MATIUS 27 - Kitta' Passitallikang Bau KAREBA BAJI'

Isa rierang mange ri Pilatus Kamateanna Yudas 27:1-10

¹ Rihattu latangnga allonamo, sikonjo imang ponggaha na tutoa-toana tau Yahudi a'rappungi na ngalle passamaturukang lalahuno Isa.

² Lasokkekii Isa, ampai laerangi na lapassareangi mange ri Pilatus pamarenta ri tampa' injo.

³ Rihattunna Yudas, tau lapassareang injo Isa, laisse'i ma'nassana Isa larihukkung mate, lasassalamu kalenna. Maeng injo ia lapahuliangi doe' tallumpulo injo salaka mange risikonjo imang ponggaha na tutoa-toa,

⁴ na appaui, ”Nakke a'jarima doraka kanara kupassareangi rarana tau tide' injo salana.” Mingka pappihalinnai, ”Tide' passilolongamba ri intu? Intu passilolongang kale-kalemu!”

⁵ Jari Ia lapamballungi doe' salaka injo antama' ri Sapo Allataala, ampai a'lampa battu ri injo na lagojeng kalenna.

⁶ Imang ponggaha injo laalle doe' salaka injo na lakuai, ”Ripa'liingangi doe' appakonni inni ripantama' ri patti passidakkaang, saba' inni doe' rara.”

⁷ Sungka'i maemmo a'rappungi doe' injo lapahalli tana nuriare' Tana Pabua' Korong lalapaa'jari tampa' pakkuburang ri tau battu-battu.

⁸ Iamo injo saba'na tana injo sa'genna konni-konnina riare'i Tana Rara.

⁹ Ri appakonjona ripa'rupamu Pau Allataala nulapau injo Nabbi Yeremia, ”Iyai narima tallumpulo doe' salaka, iamo intu balli nulatantuang rise're tau assituru' tasserang nulapake injo ritangnga-tangngana tau Israele,

¹⁰ na iyai lapassareangi doe' injo laa'jari tana ripabua' korong, assimpole nulapappasangang injo Karaeng mae ri nakke.”

Isa ri a'rakanna Pilatus 27:11-26

¹¹ Maeng injo Isa riparapa'i mange ri pamarenta. Pamarenta injo akkuta'nang mange ri Ia, ”Kaumoka karaenna tau Yahudi?” Appihali Isa, ”Kaumo mupaui.”

¹² Mingka pappitina nulapabattu injo sikonjo imang ponggaha surang tutoa-toa Yahudi mange ri Ia, Ia gele lapihalii.

¹³ Jari appaui Pilatus mange ri Ia, ”Gele Mulangngere lohe pappitina risikonjo sa'bi mange ri Kau?”

¹⁴ Mingka Ia gele appihali manna sipali' pau, sa'genna lannasamu pamarenta injo.

¹⁵ Maeng a'jari kabiasaammu ri pamarenta laappalappasa se're tau ritarungku ampa allo passua-suarang ri tulapile injo tau lohe.

¹⁶ Rihattu injo rie' lalang ri pattarungkuang tubaji' riisse'na ma'nassana sanna' daana turiare' Yesus Barabas.

¹⁷ Saba' asse'reimu ri injo, appaui Pilatus mange ri iyai, ”Inai mukaa'raki kupalappasa ri kaui, Yesus Barabas iyareka Isa turiare' injo Almase?”

¹⁸ Ia baji' laisse'na ma'nassana iyai injo laparapa'i Isa rikanara siriati.

¹⁹ Rihattu attolonna Pilatus ri kadera pangadelang, bahinenna appikatu pasang mange ri ia, ”Ako mupantama-tamai palakarana tau baji' intu, saba' kanara Ia narubangngi sanna' sissaku lalang riso'na.”

²⁰ Mingka passabakang ripassuroanna sikonjo imang ponggaha na tutoa-toa, tau lohe injo laerai solanna Barabas ripalappasa na Isa rihukkung mate.

²¹ Appaui pamarenta injo mange ri iyai, ”Inai ri ruaiya inni mukaa'raki kupalappasa?” Lakuaimo, ”Barabas.”

