MATIUS 23 - Kitta' Passitallikang Bau KAREBA BAJI'

Isa assalla ri guru Tora' surang ri tau Farisi 23:1-36

¹ Jari appaui Isa mange ri tau lohe injo na mange ri ana'-ana' gurunNa:

² ”Guru Tora' na tau Farisi injo attolong ngase'mu ri kaderana Musa.

³ Injomo saba'na turuki na geokangi sikonjo nulapangajarang mange ri kaui, mingka akolalo turuki panggeokanna, saba' iyai injo lapangajarangi mingka gelei lageokang.

⁴ Iyai injo a'buaki erang bera', ampai lataro ri salangganna tau maraeng, mingka iyai manna seruanna gele attua.

⁵ Sikonjo jamaang nulageokangi injo solanna jua lajanjang tau lohe; make tulu' sambajang la'ba' surang salempang lambere;

⁶ langai attolong ri ulu ripanganreang tau lohe na ri a'rakang lalang ri sapo passambajangang;

⁷ langai todo'i ripakala'biri ri pasara na langai todo'i ampa rikeo'i Guru.

⁸ Mingka kau, akolalo a'ra' rikeo' Guru; saba' se're jua Gurummu na kau ngase' intu assiana'.

⁹ Akolalo a'ngare' amma manna ri inai jua ri lino inni, saba' se're jua Ammammu, iamo intu Ia turie' injo ri Suruga.

¹⁰ Ako todo' a'ra' riare' ponggaha, saba' se're jua Ponggahamu, iamo intu Almase.

¹¹ Inai jua kaminang bakka' ri kau, sibaji'na ia a'jari pajampangimmu.

¹² Inai jua lapakala'biri kalenna, ia laripakatuna na inai jua lapakatuna kalenna, iamo laripakala'biri.

¹³ Silakamoko, oe guru Tora' na tau Farisi intu, oe kau tau munape' intu, saba' mutongko'i babaang Pakkaraengang Suruga ri a'rakanna tau lohe inni. Saba' geleko a'ra' antama' na muampangi tau lohe a'raki injo laantama'. [

¹⁴ Silakamoko, oe guru Tora' na tau Farisi intu, oe kau tau munape' intu, saba' muallei saponna tau balu-balu injo na mulampangi matanna tau lohe injo ripangera dowaang lambere'mu. Injomo saba'na, attantumu languppamu hukkungang nula'bi sarroang.]

¹⁵ Silakamoko, oe guru Tora' na tau Farisi intu, oe kau tau munape' intu, saba' tamparang mulimbangi na muambi' bonto, lappaa'jari se're tau minahang ri agamamu na rimaennamo a'jari passala injo, ia mupaa'jari tau laammari ri naraka, nua'lappi rua daana battu ri kau.

¹⁶ Silakamoko, oe ponggaha buta intu, tuappau injo: Assapatta lalang areng Sapo Allataala, sapatta injo gele assa; mingka assapatta lalang areng bulaeng rie' injo ri Sapo Allataala, injo sapatta toje'.

¹⁷ Oe kau tau ba'ga na tau buta intu, antee la'bi paralluang, bulaeng iyareka Sapo Tangkasa nuappakatangkasa injo bulaeng?

¹⁸ Assapatta lalang areng mejang panaroang koro'bang, sapatta injo gele assa; mingka assapatta lalang areng koro'bang nurie' injo rate ribaho mejang, injo sapatta toje'.

¹⁹ Oe kau tau buta intu, antee la'bi paralluang, koro'bang iyareka mejang panaroang koro'bang nuappakatangkasa injo koro'bang.

²⁰ Injomo saba'na, inai jua assapatta lalang arenna mejang pakkoro'bangang, ia assapatta lalang arenna mejang pakkoro'bangang na lalang pole ri iangase'na nutattaro injo ribahonna.

²¹ Inai jua assapatta lalang areng Sapo Tangkasa, ia assapatta lalang areng Sapo Allataala na lalang pole ri Ia, Tuammari injo ri injo.

