PANJANJANNA YAHYA 6 - Kitta' Passitallikang Bau KAREBA BAJI'

Annangia segele bungasa rilekkesi 6:1-17

¹ Jari kujanjangi Ana' Jimbala injo laallekkesi numakase're ri tujuiya segele injo, na kulangngerei numakase're battu ri appa'iya mahallo' injo appau lalang sa'ra assimpole gunturu: ”Maeko!”

² Na kujanjangi rie' sikaju jarang pute na tau a'bai injo netengi se're pana na mange ri ia risarei se're songko' kakaraengang. Maeng injo mange ri a'rakang assimpole tuambeta ri pa'bundukang.

³ Rihattunna Ana' Jimbala injo allekkesi segele makarua, kulangngerei mahallo' makarua injo appau: ”Maeko!”

⁴ Jari mangemu ri a'rakang sikaju jarang maraeng, sikaju jarang eja kamummu' na tau a'bai injo risarei kahasa langalle dame salehangang battu ribahonna lino inni, jari assihuno-hunoimu, na mange ri ia risarei sipappa' pa'dang bakka'.

⁵ Rihattunna Ana' Jimbala injo allekkesi segele makatallu, kulangngerei mahallo' makatallu injo appau: ”Maeko!” Kujanjangi rie' sikaju jarang bolong na tau a'bai injo limanna netengi se're timbangang.

⁶ Nakke allangngerea assimpole rie' sa'ra ritangnga-tangngana appa'iya mahallo' injo lakua: ”Sibaku' bae gandong se're doe' seeng, na tallumbaku' batara se're doe' seeng. Mingka akolalo pakapanra'i minnya' surang anggoro intu.”

⁷ Rihattunna Ana' Jimbala injo allekkesi segele makaappa', kulangngerei sa'ranna mahallo' makaappa' injo lakua: ”Maeko!”

⁸ Na kujanjangi rie' sikaju jarang balibi na tau a'bai injo arenna Kamateang na pakkaraenganna kamateang minahang ri ia. Mange ri iyai risarei kahasa risidahu appa'na lino inni lalahuno surangang pa'dang, na surangang kalarakang na garring puru joong, na surangang ri binantang lambara ri lino.

⁹ Rihattunna Ana' Jimbala injo allekkesi segele makalima, kujanjangi rirahangang mejang panaroang koro'bang nyahana tumaeng injo rihuno rikanara pauna Allataala surang rikanara passa'bi rie' injo ri iyai.

¹⁰ Iyai injo a'nga'ngara surangang sa'ra' bakka', ”Sikurapa pole sallona, o Tukahasa tangkasa na naba, Kau gele ngadeli na gelei mupa'balasang raraba mange ri iyai tuammari injo ri lino?”

¹¹ Iyai injo para risarei silahara baju bakka' pute na mange ri iyai ripau-paui ma'nassana iyai parallui ammari-mari poso sinampe' hattu sa'genna ganna' jumallana bahaang pajampangi na urang siana' julu katappakanna, tularihuno assimpole iyai.

¹² Jari kujanjangi, rihattunna Ana' Jimbala injo allekkesi segele makaannang, sitoje'na jari anggeong sarromu tana na matanna allo a'jari etang assimpole annusu na bulang a'jari eja assimpole rara.

¹³ Sikonjo bintoeng ri langi' a'dappeki naung ribahonna lino assimpole poong kaju ara patantanginna bua matana, ampa ta'ge'gesei lairi' anging karring.

¹⁴ Manna langi' akku'nyu' assimpole pata'balu'na kitta' ribalu' injo na sikonjo bonto surang pulo a'lette'i ri tampa'na.

¹⁵ Sikonjo karaeng rie' ri lino surang sikonjo tubakka' na sikonjo ponggaha tantara, na sikonjo tukalumannyang surang sikonjo tukahasa, na sikonjo ata surang tulaloasa amminsa'bu ngase'i lalang ri liang surang ri sa'la'-sa'la' batu alasa ri bonto.

¹⁶ Appau ngase'i mange risikonjo bonto surang mange risikonjo batu alasa injo: ”Jongko'makang mae na palengu'kang battu ri Ia, tuattolong injo rate kadera na mange rikuku'na Ana' Jimbala injo.”

¹⁷ Saba' larapi'mu hattu allo bakka' kuku'na na inaimo akkulle lappasa?