PANJANJANNA YAHYA 5 - Kitta' Passitallikang Bau KAREBA BAJI'

Kitta' risare segele surang Ana' Jimbala 5:1-14

¹ Maeng injo rie' kujanjang ri lima kananNa tuattolong injo rate ri kadera, se're kitta' ta'balu' nuriukiri lalanganna surang pantaranna na risarei tuju segele.

² Nakke anjanjang todo'a se're malaeka' ratta', nua'nga'ngara lalang sa'ra bakka', ”Inaimo tau lasiratang ambungkara kitta' ta'balu' injo na laallekkesi risikonjo segele'na?”

³ Mingka gele rie' manna se're tau ri Suruga iyareka ri lino iyareka rahangang lino inni, tuakkulle ambungkara balu'na kitta' injo iyareka akkulle lajanjang assinna lalang.

⁴ Manna nakke ammarrang sanna' pa'risi'ku, saba' gelena rie' turirapang siratang laambungkara balu'na kitta' injo iyareka laanjanjang assinna lalang.

⁵ Jari appaumu se're tau battu ri tutoa-toa injo mae ri nakke, ”Akomo ammarrang! Janjangimu, masang battu risossoranna Yehuda, iamo intu pinangka'na Daud, maemmu ambeta, jari Ia akkullei ambungkara balu'na kitta' injo na laallekkesi tujuiya segele'na.”

⁶ Jari nakke anjanjanga ritangnga-tanngana kadera na appa'iya mahallo' injo na ritangnga-tangngana tutoa-tua injo rie' sikaju Ana' Jimbala ammenteng assimpole numaeng tassumbele, tuju tanru'na na tuju todo' matanna: Iamo injo tujuiya Nyaha Allataala turisuro mange risibatu lino.

⁷ Jari rie'mu Ana' Jimbala injo na latarimai kitta' ta'balu' injo battu ri limanNa ri tuattolong kadera injo.

⁸ Rihattunna Ia laalle kitta' ta'balu' injo, joppa'mu appa'iya mahallo' surang ruampuloiya appa' tutoa-toa ri a'rakanna Ana' Jimbala injo, para netengi se're kasaping na se're santeng bulaeng, assinna rassi dupa: Iamo injo dowaanna sikuanna tau tappa'.

⁹ Iyai injo akkelongi se're kelong-kelong bau lakua, ”Kau siratang narima kitta' ta'balu' injo surang laallekkesi risikonjo segele'na; saba' Kau maeng risumbele na passabakang ri raraMu Kau maeng muhallimu iyai tujunna Allataala battu risikonjo sossorang surang bisara na umma' surang bangsa.

¹⁰ Kau maeng a'bua' ri iyai a'jari pakkaraengang, na a'jari imang mange ri Allataala, na iyai injo lamarenta assimpole karaeng ri lino.”

¹¹ Jari nakke anjanjanga na allangngerea sa'ra lohe malaeka' risiappuna kadera injo, mahallo' injo surang tutoa-toa injo; lohena a'bilangang sa'bui surang a'juta-jutai,

¹² pauna lalang risa'ra bakka', ”Ana' Jimbala nurisumbele injomo siratang lanarima kahasa, na kakalumannyangang, na pangisse', na kagassingang, na kangalikang, na kala'birang, surang pappakala'biri!”

¹³ Maeng injo nakke allangngerea sikonjo mahallo' ri suruga surang ri lino na rahangang lino na ri tamparang surang sikuanna nurie' lalanganna, appau, ”Mange ri Ia tuattolong injo rate kadera na mange ri Ana' Jimbala, ri iamo pappakala'biri na kangalikang surang kala'birang na kahasa situli-tulinna!”

¹⁴ Appau ngase'i appa'iya mahallo' injo, ”Toje'i na nabai”, na manna tutoa-toa injo joppa' todo'i ampai nyomba.