PANJANJANNA YAHYA 11 - Kitta' Passitallikang Bau KAREBA BAJI'

Rua sa'bi Allataala 11:1-14

¹ Maeng injo lapassareangi mae ri nakke sipappa' bulo, tanja'na assimpole tukkang panyuka', ampai appau appakonni: ”Ammentengko na suka'i Sapo Tangkasa'na Allataala surang mejang panaroang koro'bang na iyai turie' injo assambajang lalangang.

² Mingka pisalai jurunna Sapo Tangkasa bageang pantaranna, akomo musuka'i, saba' ia maeng ripassareammu mange risikuanna tau maraeng na iyai laallisa'-lisa' kota tangkasa inni patampulorua bulang sallona.”

³ Nakke laassare jama-jamaang mange ri rua tau sa'biKu, solanna iyai assare panjanjang surang makei pakeang tukamateang, sisa'bu ruambilangang annampulo allo sallona.

⁴ Iyaimo injo ruaiya poong zaitun na ruaiya bangkeng kanjoli ammenteng ri a'rakanna Karaeng sibatu alang.

⁵ Ampa rie' tau a'ra' ma'ri'-ma'risi ri iyai, ansulu'mu api battu ri babana laappakamutung risikonjo balinna. Ampa rie' tau a'ra' ma'ri'-ma'risi ri iyai, tau injo parallui lamate appakonjo todo'.

⁶ Iyai rie' kahasana lanongko' langi', solanna gelei turung bosi rihattunnai juapa assare panjanjang. Ri iyai rie' todo' kahasa mange risikonjo ere lalapinrai a'jari rara, na anrabung lino lalang risikonjo rupanna bala-bala, ampa lakaa'rakii.

⁷ Ampa iyai maemmu lapa'maeng passa'binai, injo rie'mo binantang ansulu' battu ri andara kamateang lalabaliangi na lapisauri ampai lahunoi ngase'.

⁸ Batangkale matena laassisulimpangii ritangnga lalang ri kota bakka', nulalang ripakkalebarang riare'i Sodom surang Massere, ripattampakanna todo' Karaennai risalli'.

⁹ Sikuanna tau battu risikuanna bangsa na sossorang na bisara surang umma', lalajanjangi batangkale matena tallungallo sitangnga sallona na tau injo gelei lapakkulleang batangkale mate injo riloangang.

¹⁰ Iyai tuammari injo juapa ri lino inni a'rannu-rannui rikanarana iyai injo na a'buakii ampai assisare tanra mata, saba' ruaiya nabbi injo maemmu appabattu passissa mange risikuanna tau ammari ri lino inni.

¹¹ Tallungallo sitangnga ribokoang mae antama'mu nyaha katallasang battu ri Allataala mange ri iyai, sa'genna attallasa ngase' muliang na sikuanna tau anjanjang ri iyai a'jari sanna' malla'na.

¹² Jari ruaiya nabbi injo allangngere sa'ra bakka' battu ri suruga mange ri iyai, ”Nai'moko mae!” Jari naikimu ri suruga, lakalimbukii rammang, risa'bikangi risikonjo balinna.

¹³ Rihattu injomo a'jari anggeongi tana sanna' bakka'na na sidahu sampulona ri kota injo a'jari sosara, na tujunsabu tau mate rikanarana tana anggeong injo na sikuanna tau maraeng sanna' malla'na, ampai lapakala'biri Allataala turie' injo ri suruga.

¹⁴ Bala makarua injo allalomu: Janjangimu, bala makatallu gelemu sallo nabattui.

Timboe' makatuju Kelong-kelong pappakala'biri'na tutoa-toa injo 11:15-19

¹⁵ Maeng injo malaeka' makatuju latui' timboe'na, na kalangngerammu lohe sa'ra a'ganinsing lalang ri suruga, lakua, ”Pamarentaang ri lino latetengi Karaengta na Ia turibarakkaki ri Allataala, na Ia lamarenta assingkamua Karaeng situlusu'na.”

¹⁶ Ruampuloiya appa' tutoa-toa, tuattolong injo rate ri kadera ri a'rakanna Allataala, joppa'i na nyombai Allataala,

¹⁷ ampai appau ngase', ”Kambe appanai' sukkuru mange ri Kau, o Karaeng, Allataala Tukaminang kahasa, Turie'mo na maemmu rie' riolo, saba' Kau maeng mutetengi kahasaMu nubakka' injo na mupakaramulamu marenta assimpole Karaeng.

¹⁸ Sikuanna tau maraeng a'jari kuku'mu, mingka kuku'Mu maemmu rie' na hattunna risikuanna tau mate lariadeli na laassare passahalang mange risikonjo atamMu, risikonjo nabbi surang risikuanna tau tappa' na mange ri iyai tumalla' injo ri aremMu, mange risikuanna tau ki'di' na risikuanna tau bakka' na laappakapanra' mange ri inai jua ammanraki ri lino.”

¹⁹ Maeng injo ta'bungkarai Sapo Tangkasa'na Allataala nurie' injo ri suruga, na kajanjangammu tabu' passitallikanNa lalang ri Sapo Tangkasa injo na a'jarimu kila' surang gunturu na anggeongi tana surang bosi batu sarro.