PANJANJANNA YAHYA 7 - Kitta' Passitallikang Bau KAREBA BAJI'

Tau risare injo segele ri bangsa Israele 7:1-8

¹ Maenna injo kujanjangi appa' malaeka' ammenteng ripatansulapa'na lino inni na iyai injo latahangi patangsulapa' anging ri lino, solanna gele rie' anging ammarrisi ri bonto, iyareka ri tamparang iyaeka ri poong-poong kaju.

² Maeng injo anjanjanga se're malaeka' maraeng ammumba ri tampa' pambuakanna matanna allo. Ia ngerangi segele'na Allataala attallasa; na ia a'nga'ngara lalang risa'ra bakka' mange ri appa'iya malaeka' turisuro injo lamanraki tana surang tamparang,

³ ”Akolalo ammanraki tana iyareka tamparang iyareka poong-poong kaju rigelenapa maeng risare segele risikonjo atanna Allataalaba ri linrona!”

⁴ Kulangngere jumallana turisare injo segele: Sibilangang patampulo appa'sa'bu tumaeng risare segele battu ri iangase'na pinangka' tuina Israele.

⁵ Battu risossoranna Yehuda sampulorua sa'bu turisegele, battu risossoranna Ruben sampulorua sa'bu. battu risossoranna Gad sampulorua sa'bu,

⁶ battu risossoranna Asyer sampulorua sa'bu, battu risossoranna Naftali sampulorua sa'bu, battu risossoranna Manasye sampulorua sa'bu,

⁷ battu risossoranna Simeon sampulorua sa'bu, battu risossoranna Lewi sampulorua sa'bu, battu risossoranna Isakhar sampulorua sa'bu,

⁸ battu risossoranna Zebulon sampulorua sa'bu, battu risossoranna Yusuf sampulorua sa'bu, battu risossoranna Benyamin sampulorua sa'bu.

Lohe tau nugele akkulle rirekeng jumallana 7:9-17

⁹ Maenna injo kujanjangi rie' sigo'loang bakka' tau lohe gelei akkulle rirekeng jumallana, tubattu risikuanna bangsa na sossorang surang pinangka' na bisara, ammenteng ri a'rakang kadera injo surang ri a'rakanna Ana' Jimbala, makei baju bakka' pute na netengi taha ihusu ri limanna.

¹⁰ Lalang risa'ra' iyai a'nga'ngara, ”Kasalamakang battu ri Allataalaba Tuattolong injo rate ri kadera na battu ri Ana' Jimbala!”

¹¹ Sikonjo malaeka' ammentengi risiappuna kadera injo na sikonjo tutoa-toa surang appa'iya mahallo' injo; joppa' ngase'i ri a'rakanna kadera injo na nyombai ri Allataala,

¹² ampai appau, ”Toje'i surang nabai! Pappakabakka' surang kala'birang, na pangisse' na appanai' sukkuru, na kangalikang surang kakahasaang, na kagassingang mange ri Allataala sa'genna situli-tulinna! Aming!”

¹³ Jari rie'mo se're tau battu ri tutoa-toa injo appau mae ri nakke, ”Inai tau make intu baju bakka' pute na tubattu riapai mae?”

¹⁴ Nakke appau ri ia: ”Karaengku, karaeng ditte riisse'i.” Jari appaui pole mae ri nakke, ”Iyai inni sanging tulappasamo battu rikamarasaiang bakka'; na iyai maemmu labissai baju bakka'na na lapakaputei lalang ri rarana Ana' Jimbala.

¹⁵ Injomo saba'na, ammenteng ngase'mu ri a'rakang kadera pattolonganna Allataala na iyai anjampangi ri Ia allo bangngi ri Sapo Tangkasa'Na. Ia tuattolong rate kadera injo lalaka'rang kemaNa rateannai.

¹⁶ Iyai gelemu lakapa'reang surang latirere poleang, na matanna allo iyareka bambanna sinara matanna allo gelemu lalatabai.

¹⁷ Saba' Ana' Jimbala nuattolong ritangnga kadera kakaraengang injo, lalakalahakii na lalaurangi mange ritimbula'na ere katallasang battu ri Allataala lalalu'lu'i sikonjo ere mata battu ri matannai.”