MATIUS 25 - Kitta' Passitallikang Bau KAREBA BAJI'

Ana'rara sara'de' surang ana'rara ba'ga. 25:1-13

¹ ”Rihattu injo passala Pakkaraengang Suruga ripakkalebarangi sampulo ana'rara, laalle sulona na a'lampai mange anruppai bonting bura'ne.

² Lima ri iyai tau ba'ga na lima sara'de'.

³ Ana'rara ba'ga injo laerang sulona, mingka gele a'bokong minnya',

⁴ na ana'rara sara'de' injo laerang sulona na a'bokong todo'i minnya' lalang ri botolo'nai.

⁵ Mingka passabakang sallonamo bonting bura'ne injo gelepai rie, ta'dodoki ngase'mu ampai tinro.

⁶ Rihattu tangnga bangngina kalangngerammu rie' sa'ra tau lohe a'gora-gora: Rie'mu bonting injo! Ruppaii!

⁷ Ambaung ngase' todo'mu ana'rara injo ampai lapakasadia sulonai.

⁸ Appaui ana'rara ba'ga injo mange ri ana'rara sara'de' injo: Sarekang siso'di' minnya'mu intu, saba' gelemu sallo namate suloba.

⁹ Mingka pappihalinna ana'rara sara'de' injo: Untu'kang, barang sinampe' gele kagannakang. Bajikangi a'lampaiko mange ri pabalu' minnya' na ammalliko ri injo.

¹⁰ Mingka, rihattunnai a'lampa lamange ammalli, rie'mu bonting injo na iyai tau sadia injo a'rurung-rurungi antama' surangang ia ri tampa' panganreang pa'bontingang, maeng injo lalo'bi' babaanna.

¹¹ Gele sallo rie' ngase'mu ana'rara ba'ga injo na lakua: Karaeng, Karaeng, ripambungkaranglalokang babaang!

¹² Mingka ia appihali: Sitoje'na nakke appau mange ri kaui, nakke geleko kuisse'.

¹³ Injomo saba'na, a'jaga-jagailaloko, saba' gele muisse' allonna iyareka hattunna.”

Pakkalebarang passala doe' Mina 25:14-30

¹⁴ ”Saba' passala Pakkaraengang Suruga assimpole se're tau a'ra' ansulukang bandera, lakeo' ngase'i pagahena na lapitetengiangi sikonjo doe'na mange ri iyai.

¹⁵ Se're tau lasare lima Mina, se'reang pole tau lasare rua Mina na tau maraeng injo lasare se're doe' Mina, massing-massing assituru' pakkullena, maeng injo a'lampamu.

¹⁶ Lassirimu a'lampa pagahe risare injo lima Mina. Ia lapake Mina injo a'danggang jari nguppai sahala lima todo' Mina.

¹⁷ Pagahe risare injo rua Mina appakonjo todo'i na nguppai sahala rua Mina.

¹⁸ Mingka pagahe risare injo se're Mina mangei lapa'kekeang balo ri tana ampai lasa'bu ri injo.

¹⁹ Sallo maenna injo muliammu karaenna pagahe injo ampai assirekengang.

²⁰ Mangemu pagahe risare injo lima Mina na ngerangi sampulo Mina, lakua: Karaeng, lima Mina nuripassareang injo mae ri nakke; janjangi, nakke nguppa passahalang lima Mina.

²¹ Jari lakuamo karaenna mange ri ia: Sanna' baji'na panggeokammu injo, oe pagahe mallang na lambusu; mallangko surang lambusuko rijama-jamaang ki'di', jari lakusareko jama-jamaang nula'bi bakkakang. Antama'ko mae na minahangko rikate'neanna karaemmu.

²² Maeng injo mangemu pagahe risare injo rua Mina, lakua: Karaeng, doe' Mina ruambatu nuripassareang injo mae ri nakke; janjangi, nakke nguppa passahalang rua Mina.

²³ Jari appaui karaenna mange ri ia: Sanna' baji'na panggeokammu injo, oe atangku tumallang na lambusu, baji'ko rijama-jamaang ki'di', jari lakusareko jama-jamaang nula'bi bakkakang! Antama'ko mae na minahangko rikate'neanna karaemmu.

²⁴ Mange tommoi pagahe risare injo se're Mina na lakua: Karaeng, kuisse'i rima'nassana ditte intu tau sekke' na anduru ri koko nugele injo ripa'lamungi na ngalleki ri tampa' nugele injo ripanaroi.

²⁵ Injomo saba'na malla'ma jari Mina nurisareang injoa a'lampai kuloangang ri tana: Inni karaeng, allemu anunta!

