MATIUS 28 - Kitta' Passitallikang Bau KAREBA BAJI'

Isa attallasa muliang 28:1-10

¹ Sungka'i allalomo allo Passambajangang, rirahung kalena juapa allo aha' injo, a'lampamu Maria Magdalena surang Maria maraeng, mange ladowa' kuburu injo.

² Sikalinna tana injo anggeong sarro saba' se're malaeka'Na Karaeng Allataala naung battu ri Suruga na mangei ri batu injo na ladolui ampai attolong ri bahonna.

³ Rupanna malaeka' injo assimpolei kila' sinara'na na pakeanna pute assimpole kapasa.

⁴ Manna pajaga injo malla' ngase'i na pusa'i assimpole tau mate.

⁵ Mingka, appaui malaeka' injo mange ri tubahine injo, ”Akomo malla'; saba' kuisse'i Isa turisalli' injo mubojai.

⁶ Ia tide'i ri inni, saba' Ia attallasamu muliang, assimpole numaeng injo lapau. Maeko, janjangi tampa'Na ripaonrang.

⁷ Be'beremoko a'lampa na paui mange ri ana'-ana' gurunNa ma'nassana Ia attallasamu muliang battu rikamateang. Ia lapilombaiko mange ri Galilea; konjopai mange lamujanjangi. Sitoje'na maemmu kupau mange ri kaui.”

⁸ Be'beremu a'lampa battu ri kuburu injo, a'leo'i malla' surang rannu na a'nyara-nyarai allari lalapappiissekangi ri ana'-ana' gurunNa.

⁹ Sikalinna assiuppai Isa na lakua, ”Salama' ri kau.” Mangeimu ri Isa na laraka' bangkenNa surang lasombai.

¹⁰ Jari appaui Isa mange ri iyai, ”Akomo malla'. A'lampamoko na paui mange risikonjo urang siana'Ku, solanna a'lampai mange ri Galilea, na konjopakang mange laassijanjang.”

Pau burana Pangadelang Agama 28:11-15

¹¹ Rihattu attangnga lalannai juapa, rie'mo lohe tau ripajaga injo mange ri kota na lapappiissekangi sikonjo kajariang mange risikonjo imang ponggaha.

¹² Rimaennamo a'rappungi surang tutoa-toa, ngalleimu se're passamaturukang laassare doe' passogo' mange ri sorodadu a'jaga injo

¹³ na lakua, ”Parallui mupau ma'nassana ana'-ana' gurunNa battui ritangnga bangngina na lalukka'i batangkalenna Isa rihattu tinroimmu.

¹⁴ Ampa passala inni kalangngerang ri pamarenta, kambepa a'bisara mange ri ia, sa'genna geleko nguppa nulaappakasusa.”

¹⁵ Latarimai doe' injo na lageokangi toje'i assimpole nuripauwang injo mange ri iyai. Pau inni alla'bangi risikuanna tau Yahudi sa'genna inni hattu.

Parenta laappala'bang Injili 28:16-20

¹⁶ Jari a'lampaimu suro-suro sampulo injo se're mange ri Galilea, ri bonto numaeng lajo'jokang injo Isa mange ri iyai.

¹⁷ Rihattunna assijanjang nyombaimu mange ri Ia, mingka lohe juapa tau bata-bata.

¹⁸ Mangei Isa ri iyai na appaui, ”Ri Nakke maeng risareamma sikonjo kahasa ri Suruga surang ri lino.

¹⁹ Injomo saba'na a'lampaimoko, sikuanna tau paa'jarii ana' gurungKu na rio ngase'i lalang arenNa Amma, Ana' surang Nyaha Tangkasa,

²⁰ na ajarai anggeokang sikonjo numaeng injo Kuparenta mange ri kaui. Piisseki, Nakke tulusu minahang ri kaui sa'genna rikala'busanna lino.”