PANJANJANNA YAHYA 8 - Kitta' Passitallikang Bau KAREBA BAJI'

Segele makatuju 8:1-5

¹ Ri hattunna Ana' Jimbala injo lalekkesi segele makatuju, jari sanna'mu sinona ri suruga, larie'i sitangnga jaang sallona.

² Jari kujanjangi tujuiya malaeka', ammenteng ri a'rakanna Allataala, na mange ri iyai risareangi tujuiya timboe'.

³ Jari rie'mo battu se're malaeka' maraeng, na ia ngerangi sibatu pa'dupaang bulaeng mange ammenteng riampi'na mejang panaroang koro'bang injo. Mange ri ia risarei lohe dupa lalapassidakkaang assurang-surang pangera dowaanna sikuanna tau tappa' ribahonna mejang bulaeng panaroang koro'bang ri a'rakanna kadera injo.

⁴ Jari nai'mu ambunna dupa injo assurang-surang pangera dowaanna tau tappaki injo battu ri limanna malaeka' injo mange ri a'rakanna Allataala.

⁵ Jari malaeka' injo laalle pa'dupaang injo, lasarei api battu ri mejang panaroang koro'bang, na lapamballungi mange ri lino. Jari assa'ramu gunturu, lapinahangi latte na anggeongi tana.

Appa'iya timboe' numakase're 8:6-13

⁶ Maeng injo tujuiya malaeka' tuneteng injo ri tujuiya timboe' appatajamu lalatui' timboe'na.

⁷ Malaeka' makase're latui' timboe'na na a'jarimu bosi batu, na api, a'leo' rara; na iangase'na injo ripamballungi mange ri lino, jari akkanremu sidahu talluna lino inni na sidahu talluna poong-poong kaju surang rompo' monsong injo juapa tahana mutung ngase'i.

⁸ Malaeka' makarua injo latui' timboe'na na rie' se're nuassimpole bonto langkasa, a'bola'-bola'i lakanre api, ripamballungi naung ri tamparang. Sidahu talluna tamparang injo a'jari rara,

⁹ na mate ngase'i sidahu talluna sikonjo mahallo' rie' nyahana ri tamparang na sidahu talluna battu risikonjo kappala panra' ngase'.

¹⁰ Malaeka' makatallu latui' timboe'na na a'dappe'mu se're bintoeng bakka' battu ri langi', a'bola'i assimpole sulo, na lataburi sidahu talluna balang surang sikonjo mata ere.

¹¹ Arenna bintoeng injo iamo intu Apsintus. Sidahu talluna battu risikonjo ere a'jari pai' na lohe tau mate kanara ere injo, saba' pai'na.

¹² Maeng injo malaeka' makaappa' latui' timboe'na na katongkokangi sidahu talluna matanna allo na sidahu talluna bulang surang sidahu talluna sikonjo bintoeng, jari sidahu talluna a'jari kalammang na sidahu talluna allo gelei sinara na appakonjo todo'i ampa bangngii.

¹³ Maeng injo kujanjangi surang kulangngerei sikaju barro' kao' anri'ba' langkasa ri langi' na appaui lalang risa'ra bakka', ”Silakamo, silakamo, silakamo iyai tuammari injo ribahonna lino ampa talluiya malaeka' maraeng, latui' timboe'na.”