²⁶ Jari appihali karaeng injo: Oe kau, ata daa na jamala, saba' muisse'i ma'nassana andurua ri koko nugele injo kupa'lamungi na ngallea ri tampa' nugele injo kupanaroi?

²⁷ Injomo saba'na sibaji'na injo doe' Minaku mupassareangi mange ri tau a'ra' injo make doe' Mina, solanna rihattungku muliang kutarimai surang sahala'na.

²⁸ Injomo saba'na allei Mina injo ri ia na passareangi mange ri tau rie' injo sampulo Minana.

²⁹ Saba' sikuanna tau rie' injo anunna, mange ri ia larisarei siloheang. Mingka inai tide' anunna, apajua rie' ri ia lariallei.

³⁰ Na pabuammu pagahe tide' intu matu-matunna antama' rikalammang akkapu' injo. Ri injomo lakalangngerang parau surang gigi a'rekuki tide' tappu'na.”

Pangadelang ri allo kala'busang 25:31-46

³¹ ”Ampa rie'mu Ana' Rupatau lalang rikala'biranNa na sikuanna malaeka' assurang-surangi Ia, injo Ia laattolongi rate ri kadera kala'biranNa.

³² Jari sikonjo bangsa lariparappung ri a'rakanNa na Ia lapassisa'lakang ngase'i tau inni battu ri tau maraeng, assimpole pakalahaki lappassisa'la' jimbala battu ri bembe,

³³ na Ia lataro jimbala injo risa'ri kananNa na bembe injo risa'ri kairinNa.

³⁴ Jari Karaeng injo laappau mange ri iyai ri tau rie' injo risa'ri kananNa: Maeko, oe kau turibarakkaki intu ri AmmangKu, tarimai Pakkaraengang numaeng ripakasadiaang injo ri kau minang riuruna ripaa'jari lino inni.

³⁵ Saba' rihattungKu pa're, assareko kanre ri Nakke; rihattungKu tirere, assareko ere inung mae ri Nakke; rihattungKu a'jari tau battu-battu, assareko pamminsamboang mae ri Nakke;

³⁶ rihattungKu assolara, assareko pakeang mae ri Nakke; rihattungKu garring, mangeko attimporong ri Nakke; rihattungKu lalang ri pattarungkuang, mangeko a'dowa' ri Nakke.

³⁷ Jari tau naba injo appihali mange ri Ia, Karaeng, anteekamua nataisse'i Ditte pa're na kambe assare kanre ri Ditte, iyareka tirere na kambe assare ere inung ri Ditte?

³⁸ Anteekamua nataisse'i Ditte assimpole tau battu-battu, na kambe assare pamminsamboang ri Ditte, iyareka assolara na kambe assare pakeang ri Ditte?

³⁹ Anteekamua nataisse'i Ditte garring iyareka lalang ri pattarungkuang na kambe mange a'dowa' ri Ditte?

⁴⁰ Lappihali Karaeng injo ri iyai: Sitoje'na Nakke appau mange ri kaui, sikonjo numugeokang risala se'renna mange ri urang siana'Ku tukaminang kamase-mase inni, mugeokammu intu mae ri Nakke.

⁴¹ Ia Lappau todo'i mange ri iyai tau rie' injo risa'ri kairinNa: A'lampako battu ri a'rakangKu, oe tau doraka intu, a'lampako antama' ri api nugele injo minang mate bola'na numaeng ripakasadia injo ri Ibilisi na sikonjo malaeka'na.

⁴² Saba' rihattungKu pa're, geleiko assare kanre mae ri Nakke; rihattungKu tirere, geleiko assare ere inung mae ri Nakke;

⁴³ rihattungKu a'jari tau battu-battu, geleiko assare pamminsamboang mae ri Nakke; rihattungKu assolara, geleiko assare pakeang ri Nakke; rihattungKu garring na rie' ri pattarungkuang, geleiko mange a'dowa' ri Nakke.

⁴⁴ Jari iyai lappihali mange ri Ia, Karaeng, anteekamua nataisse'i Kau pa're, iyareka tirere, iyareka assimpole tau battu-battu, iyareka assolara iyareka garring, iyareka lalang ri pattarungkuang na kambe gele anjampangi ri Kau?

⁴⁵ Ia lappihali ri iyai: Sitoje'na Nakke appau mange ri kaui, sikonjo nugele mugeokang risala se'renna mange ri tau kaminang kamase-mase si inni, gele todo'i mugeokang mae ri Nakke.

⁴⁶ Tau inni laantama'i ri tampa' sissaang tide' injo la'busu'na, mingka tau naba injo laantama'i ritallasa mannannungang.”