²² Appaui Pilatus mange ri iyai, ”Ampa appakonjo, apamo lakugeokang mange ri Isa, turiare' injo Almase?” Appau bakka' ngase'i, ”Ia parallui risalli'!”

²³ Pauna, ”Mingka kasalaang apa Ia maeng lageokang?” Mingka pela' bakka' sa'rannai appau, ”Ia parallui risalli'!”

²⁴ Rihattunna Pilatus laisse' ma'nassana sikonjo karesona tide' matu-matunna, la'bipa pole pakaramulamu ammumba pa'beserang, ia ngalle ere na labissai limanna ri a'rakanna tau lohe injo na appaui, ”Nakke tide' salaku mange ri raraNa tau inni; injo passilolongammui to'jua!”

²⁵ Appihali ngase'mu tau lohe injo, ”Lappasammu raraNa ripitanggongiang mae ri kambe surang ri ana'-ana'ba!”

²⁶ Jari ia lapalappasai Barabas mange ri iyai, mingka Isa lasuro rabungi maeng injo lapassareammu larisalli'.

Isa ritua-tuai 27:27-31

²⁷ Maeng injo sorodaduna pamarenta injo laerangi Isa mange ri sapo pammarianna pamarenta, ampai lakeo' ngase' uranna asse're risiappuna Isa.

²⁸ Lapu'nusi pakeanNa na lapipakeangi baju bakka' kamummu' mange ri Ia.

²⁹ Lapanganangangi se're songko' karaeng battu ri katinting na lataroi ri ulunna Isa, maeng injo lapitetengi sipappa bulo ri lima kananNa ampai joppaki ri a'rakanNa, na latua-tuai Isa, lakua, ”Sombangku, oe Karaeng tau Yahudi!”

³⁰ Lape'rui Isa na laalle bulo injo ampai larabungang ulunNa.

³¹ Rimaenna latua-tuai lapu'nusimu baju bakka' kamummu' injo battu ri Ia na lapipakeangi poleang pakeanNa. Maeng injo laerangimu Isa ansulukang kota lamange risalli'.

Isa risalli' 27:32-44

³² Rihattu a'lingkainna ansulukang kota, assiuppai se're tau battu ri Kirene turiareng Simon. Tau injo ripassa nyompo salli'na Isa.

³³ Maeng injo ambattuimu rise're tampa' nuriare' Golgota, battuanganna: Bonto Kadaro Ulu.

³⁴ Jari iyai injo lasarei Isa nginung anggoro nusanna' pai'na. Sungka'i maeng lapinyami, Ia gelei a'ra' lainung.

³⁵ Rimaenna lasalliki Isa labage-bageimu pakeanNa na lagossangi.

³⁶ Ampai attolongi ngase' ri injo a'jaga ri Ia.

³⁷ Rateang ulunNa rie' ta'ukiri ngurana narihukkungi, ”Innimo Isa Karaeng tau Yahudi.”

³⁸ Uranna Isa risalli' rie' rua tau palukka' bakka', se're risa'ri kananNa na se're risa'ri kairinNa.

³⁹ Sikuanna tau lumalo ri injo attua-tua ri Ia na lapabihe mori-morina,

⁴⁰ lakuai, ”Oe Kau tua'ra' intu anroka Sapo Tangkasa na tallungallo juai lamubaung, ampa Kau Ana' Allataala, naungko ri salli' intu na pakasalama'i kalemMu!”

⁴¹ Appakonjo todo'i imang ponggaha assurang-surangi sikonjo guru Tora' na tutoa-toa injo attua-tua ri Ia na lakuai,

⁴² ”Tau maraeng Ia lapakasalama', mingka kalenNa gele akkulle lapakasalama'! Ampa Ia Karaeng Israele, sibaji'na Ia naung battu risalli' injo, jari tappa'kang mange ri Ia.

⁴³ Ia lapakaa'batu tajalliNa mange ri Allataala: Tantumu lapakasalama'na Allataala rikonni-konnina, ampa Allataala ngamaseang mange ri Ia! Saba' Ia maengi appau: Nakke Ana' Allataala.”

⁴⁴ Injo pole palukka' bakka' tuassurang injo Ia risalli' attua-tua appakonjo todo'i mange ri Ia.