²² Inai jua assapatta lalang areng Suruga, ia assapattai lalang riareng pammarianna Allataala na passabakang mange pole ri Ia, Tuammari injo ri injo.

²³ Silakamoko, oe guru Tora' na tau Farisi intu, oe kau tau munape' intu, saba' assareko passidakka sidahu sampulona battu ri gambere, kaju tanning na marisa, mingka nukaminang parallu lalang ri hukkung Tora' gele mujampangi, iamo intu: kaadelang na pangamaseang surang kamallangang. Se're parallu rijampangi na numaraeng injo andai ribokoi.

²⁴ Oe kau ponggaha buta intu, kasissili mutapisi battu ri ere inummu, mingka unta rie' injo lalang ri ere inummu mua'lu'i.

²⁵ Silakamoko, oe guru Tora' na tau Farisi intu, oe kau tau munape' intu, saba' galasi surang pinjeng panganreammu mutangkasi bageang pantaranna, mingka bageang lalanganna rassi hassele lukkakang na kangowaang.

²⁶ Oe tau Farisi buta intu, pakatangkasalalo riolo bageang lalanganna galasi surang pinjeng injo, jari tangkasa todo'i bageang pantaranna.

²⁷ Silakamoko, oe guru Tora' na tau Farisi intu, oe kau tau munape' intu, saba' assimpoleiko kuburu riapori, nubageang pantarana ballo kajanjangang, mingka bageang lalanganna rassi buku tau mate na lohe rupanna nurammasa.

²⁸ Appakonjo todo'i kau, pantarang kajanjangang nabai ri matanna tau, mingka lalang ri atimu rassi geo' daa na bura-bura.

²⁹ Silakamoko, oe guru Tora' na tau Farisi intu, oe kau tau munape' intu, saba' appakabajikiko kuburu nabbi na mupakaballo mesanna sikuanna tau baji'

³⁰ na mukua: So'di kambe attallasa rihattunna puwa-puwaba, tantu gelekang minahang ri iyai lamuno risikonjo nabbi.

³¹ Mingka ri appakonjonamo kau to'jua assare passa'bi ri kalemmu ma'nassana kauimo intu tuina pahuno-huno risikonjo nabbi.

³² Jari, pakasangka' todo'i numeng lageokang injo puwa-puwamu!

³³ Oe kau daa intu sipa'na, oe kau sossorang daa intu! Anteeko kamua lama'ring lappasa battu rihukkunganna naraka?

³⁴ Injomo saba'na, piissekilalo, Nakke assuro sikonjo nabbi mange ri kaui, sikuanna tau mangisse' na sikonjo guru Tora': Sibageanng ri iyai lamuhuno surang lamusalli', na tumaraeng injo lamurabungi ri sapo passambajangammu na musissai battu ri kota se'reang mange ri kota maraeng,

³⁵ solanna mutanggongi karibokoanna rara ammatti'na tau tide' injo salana, pakaramula battu ri Habel, tau naba injo, sa'genna mange ri Zakharia ana'na Berekhya, tumuhuno injo ripassa'lakanna tampa' tangkasa na mejang pakkoro'bangang.

³⁶ Sitoje'na Nakke appau mange ri kaui: Sikuanna inni laripitanggongiangi mange ri tau konni-konni!”

Pangamaseanna Isa ri Yerusalem 23:37-40

³⁷ ”Yerusalem, Yerusalem, kaumo muno sikonjo nabbi na mubundu'i batu sikuanna tau risuro mange ri kaui! Pinsikurammu Nakke a'ra' lapparappung taummu assimpole jangang laparappung injo ana'-ana'na rahangang kapina, mingka geleko a'ra'.

³⁸ Janjangimu, sapommu inni laribokoi na laa'jari sino.

³⁹ Nakke appau mange ri kaui: Pakaramula rikonni-konnina Nakke gelema lamujanjangi, sa'gemmu appau: Ripakala'birimu Ia Turie' injo lalang arenna Karaeng Allataala!”