PANJANJANNA YAHYA 12 - Kitta' Passitallikang Bau KAREBA BAJI'

Bahine na saa bakka' 12:1-6

¹ Maeng injo kajanjangammu se're tanra bakka' ri langi': Se're bahine lakalimbuki matanna allo, na bulang rahangang bangkenna surang rie' se're songko' kakaraengang battu ri sampulorua bintoeng rate ri ulunna.

² Ia tianangi na lalang ripa'nganroang surang rikamarasaiang a'ra' lamana', ia akkariu'i kanara pa'risi'na.

³ Maeng injo kajanjangammu se're tanra maraeng ri langi'; na janjangimu, sikaju saa bakka' nueja assimpole saga, rie' tuju ulunna na sampulo tanru'na, na rate ri ulunna rie' tuju songko' kakaraengang.

⁴ Potina anrenrengi sidahu talluna bintoeng ri langi' na lapamballungi mange ribahonna lino. Jari saa bakka' injo ammentengi ri a'rakanna bahine lamana' injomo, lalaloloi Ana'na, ampa bahine injo maemmu laanakang Ana'na.

⁵ Ia mana'i se're ana' bura'ne, tulaakkalahaki risikuanna tau maraeng surangang pamba'bala bassi; sikalinna Ana'na injo rialle passai na lalariangi mange ri Allataala na ri a'rakang pattolonganNa.

⁶ Allari bahine injo mange ri parang luara, ri injo ripasadiaangi se're tampa' ri Allataala, solanna ia ripiara ri injo sisa'bu ruambilangang annampulo allonna.

Saa bakka' ribeta 12:7-9

⁷ Jari ammumbamu pa'bundukang ri suruga. Mikhael surang sikonjo malaeka'na a'bundu' labaliang saa bakka' injo. Saa bakka' injo risokong todo'i battu risikonjo malaeka'na,

⁸ mingka iyai gelei akkulle attahang; iyai gelemu pole nguppa tampa' ri suruga.

⁹ Saa bakka' injo, saa toamo, nuriare' Ibilisi iyareka setang, nulaappalingu-lingu injo risibatu lino, ripamballungi naung; ia ripamballungi mange ri lino, assurang-surang sikonjo malaeka'na.

Kelong-kelong pambeta 12:10-12

¹⁰ Maeng injo kulangngerei sa'ra a'ganinsing ri suruga lakua, ”Konni-konnina larapi'mu hattunna kasalamakang na kahasa surang pamarentaanna Allataalata, na kakahasaanna Ia turibarakkaki ri Allataala, saba' maeng ripabuammu naung tuappitina injo ri urang siana' julu katappakanta, tuappitina injo ri iyai allo bangngi ri a'rakanna Allataalata.

¹¹ Iyai appibetai ri ia patteteang rara Ana' Jimbala, na rikanara pau passa'bi battu ri iyai. Saba' iyai gelei lakarimanangi nyahana sa'genna parallu nga'rakang kamateang.

¹² Injomo saba'na a'rannu-rannumoko, oe suruga na oe kau ngase' tuammari lalang ri injo, silakamo kau, oe tana surang tamparang! Saba' Ibilisi mangemu ri kau, lalang rikahussangang sarrona, saba' ia laisse'i ma'nassana simpirimu hattu.”

Saa bakka' andatala ri bahine injo 12:13-18

¹³ Sungka'i ngu'rangi saa bakka' injo ma'nassana ia maeng ripabuammu mange ri bahonna lino, ia andatalai ri bahine maeng injo mana' Ana' bura'ne.

¹⁴ Mange ri bahine injo risareangi ruaiya kapina battu ri barro' kao' nusanna' bakka'na, solanna ia anri'ba' mange ri tampa'na ri parang luara, ri injo ia ripiara dere battu ri tampa'na saa bakka' injo sallona larie'i sihattu na ruanghattu surang sitangnga hattu.

¹⁵ Jari saa bakka' injo appaporasai ere battu ri babana, assillohei ere balang, mange ri bahine injo, solanna ia rianyukangi ri balang injo.

¹⁶ Mingka tana injo mangei laalle bahine injo. Ia labungkara babana, na laa'lu'i balang nulapaporasa injo saa bakka' battu ri babana.

¹⁷ Jari saa bakka' injo sarro kuku'na mange ri bahine injo, jari a'lampai labaliangi bundu' pinangka' maraenna, tuminahang injo ri hukkunna Allataala na ngampunnai passa'bi ripassala'na Isa.

¹⁸ Jari ammentemmu saa bakka' injo ri biring bone.