PANJANJANNA YAHYA 4 - Kitta' Passitallikang Bau KAREBA BAJI'

Ruampulo appa' tutoa-toa na appa'iya binantang 4:1-11

¹ Rimaenna injo kujanjangi rie' se're babaang ri suruga ta'bungkara na sa'ra kulangngere injo riolo, appau mae ri nakke assimpole sa'ra timboe', lakua: Nai'moko mae laKupappijanjangangi mange ri kau apa nuparallu laa'jari rimaenna inni.

² Sikalinna nakke rikahasai ri Nyaha Tangkasa na anjanjanga, rie' se're kadera pamarentaang ri suruga, na ri kadera pamarentaang injo rie' se're Tau attolong.

³ Ia tuattolong ri kadera injo a'billa'i assingkamua parammata Yaspis surang parammata Sardis; na rie' se're tarauhe lajongko'i kadera injo ammille'-millerei assingkamua Jamarru'.

⁴ Ri siappuna kadera injo rie' ruampulo appa' kadera, na risikonjo kadera lapattolongi ruampulo appa' tutoa-tuoa makei pakeang pute surang songko' bulaeng ri ulunna.

⁵ Battu ri kadera injo ansulu'i kila' surang sa'ra latte anggalassara, na tuju sulo a'bola'-bola' ri a'rakanna kadera injo: Iamo injo tujuiya Nyaha Allataala.

⁶ Ri a'rakanna kadera injo rie' nuassimpole tamparang sarammeng ammeang-meang assingkamua kristala; ritangnga-tangngana kadera injo surang ri siappuna rie' appa' mahallo' nulaappu mata, ri a'rakang surang ri boko.

⁷ Mahallo' makase're injo assimpolei masang, na mahallo' makarua injo assimpolei ana' tedong, na mahallo' makatallu injo tappana assimpolei tappa rupatau, na mahallo' makaappa' assimpolei barro' kao' attangnga a'ri'ba'.

⁸ Appa'iya mahallo' injo annang ngase'i kapina, ri siappuna surang ri nara lalanganna rassi ngase'i sanging mata, na allo bangngi gelei minang ammari a'nga'ngara, ”Tangkasai, tangkasai, tangkasai Karaeng Allataala, Tukaminang kahasa, turie'mo na maemmu rie' riolo surang larie'i pole.”

⁹ Na a'hattu-hattui mahallo' injo appassidakka kelong-kelong, na pappakala'biri surang appanai' sukkuru mange ri Ia, ri tuattolong rate ri kadera injo na tuattallasa injo situli-tulinna,

¹⁰ jari joppakimu ruampuloiya appa' tutoa-toa ri a'rakanNa Tuattolong injo rate ri kadera, na iyai nyomba ri Ia ri tuattallasa injo situli-tulinna. Iyai lataro songko'na ri a'rakang kadera injo, ampai lakua,

¹¹ ”O Karaeng surang Allataala ri kambe, Kau siratang lanarima kelong-kelong na pappakala'biri surang kahasa; saba' Kaumo appaa'jari risikuanna; na kanara ria'ra'Mu, rie'i iangase'na injo na ripaa'jari.”