PANJANJANNA YAHYA 16 - Kitta' Passitallikang Bau KAREBA BAJI'

Tujuiya bala 16:1-21

¹ Maeng injo kulangngerei sa'ra a'ganinsing battu lalang ri Sapo Tangkasa appau mange ri tujuiya malaeka', ”A'lampamoko na to'lokangi tujuiya assi santeng kuku'na Allataala ribahonna lino.”

² A'lampamu malaeka' makase're injo na lato'lokangi assi santenna ribahonna tana; jari ammumbamu puru joong nusanna' daana na ammanraki mange risikuanna tau makei injo tanra battu ri binantang surang tunyomba injo ri dato'-dato'na.

³ Malaeka' makarua injo lato'lokangi assi santenna ribahonna tamparang; jari erena tamparang injo a'jarii rara, assimpolei rara tau mate na mate ngase'i sikonjo nua'nyaha-nyaha na nuattallasa injo ri tamparang.

⁴ Malaeka' makatallu lato'lokang santenna ribahonna sikonjo balang surang mata ere, na a'jari rara ngase'i.

⁵ Maeng injo kulangngerei malaeka' kahasa injo ri ere appau: ”Adeleko, Kau turie'mo na Tumaemmo rie' riolo, Kau Tutangkasa. saba' Kau maeng assare hukkungang inni.

⁶ Saba' iyai maeng lato'lokangi rarana sikuanna tau tappa' na sikonjo nabbi, Kau pole maeng assare ri iyai langinung rara; passala injo siratangi mange ri iyai!”

⁷ Maeng injo allangngerea sa'ra battu ri mejang panaroang koro'bang injo appau, ”O Karaeng, Allataala, Tukaminang kahasa, nabai na adelei risikonjo hukkungamMu.”

⁸ Malaeka' makaappa' lato'lokang assi santenna mange ribahonna matanna allo, na mange ri ia risarei kahasa laappakamutung rupatau lalang ri api.

⁹ Rupatau inni ripakamutungi ri api sarro injo bambanna, jari iyai latadeamu arenna Allataala Tukahasa mange risikonjo kabalaang na iyai gelei a'ra' jarra laappakala'biri ri Ia.

¹⁰ Malaeka' makalima lato'lokang assi santenna rate ripattolonganna binantang injo na pakkaraenganna a'jari kalammang, na sikuanna tuammari ri injo lakolatta' lilana saba' pa'risi'na.

¹¹ Maeng injo attadeamu mange ri Allataala Turie' injo ri suruga kanara pa'risi'na na kanara puru joonna, mingka iyai gelei a'ra' jarra battu risikonjo panggeokanna.

¹² Malaeka' makaannang lato'lokang assi santenna rateang balang bakka', iamo intu Balang Efrat, jari a'mara ngase'i erena, solanna sadia pa'lalanganna sikonjo karaeng larie' battu ri timoro.

¹³ Maeng injo kujanjangi battu ri baba saa bakka' injo surang battu ri baba binantang na battu ri baba nabbi palusu injo ansulu'i tallu nyaha appakangali'-ngali' nuassimpole tumpang tappana.

¹⁴ Iyaimo injo nyaha-nyaha setang anggeokang nugele samara. Talluiyamo nyaha injo a'lampa lapiuppai sikonjo karaeng risibatu lino, lalaparappung ngase'i tujunna pa'bundukang ri allo bakka', iamo intu hattunna Allataala Tukaminang kahasa injo langadeli.

¹⁵ ”Akkaletutuiko, Nakke labattua assimpole palukka'. Sunggulalo, tua'jaga-jaga na tulapariati injo pakeanna, solanna ia gelei a'lingka assola'-solara na gelei kajanjangang kasirikanna.”

¹⁶ Maeng injo talluiya nyaha appakangali'-ngali' laparappung ngase'i karaeng injo rise're tampa', nulalang ribisara Ibranina riare'i Harmagedon.

¹⁷ Malaeka' makatuju lato'lokang assi santenna mange ri langi'. Maeng injo battu lalang ri Sapo Tangkasa kalangngerammu sa'ra a'ganinsing battu ri pattolongang injo, lakua, ”A'maeng ngase'mu.”

¹⁸ Jari mansaramu kila' na sa'ra gunturu anggalassara, jari anggeommu tana nusanna' sarrona nugelepa minang kajariang minang riuruna rupatau inni ripaa'jari. Pammate sarrona panggeonna lino injo.

¹⁹ Jari bokaramu kota bakka' injo a'jari tallu bageang na sosarai sikuanna kota risikonjo bangsa. Manna Babel kota nubakka' injo gelei lappasa battu ri bala injo. Allataala laassare mange ri ia santeng nurassi anggoro kuku'Na.

²⁰ Sikonjo pulo lalannya' ngase'i, na sikonjo bonto gelemu lariuppa.

²¹ Bosi batu bakka', larie'i limampulo kilo bera'na, a'dappeki battu ri langi' naburi rupatau. Jari rupatau injo attadeai mange ri Allataala kanara bala bosi batu injo, saba' bala injo sarro bakka'na.