Isa mate 27:45-56

⁴⁵ Pakaramula battu ritette' sampulorua sa'genna tette' tallu karahie' laappui kalammang kapu' tampa' injo.

⁴⁶ Ritette' tallunamo appaui Isa lalang sa'ra bakka', ”Eli, Eli, lama sabakhtani?” Battuanganna: ”AllataalaKu, AllataalaKu, ngura a'bokoKo ri Nakke?”

⁴⁷ Lalangngere'na injo, appaui tau lohe ammentengi injo, ”Ia lakeo'i Elia.”

⁴⁸ Jari rie'mo se're tau lassiri battu ri iyai, ngalle nuassimpole taju' bassa, na lapalomai ri anggoro kassi, ampai laka'bakang ri bulo na lasareangi Isa lalainung.

⁴⁹ Mingka lohe tau maraeng appau, ”Ako, larijanjangi, barang rie' toje'i Elia appakasalama' ri Ia.”

⁵⁰ Appaui pole Isa lalang risa'ra bakka' maeng injo lapassareammu nyahaNa.

⁵¹ Jari bissa' ruamu kaeng ampang-ampang ri Sapo Tangkasa battu rate tulusu naung na a'jarimu anggeong tana, na sikonjo batu a'poong bissa' ngase',

⁵² surang a'ngangai sikonjo kuburu na lohe tau tangkasa maeng mate attallasa muliang.

⁵³ Rimaennamo attallasa Isa muliang ansuluki ngase'mu battu ri kuburu'na, ampai antama' ri kota tangkasa na lapappijanjangang kalenna mange ri tau lohe.

⁵⁴ Ponggaha pajaga na sikonjo sorodadu tulajagai injo Isa sanna' malla'na rihattu allangngerinna surang rianjanjanna tana anggeong na apa nukajariang, ampai lakuai, ”Toje'i, Ia inni Ana' Allataala.”

⁵⁵ Rie' todo' ri injo lohe tau bahine anjanjang dere, iamo intu tubahine minahang injo ri Isa battu ri Galilea lanjampangi ri Ia.

⁵⁶ Ri tau lohe injo rie'i Maria Magdalena, na Maria idonna Yakobus na Yusuf, surang idong ana'-ana'na Zebedeus.

Isa riloangang 27:57-61

⁵⁷ Rihattu labangngina rie'mo tau kalumannyang, battu ri Arimatea, turiareng Yusuf na a'jari ana' gurung todo'i ri Isa.

⁵⁸ Ia a'lampai mange ri Pilatus na laerai batangkalenna Isa. Assarei parenta Pilatus lalapassareangi mange ri ia.

⁵⁹ Jari mangemu Yusuf laalle batangkalenna Isa, laroko'i kaeng balasung bau,

⁶⁰ maeng injo laerangi na lapaonrangi batangkalenNa lalang ri kuburu bau, nulakeke ri batu a'poong. Rimaenna lapandoluang batu mo bakka' panongko' ri babaanna kuburu injo, ampai a'lampa.

⁶¹ Mingka Maria Magdalena na Maria maraeng attaang juapai ri injo na attolongi ri a'rakang kuburu injo.

Kuburu'na Isa ri jagai 27:62-66

⁶² Rimintara'na mae, rimaennamo allo pappakasadiaang, battuimu sikonjo imang ponggaha na lohe tau Farisi mange ri Pilatus,

⁶³ na lakuai, ”Karaeng, tau'rangi ma'nassana rihattu attallasa'Na juapa tuappalingu injo maengi lapau: Ri allo makatalluna Nakke laattallasa muliang.

⁶⁴ Injomo saba'na, risuro jagai kuburu'Na sa'genna allo makatalluna; saba' ampa gele, si'raka rie' ana'-ana' gurunNa mange lalukka' batangkalenna Isa, ampai lapau-pau mange ri tau lohe: Ia attallasai muliang battu rikamateang, sa'genna pappalingu ribokoang inni la'bi sarroangi na nurioloang injo.”

⁶⁵ Appaui Pilatus mange ri iyai, ”Iyaimo inni pajaga ri kau, a'lampaimoko na jagai baji' kuburu injo.”

⁶⁶ Jari a'lampai toje'mu na surangang sokongang ripajaga injo lasegelei kuburu injo ampai lajagai.