANJANJANNA YAHYA 9 - Kitta' Passitallikang Bau KAREBA BAJI'Timboe' makalima 9:1-12 1 Maeng injo malaeka' makalima latui' timboe'na, na kujanjangi sibatu bintoeng a'dappe' battu ri langi' naung ri tana, na mange ri ia risareangi ana' konsinna balo kamateang. 2 Jari labungkarai babaang balo kamateang injo, jari nai'mu ambu battu ri balo injo assimpole ambu pakkallaang bakka', matanna allo surang langi' a'jari kalammang ripassabakang ambu injo. 3 Battu ri ambu injo ansulu'mu lohe jale' ribahonna lino na mange ri iyai risarei kahasa assimpole kalang pamosona ri lino. 4 Mange ri iyai risarei pappasang, solanna iyai anda manraki rompo' ri lino iyareka lamung-lamung iyareka poong kaju, passangadinna sangga mangei jua ri rupatau gele injo makei segele Allataala ri linrona. 5 Iyai ripa'biangi gele lamuno rupatau, passangadinna lalasissainna jua limambulang sallona, na pa'risi'na sissaang injo assimpolei pa'risi'na turise're ri kalang, ampa nguppai nyere' rupatau. 6 Rihattu injo sikuanna tau laa'boja kamateang, mingka iyai gele larumpa', na a'ra' ngase'i mate, mingka kamateang injo derei battu ri iyai. 7 Tappana jale' injo assimpolei jarang ripakasadia injo lamange bundu', na rate ri ulunna rie' se're nuassintanja' songko' bulaeng kakaraengang, na tappana assimpolei tappa rupatau, 8 na uhu'na assimpolei uhu' tubahine na giginna assimpolei gigi masang, 9 na barambanna assimpolei baju gallang, na sa'ra kapina assimpolei sa'ra bendi larenreng injo lohe jarang, nuallari injo ripa'bundukang. 10 Potina assimpolei poti kalang na rie' numosona, na lalang ri potina rie' kahasa lama'ri'-ma'risi rupatau, limambulang sallona. 11 Tulaparenta injoi iamo intu malaeka' balo kamateang; arenna lalang ribisara Ibrani iamo intu Abadon na lalang ribisara Yunani iamo intu Apolion. 12 Bala makase're injo allalomu. Konni-konnina larie' juapa pole rua bala maraeng. Timboe' makaannang 9:13-21 13 Maeng injo malaeka' makaannang latui' timboe'na, na nakke allangngere se're sa'ra ansulu' battu riappa'iya tanru' mejang bulaeng panaroang koro'bang nurie' injo ri a'rakanna Allataala, 14 na appaui mange ri malaeka' makaannang neteng injo juapa timboe', ”Lappasammu appa'iya malaeka' tassokke' rie' injo riampi'na balang bakka' ri Efrata.” 15 Jari rilappasammu appa'iya malaeka' numaeng tassokke' ripasadiaang injomo hattu surang allonna, bulang na taunna lamuno sidahu talluna rupatau. 16 Jumallana tantara injo iamo intu ruambilangang juta tau a'jarang; nakke allangngere jumallanai. 17 Appakonjomu kujanjang lalang ripanjanjang inni sikonjo jarang na sikonjo tua'baina; iyai makei baju gallang, nutanja'na eja assimpolei api na kondo-kondo surang didi halirang; ulunna jarang injo assimpolei ulu masang, na battu ri babana ansulu'i api, surang ambu na halirang. 18 Ritalluiya inni kapanrakang rihunoi sidahu talluna rupatau inni, iamo intu passabakang ri api, ri ambu surang ri halirang, nuansulu' injo battu ri babana. 19 Saba' kahasana jarang lohe injo rie'i lalang ri babana surang ri potina. Saba' potina assimpolei saa; na ri poti injo rie' ulunna na battu ri ulunna injo appabattui kapanrakang. 20 Mingka rupatau maraeng, tugele injo mate passabakang rikapanrakang injo, gele juapai jarra battu ripanggeokang limanna: Iyai gelei ammono' nyomba setang na barahala battu ri bulaeng na salaka, battu ri tambaga, batu na kaju nugele akkulle anjanjang iyareka allangngere iyareka a'lingka, 21 na iyai gelei jarra battu ripamunoang, sehere, kabalerang surang pa'lukkakang. |
@LAI 2012 Indonesian Bible Society (Lembaga Alkitab Indonesia)
Indonesian Bible Society