PANJANJANNA YAHYA 2 - Kitta' Passitallikang Bau KAREBA BAJI'

Mange ri jamaah rie' ri Efesus 2:1-7

¹ ”Ukirilaloi mange ri malaeka' jamaah ri Efesus: Iamo inni Pau battu ri Ia, tulateteng injo tujuiya bintoeng ri lima kananNa na a'lingkai ritangnga-tangngana tujuiya bangkeng kanjoli bulaeng injo.

² Kuisse'i sikonjo jamaammu, baji' injo karesomu iyareka kasabbarammu. Kuisse'i ma'nasana geleko akkulle sabbara mange risikuanna tau a'geo' daa, na ma'nassana kau maemmu muso'ri tau lagallara injo kalenna suro, mingka sitoje'na tau injo gelei appakonjo na maengi muuppa iyai injo sanging pabura-bura.

³ Kuisse' todo'i ma'nassana kau tuli sabbara na assinsara kanara arengKu; na geleko ngisse' mangngang.

⁴ Manna appakonjoi, rie' Kussallaangko, saba' mubokoinna pangamaseammu riuruna.

⁵ Injomo saba'na u'rangilaloi anteekamua anralanna pa'dappekimmu! Jarrailaloko na geokangilalo poleang numaeng injo mugeokangi riolo. Ampa gelei appakonjo, Nakke larie'a mange ri kau na Nakke langalle bangkeng kanjolimu battu ri tampa'na, ampa geleko jarra.

⁶ Mingka iamo inni nubaji' ri kau, iamo intu kau liking risikonjo panggeokanna tau minahang ri Nikolaus, nuKukalikkingang injo todo'.

⁷ Inai jua attoli, sibaji'na ia appilangngeri apa nulapau Nyaha mange risikonjo jamaah. Inai jua ambeta, ia laKusare kanreang battu ripoong katallasang nurie' injo ri koko Firdaus Allataala.”

Mange ri jamaah rie' ri Smirna 2:8-11

⁸ ”Ukirilaloi mange ri malaeka' jamaah ri Smirna: Iamo inni Pauna Tukaminang bungasa na Tukaminang kala'busang injo, tumaeng matemo na attallasai muliang:

⁹ Kuisse'i kasusaammu surang kaasi-asiammu, mingka kalumannyangiko. Na Kuisse' todo'i pappitinanai, ri tau laareng injo kalenna tau Yahudi, mingka nusitoje'na gelei appakonjo, sibale'na iyai injo jamaah ri Ibilisi.

¹⁰ Akomo malla' mange riapa jua nuparallu lamukasissai! Akkaletutuiko saba' Ibilisi laappamballung lohe tau ri kau antama' ri pattarungkuang solanna kau riso'ri na languppako kamarasaiang sampulo allo sallona. Sibaji'na kau mallang sa'gemmu mate, na Nakke laassare tanra mange ri kau katallasang mannannungang.

¹¹ Inai jua attoli, sibaji'na ia appilangngeri apa nulapau Nyaha mange risikonjo jamaah. Inai jua ambeta, ia gelemu laassinsara manna siso'di' rikamateang makarua.”

Mange ri jamaah rie' ri Pergamus 2:12-17

¹² ”Ukirilaloi mange ri malaeka' jamaah ri Pergamus: Iamo inni PauNa, Tungerang injo pa'dang tarang appimbali matanna:

¹³ Kuisse'i ri anteeko mae ammari, iamo intu ri kadera pattolonganna Ibilisi; na a'bitantang jarre'ko ri arengKu, na kau gelei musassali katappakammu mae ri Nakke, gele todo'i ri jammanna Antipas, sa'biKu, tumallang injo ri Nakke, turihuno injo ri a'rakammu, ripammarianna Ibilisi.

¹⁴ Mingka ri Nakke rie' sikura nuamberaki ri kau: Ritangnga-tangngamui rie' sikura tau minahang riajarang nuassimpole nulapangajarang injo Bileam rihattu riolo, tuassare injo pappiu'rangi mange ri Balak laappakalingu tau Israele, solanna nganrei passidakka ri barahala surang assangkili.

¹⁵ Appakonjo todo'i rie' ri kau tuminahang riajaranna Nikolaus.

¹⁶ Injomo saba'na, jarrailaloko! Ampa gelei appakonjo, Nakke lalassiri rie' mange ri kau na Nakke laa'bali ri iyai surangang pa'dang rie' injo ri babaKu inni.

¹⁷ Inai jua attoli, sibaji'na ia appilangngeri apa nulapau injo Nyaha mange risikonjo jamaah. Inai jua ambeta mange ri ia laKusarei Manna nutassa'bu ri suruga; na Nakke laassare mange ri ia batu pute, nuribahonna rie' ta'ukiri areng bau, natide' tulaisse'i manna se're tau, rimaraenganna ri tunarima injo.”

Mange ri jamaah rie' ri Tiatira 2:18-29

¹⁸ ”Ukirilaloi mange ri malaeka' jamaah ri Tiatira: Iamo inni Pauna Ana' Allataala, numatanNa assingkamua bola' api, na bangkenna assimpolei tambaga numaeng ritunu lalang ri bara api:

¹⁹ Kuisse'i, sikonjo jamaammu: baji' pangamaseammu iyareka kasabbarammu. Kuisse'i, ma'nassana la'bi loheangi jama-jamammu rikonni-konnina na nurioloang injo.

²⁰ Mingka Kusallaiko, saba' mupa'bianginna bahine Izebel, tulagallara injo kalenna nabbi bahine, tungajara na lohemo atangKu lapakalingu solanna assangkili na nganre passidakka lamange ri barahala.

²¹ Maemmu Kusare hattu lajarra, mingka ia gelei a'ra' jarra battu ripassangkili'na.

²² Janjangimu, Nakke lakupamballungi nai' ri koi patinroang tau dodong na iyai tuassangkili injo surangang ia laKupamballung ngase'i antama' rikamarasaiang bakka', ampa iyai gelei a'ra' jarra battu risikonjo panggeokanna bahine injo.

²³ Manna ana'-ana'na pole Kuhuno ngase' na laisse'i sikonjo jamaah ma'nassana Nakkemo nyo'ri bateng surang atina ri rupatau na ma'nassana Nakke laa'balasa mange ri kau para assituru' ripanggeokammu.

²⁴ Mingka mange ri kau, iamo intu tau maraeng ri Tiatira, tugele intu minahang na gelei lasesei ajaranna Ibilisi, mange ri kau Nakke appau: Nakke gelea a'ra' laassare tanggongang bera' maraeng mange ri kau.

²⁵ Mingka apa nubaji' ri kau, bitantanglalo injo sa'gengKu rie' battu.

²⁶ Na inai jua ambeta na lageokangi jamaangKu sa'genna kala'busanna, mange ri ia larisarei kahasa risikonjo bangsa;

²⁷ na appakonjo todo'i assimpole kahasa Kutarima injo battu ri AmmangKu ia lamarenta surangang tukkang bassi; iyai laripakaa'baru'bu' assimpole bingkara'na pabua' korong tana injo,

²⁸ na mange ri ia Kusarei bintoeng bakka'.

²⁹ Inai attoli, sibaji'na ia appilangngeri apa nulapau Nyaha mange risikonjo jamaah.”