PANJANJANNA YAHYA 1 - Kitta' Passitallikang Bau KAREBA BAJI'

Ulupau 1:1-3

¹ Iamo inni panjanjanna ri Isa Almase, nulapassareang Allataala mange ri Ia, solanna rilapappijo'jokanNa mange ri suro-suroNa apa nuparallu liba laa'jari. Ia maeng lapappisa'biammu ri Yahya suroNa lalang ripatteteang malaeka' suroanNa.

² Yahya maeng assa'bi ripassala pauna Allataala surang passala passa'bi risareang injo ri Isa Almase, iamo intu iangase'na numaeng lajanjang.

³ Sunggulalo ia tungajina surang tuallangngere'na pau pappijo'jo' inni, na tau nuruki injo ri apa nurie' ta'ukiri lalang ri inni, saba' hattunna gelemu sallo.

Sallang pappikatu mange ri tujuiya jamaah 1:4-8

⁴ Battu ri Yahya mange ri tujuiya jamaah nurie' ri Asia ki'di': Barakka' pangamaseang na dame salehangang minahang ri kau, battu ri Ia, turie'mo na maemmu rie' riolo surang larie'i pole, na battu ri tujuiya nyaha nurie' injo ri a'rakang pattolonganNa,

⁵ na battu ri Isa Almase, Sa'bi mallang, tukaminang bungasa injo attallasa muliang battu ritangnga-tangngana tau mate na tukahasa risikonjo karaeng rie' ri lino inni. Mange ri Ia, tungamaseang injo ri ditte na tumaeng lalappasang injoki battu rikadorakaanta patteteang raraNa,

⁶ na Ia maeng labua'ki a'jari pakkaraengang imang mange ri Allataala, AmmanNa, mange ri Iamo kala'birang surang kahasa sa'genna situli-tulinna. Aming.

⁷ Janjangimu, Ia rie'i mae lalang ri rammang na sikuanna mata laanjanjang mange ri Ia, iyai pole tumaeng injo nobo' ri Ia. Sikuanna rupatau ri lino laapparau mange ri Ia. Ya, Aming.

⁸ ”Nakkemo bungasa surang kala'busang, pauna Karaeng Allataala, rie'mu na maemmu rie' riolo surang larie'i pole, Tukaminang kahasa.”

Panjanjanna Yahya ri pulo Patmos 1:9-20

⁹ Nakke, Yahya, urang siana' julu katappakammu tuminahang injo lalang rikasissaang, lalang Pakkaraengang na lalang rikasabbarang attajang ri Isa. Nakke ammari ri pulo riare' Patmos kanara pauna Allataala na passa'bi nurisareang ri Isa.

¹⁰ Riallonna Karaeng nakke rikahasai ri Nyaha na nakke allangngere se're sa'ra bakka' battu ri bokoku, assimpolei sa'ra timboe',

¹¹ lakua: Apa mujanjang, ukirilaloi lalang rise're kitta' na pappikatuangi mange ri tujuiya jamaah inni: mange ri Efesus, mange ri Smirna, mange ri Pergamus, mange ri Tiatira, mange ri Sardis, mange ri Filadelfia surang mange ri Laodikia.

¹² Jari ria'gilingku mange riboko lakutilingi sa'ra a'bisara injo mae ri nakke. Sungka'ku a'giling, kujanjangammu tuju bangkeng kanjoli battu ri bulaeng.

¹³ Ripassa'lakanna bangkeng kanjoli injo rie' se're tau assintappa Ana' Rupatau, makei baju bakka' na lambere'na larapi'i kantunu', na barambanNa assaleppang panga'ba' aja' battu ri bulaeng.

¹⁴ Ulu surang uhu'Na pute assimpolei bulu jimbala, assimpute kapasa na matanNa assimpolei bola' api.

¹⁵ BangkenNa a'billa assimpole tambaga numaeng injo ritunu lalang ri bara api; sa'ranNa assimpolei a'ba bakka'.

¹⁶ Ri lima kananNa Ia neteng tuju bintoeng na battu ri babaNa rie' ansulu' pa'dang tarang appimbali matanna, na rupanNa assinara assimpole matanna allo ritangnga allona.

¹⁷ Rihattunna Ia kujanjang, joppa'ma ri a'rakang bangkenNa assimpole tau mate; mingka Ia lataro lima kananNa ribaho ulungku ampai appau: ”Ako malla'! Nakkemo Tukaminang Bungasa surang Tukaminang Kala'busang,

¹⁸ na Tuattallasa. Nakke maemma mate, mingka janjangimu, Nakke attallasa, sa'genna situli-tulinna na Nakkemo neteng sikonjo konsing kamateang surang pakkaraenganna kamateang.

¹⁹ Injomo saba'na, ukirilaloi apa numaeng mujanjang, baji' nukajariang rikonni-konnina iyareka rinulaa'jari injo rimaenna inni.

²⁰ Iamo inni harasia ripassala tujuiya bintoeng numaeng mujanjang injo ri lima kanangKu surang tujuiya bangkeng kanjoli nubattu injo ri bulaeng: Tujuiya bintoeng iamo injo malaeka'na tujuiya jamaah na tujuiya bangkeng kanjoli iamo injo tujuiya jamaah.”