MATIUS 24 - Kitta' Passitallikang Bau KAREBA BAJI'

PASSALA 24–25 HATO'BA RIPASSALA ALLO KALA'BUSANG Sapo Allataala larisosara 24:1-2

¹ Rimaenna injo ansulukangi Isa battu ri Sapo Allataala, ampai a'lampa. Riekimu ana'-ana' gurunNa na lajo'jo'i Sapo Allataala.

² Appaui Isa mange ri iyai, ”Mujanjang ngase'i injo? Sitoje'na Nakke appau mange ri kaui, gele larie' manna se're batu larilappasang a'lonjo' ri bahonna batu maraeng; larisosara ngase'i.”

Pakaramulana kasissaang 24:3-14

³ Rihattunna Isa attolong rate ri Bonto Zaitun, riekimu ana'-ana' gurunNa mange ri Ia la'bisara akkale-kalei surangi Ia. Lakuamo, ”Paui mae ri kambe, sikuraiya laa'jari passala injo na anteekamua tanra parie'Mu surang tanra kala'busanna lino inni?”

⁴ Pappihalinna Isa mange ri iyai, ”Tutulaloko solanna anda rie' tau appa'lingu mange ri kau!

⁵ Saba' lohe tau labattu lapake arengKu na lakua: Nakkemo Almase, na iyai injo laappakalingu tau lohe.

⁶ Lallangngeriko sa'ra passala pa'bundukang iyareka kareba pa'bundukang. Mingka tutulaloko na andaimoko bentere; saba' iangase'na injo parallui a'jari, mingka ia injo gelepa allo kala'busang.

⁷ Saba' bangsa laammenteng a'bali bangsa, na pakkaraengang la'bali pakkaraengang. Larie' kalarakang bakka' na ri antee-tee mae langgeong tana.

⁸ Mingka iangase'na injo ampamo pakaramulana kasissaang laantama' rijammang bau.

⁹ Rihattu injo ripassareangiko larisissa, na larihunoiko surang larikalikkingangiko risikuanna tau passabakang ri arengKu,

¹⁰ na lohe tau laa'bali'ballang na lassipassareangi surang lassikalikkingang.

¹¹ Lohe nabbi palusu lambua' na laappakalingu tau lohe.

¹² Saba' pela' lohena kadorakaang, jari lalohe todo' tau a'jari la'ba pangamaseanna.

¹³ Mingka tau jarre' injo tappa'na sa'genna larapi' allo kala'busanna lasalama'i.

¹⁴ Injili Pakkaraengang inni laripala'bangi risibatu lino a'jari passa'bi risikonjo bangsa, maempa injo ampamu larapi' allo kala'busanna.”

Sissaang sarro na Almase palusu injo 24:15-28

¹⁵ ”Jari, ampa anjanjangko nugele samara ammenteng ri tampa' gele siratang, assituru' pauna Allataala nulapabattu injo Nabbi Daniel – sikonjo paaji parallui lapina'na' –

¹⁶ jari sikuanna tau rie' ri Yudea parallui lari nai' ribaho bonto.

¹⁷ Tau rie' injo rate ri pa'buhungang andamu naung langalle barang-barang lalang ri kalesaponna,

¹⁸ na tau rie' injo ri koko andamu muliang langalle pakeanna.

¹⁹ Silakamu bahine tianang injo iyareka idong appasusu injo juapa ana' lolo rihattu injo.

²⁰ Ngera dowaangiko, solanna rihattummu lari anda rie' tau a'dappe' rihattunna bosi sarro iyareka ri allo Passambajangang.

²¹ Saba' rihattu injo laa'jari kasissaang bakka' assimpole nugelepa maeng a'jari minang riuruna lino sa'genna konni-konnina na gelemu laa'jari poleang.

²² So'di hattu injo gelei ribodoi, jari gelemo rie' manna se're tau laripakasalama'; mingka passabakang tau ripile injo, hattu injo laripakabodo.

²³ Rihattu injo ampa rie' tau appau mange ri kau: Tilingii, Almase rie' ri inni, iyareka Almase rie' konjomange, akomo tappa'.

²⁴ Saba' lalohe Almase palusu surang nabbi palusu laammumba na iyai injo lappaa'jari tanra-tanra bakka' na nugele samara, sa'genna so'di injo ma'ringi, iyai injo laappakalingu todo'i tau ripile injo.

²⁵ Pina'na'lalo, Nakke la'bi riolomu maeng Kupau mange ri kaui.

²⁶ Jari, ampa rie' tau appau mange ri kau: Janjangimu, Ia rie'i ri parang luara, akomo a'lampa mange konjo; iyareka: Janjangimu, Ia rie'i lalang ri bili', akomo tappa'.

