PANJANJANNA YAHYA 3 - Kitta' Passitallikang Bau KAREBA BAJI'

Mange ri jamaah rie' ri Sardis 3:1-6

¹ ”Ukirilaloi mange ri malaeka' jamaah ri Sardis: Iamo inni pauNa, Tungampunnai injo ri tujuiya Nyaha Allataala na ri tujuiya bintoeng: Kuisse'i sikuanna jamaammu: Kau rikua attallasa, padahala mateko!

² Ambaungko, na pakaterasai nurie' injo juapa attaang nuseppa' injomo lamate, saba' gele rie' manna se're jamaammu Kujanjang baji' ri a'rakanna AllataalaKu.

³ Injomo saba'na, u'rangilalo apa numaeng mutarima surang mupilangngeri; turuki ngase'laloi injo na jarrako! Saba' ampa geleko ngu'rangi, Nakke labattua assimpole palukka' na kau gelei muisse' rihattu ngurana na sikalinna Nakke rie'a battu mange ri kau.

⁴ Mingka ri Sardis rie' sikura tau lohena gelei lapakarammasa pakeanna; iyai injo laa'lingka surang Nakke lalang pakeang pute, kanara siratanginna ri injo.

⁵ Inai jua ambeta, ia laripipakei pakeang pute appakonjo; Nakke gelei laKulu'lu' arenna ri kitta' katallasang, mingka Kuani arenna ri a'rakanna AmmangKu surang ri a'rakanna sikonjo malaeka'Na.

⁶ Inai jua attoli, sibaji'na ia appilangngeri apa nulapau Nyaha mange risikonjo jamaah.”

Mange ri jamaah rie' ri Filadelfia 3:7-13

⁷ ”Ukirilaloi mange ri malaeka' jamaah ri Filadelfia: Iamo inni Pau battu ri Tutangkasa, Tunaba tulateteng injo konsing kakahasaanna Daud; ampa Ia ambungkara, gele rie' tuakullei latongko'; ampa Ia latongko'i gele rie' tuakkullei labungkarai.

⁸ Kuisse'i sikonjo jamaammu: Janjangimu, Nakke maeng ambungkara babaang ri kau, na gelei akkulle ritongko' manna rise're tau. Kuisse'i ma'nassana sikurajua kagassingammu, mingka pamuturukinna pauKu na gelei musangkali arengKu.

⁹ Janjangimu, rie' sikura tau lohena battu ri jamaah Ibilisi, iamo intu iyai tulaare' injo kalenna tau Yahudi, mingka sitoje'na gelei appakonjo, mingka iyai pabura-bura, laKupassareangi mange ri kau. Toje'i Nakke laassuro ri iyai na joppa'i ri a'rakang bangkemmu na iyai laisse'i ma'nassana Nakke ngamaseang ri kau.

¹⁰ Kanara muturukinna pauKu, lasabbara attajang ri Nakke, jari Nakkemo lanjagai ri kau rihattu passo'ri labattu injo mae risibatu lino laassare passo'ri ri iyai tuammari injo ri lino.

¹¹ Nakke lalassiri rie' battu. Bitantang tarrusui apa nurie' injo ri kau, solanna anda rie' manna se're tau laallei kasalamakammu.

¹² Inai jua ambeta, ia laKupaa'jari benteng poong lalang ri Sapo Tangkasa'na AllataalaKu, na ia gelemu laansulu' battu ri injo; na mange ri ia Kuukirii arenna AllataalaKu, arenna kota AllataalaKu, iamo intu Yerusalem bau, nuturung battu ri Suruga nubattu ri AllataalaKu, na Kuukirangi areng bauKu.

¹³ Inai jua attoli, sibaji'na ia appilangngeri apa nulapau Nyaha mange risikonjo jamaah.”

Mange ri jamaah rie' ri Laodikia 3:14-22

¹⁴ ”Ukirilaloi mange ri malaeka' jamaah ri Laodikia: Iamo inni Pau battu ri Tutoje' injo, sa'bi tulusu mallang surang naba, poong battu risikonjo nuripaa'jari ri Allataala:

¹⁵ Kuisse'i iangase'na jamaammu: Geleiko dinging na gelei todo'ko bambang. Sanna'i baji'na ampa kau dinging iyareka bambang!

¹⁶ Jari kanara hallamu, na geleiko dinging iyareka bambang, jari Kupaporasiko battu ri babaKu.

¹⁷ Kanara mukuainna: Kambe kalumannyang na maeng tapakakalumannyangi kalemba na gelemo rie' nukurang manna siso'di' ri kambe, na kanara gelena muisse' ma'nassana kalarakiko, na silaka, kaasi-asi, buta surang assola'-solara,

¹⁸ jari Nakke appiu'rangi ri kau, solanna ammalliko battu ri Nakke bulaeng maeng sappo lalang ri api, solanna a'jariko kalumannyang, na ammallii todo'ko ri Nakke pakeang pute, solanna mupakei na andai kaissekang passolara'mu nuappakasiri' injo; na ammallii todo'ko minnya' pattarile laappakalassu' ri matammu, solanna akkulleko anjanjang.

¹⁹ Inai Kukamaseang, ia Kuto'ro surang Kurabung; injomo saba'na, attoje'-toje'ko na jarrako!

²⁰ Janjangi, Nakke ammenteng ri a'rakang babaang na akkatto'-katto'; ampa rie' tau lalangngerei sa'rangKu na ambungkarai babaang, Nakke laantama' Kupiuppaii na nganrea surangang ia, na ia assurang Nakke.

²¹ Inai jua ambeta, ia Kupatolong assurang Nakke rate ri kadera pattolongangKu, appaanteekamua Nakke maeng ambeta na attolong assurangang AmmangKu rate ri kadera pattolonganNa.

²² Inai attoli, sibaji'na ia appilangngeri apa nulapau Nyaha mange risikonjo jamaah.”