²⁷ Saba' assimpole kila' ta'bebe battu ripambuakang na assau sinara'na sa'genna rikasa'rakang, appakonjo todo'i sallo' pariekanna Ana' Rupatau.

²⁸ Ri antee mae rie' bonara, ri intu lohe kalaa' a'domung.”

Pariekanna Ana' Rupatau Pakkalebarang ripassala poong kaju ara 24:29-36

²⁹ ”Gele sallo maenna kasissaang sarro injo, laa'jari etangi matanna allo na bulang gele lassau na sikonjo bintoeng laa'dappe'i battu ri langi' na sikonjo kahasa rie' injo ri langi' laanggeong.

³⁰ Rihattu injo lakajanjangangi tanrana Ana' Rupatau ri langi' na sikonjo bangsa ri lino lapparau na iyai lanjanjang Ana' Rupatau rie'mu a'dongko' rammang ri langi' lalang risikonjo kakahasaang na kala'biranNa.

³¹ Ia lalasuro ansulu' sikonjo malaeka'Na appaoni timboe' nusanna' bakka' sa'ranna na iyai injo lappasse're tau pileanNa battu ripatang sulapa'na lino inni, battu ri bangkeng langi' se'reang mange ri bangkeng langi' maraeng.

³² Allelalo pappilajarang battu ripakkalebarang poong kaju ara injo. Ampa kalumemu tangke-tangkena na pakaramulamu assu'la', muisse'i ma'nassana gelemu sallo nabambangi allo.

³³ Appakonjo todo'i, ampa mujanjangi iangase'na inni, piissekilalo ma'nassana gelemu sallo hattunna, rie'mu ri babaang.

³⁴ Sitoje'na Nakke appau mange ri kaui: tau konni-konni gelei laallalo, rigelenapa a'jari iangase'na inni.

³⁵ Langi' na lino inni laallalo, mingka pauKu gele laallalo.

³⁶ Mingka allo na hattu injo gele rie' laisse'i manna se're tau, sikonjo malaeka' ri suruga gele todo'i, na manna Ana' injo gele todo'i, Amma jua kale-kalenna laisse'i.”

Pappasang solanna a'jaga-jaga 24:37-44

³⁷ ”Saba' anteekamua passala'na ri jammanna Nuhung, appakonjo todo'i sallo' rihattu pariekanna Ana' Rupatau.

³⁸ Anteekamua iyai rigelenapa battu a'ba bakka' injo nganre na nginungi, a'bonting na ripa'bontingangi, sa'genna larapi' hattu antama'na Nuhung ri lopi,

³⁹ na iyai gele rie' nulaisse', rigelenapa battu a'ba bakka' injo na lapakalannya' ngase'i, appakonjo todo'i passala'na sallo' rihattu pariekanna Ana' Rupatau.

⁴⁰ Rihattu injo ampa rie' rua tau ri koko, sitau larierang na sitau laribokoi;

⁴¹ ampa rie' rua bahine mutara gilingang batu, sitau larierang na sitau laribokoi.

⁴² Injomo saba'na, a'jaga-jagailaloko, saba' gele muisse' rihattu ngurana narie'i Karaemmu.

⁴³ Mingka piisseki inni: Ampa opuna sapo laisse'i hattu ngurana ribangngina larie' palukka', attantu ia a'jaga-jagana, na gele lapa'biang saponna rilukkaki.

⁴⁴ Injomo saba'na, paralluko tulusu sadia, saba' Ana' Rupatau larie'i rihattu nugele injo musanna-sanna.”

Pakkalebarang ripasalla ata mallang surang ata daa 24:45-51

⁴⁵ ”Inaimo ata mallang na mangisse', turiangka' ri karaenna battu risikonjo taunna laa'jari pasare kanre mange ri iyai ampa larapi' hattunna?

⁴⁶ Sunggulaloko ata turirumpa' injo ri karaenna lajama jama-jamaanna, rihattu mulianna karaenna.

⁴⁷ Sitoje'na Nakke appau mange ri kaui: Karaeng injo lalaangka'i a'jari pajaga risikonjo anunna.

⁴⁸ Mingka, ampa daa sipa'na ata injo na appaui lalang ri atina:

⁴⁹ Gele juapai larie' karaengku, maeng injo ia pakaramulamu larabung ata maraeng injo, na nganre manginungi assurang sikonjo painung,

⁵⁰ jari karaenna ata injo larie'i ri allo nugele lasanna-sanna, na rihattu nugele laisse',

⁵¹ na ia lalahuno na lalapassimpole passareanna tau munape' injo. Ri injomo mange lakalangngerang parau na gigi a'rekuki.”