MATIUS 22 - Kitta' Passitallikang Bau KAREBA BAJI'

Pakkalebarang ripassala panganre ripa'bontingang 22:1-14

¹ Jari a'bisarai pole Isa lalang pakkalebarang mange ri iyai,

² ”Passala Pakkaraengang Suruga ripakkalebarangi se're karaeng laappakanre ripa'bontingang ana'na.

³ Ia lasuro sikonjo atanna mange laboja tau maeng injo lakeo' langanre ripa'bontingang injo, mingka sikuanna tau maeng injo rikeo' gele a'ra' battu.

⁴ Ia lasuro pole sikonjo ata maraenna, pappasanna: Paui mange risikuanna tau maeng injo rikeo': Sitoje'na, maemmu kupakasadia ngase', sapi na binantang piaraang maraengku maemmu kusumbele; tassadia ngase'mu, mae ngase'moko mae langanre ripa'bontingang inni.

⁵ Mingka tau maeng injo riboja gelei lapaduli; rie' tua'lampa ri kokonna, rie' tua'lampa mange lajama jama-jamaanna,

⁶ na tau maraeng injo lajakkalai sikonjo ata injo, lasissai ampai lahunoi.

⁷ Sarro kuku'na karaeng injo, jari lasuro ngase'mu tubaranina mange konjo lalahuno todo'i pahuno-huno injo na lasussulu kota pammariannai.

⁸ Maeng injo ia appaui mange risikonjo atanna: Panganreang pa'bontingang maeng tassajimu, mingka tau maeng rikeo' injo sumpae' gelei siratang ri injo.

⁹ Injomo saba'na, a'lampaimoko mange risikonjo pappengkaang lalang na keo'i mae konni sikuanna tau murumpa' ri injo lamange ripanganreang pa'bontingang inni.

¹⁰ Jari a'lampaimu ata injo na laurang ngase'mu sikuanna tau larumpa' injo ri lalang, tau daa injo geo'na na tau baji' injo geo'na, jari rassimu tampa' panganreang injo ri toana.

¹¹ Rihattunna karaeng injo antama' lassijanjang sikonjo toananna, ia anjanjangi se're tau gele makeang pa'buaki.

¹² Jari appau karaeng injo mange ri ia: Oe urang siana', ngura antama'ko mae konni na geleko makeang pa'buaki? Mingka gele appihali tau injo.

¹³ Jari appaumu karaeng injo mange risikonjo atanna: Sokke'i bangkenna surang limanna na pabuangi tau intu antama' rikalammang akkapu' injo, ri injomo larie' kalangngerang parau na gigi a'rekuki.

¹⁴ Saba' lohe turikeo', mingka so'di' turipile.”

Passala a'bajara bea mange ri Pamarenta 22:15-22

¹⁵ Maeng injo a'lampaimu tau Farisi na a'rundingi anteekamua na akkulle lasikko' Isa rise're pakkuta'nang.

¹⁶ Lasuroimu ana'-ana' gurunna assurang-surang tau Herodian lakkuta'nang mange ri Ia, ”Guru, baji' taisse'na, Ditte se're tau lambusu na lambusui ripangajara a'ra'na Allataala na Ditte tide' tau rikamallaki, saba' Ditte gele a'ra' riare'.

¹⁷ Paulaloi mae ri kambe panguppaTa: Apa ripakkulleangi a'bajara bea mange ri pamarenta Roma iyareka gele?”

¹⁸ Mingka Isa latarrusui ati daanai injo jari appaui, ”Oe tau munape', ngura Nakke musso'ri?

¹⁹ Erangi mae ri Nakke doe' seeng pa'bajara bea intu.” Ngerangimu mange ri Ia se're doe' seeng.

²⁰ Jari akkuta'nangi Isa mange ri iyai, ”Gambara na arenna inai inni?”

²¹ Pappihalinnai, ”Gambara na arenna Kaisar.” Jari appaui Isa mange ri iyai, ”Sareangi Kaisar apa nusiratang mupassareang ri Kaisar na mange ri Allataala apa nusiratang mupassareang ri Allataala.”

²² Lalangngere'na injo kaliruimu na labokoi Isa ampai a'lampa.

Passala attallasa muliang rikamateang 22:23-33

²³ Ri allo injo lohemo tau Saduki mange ri Isa, nupanguppana ma'nassana gele rie' tau attallasa muliang rikamateang. Akkuta'nang ngase'i mange ri Ia:

²⁴ ”Guru, Musa lapaui ma'nassana ampa rie' se're tau mate na tide'pa ana'na, urannamo siana' parallu labontingi bahinenna injo laassare pinangka' ri uranna siana'.

²⁵ Mingka ri kambe rie' tau tuju assiana'. A'bontingi tulihua injo, mingka maenna injo matemu. Saba' tide'pa ana'na, ia labokoi bahinenna injo mange ri uranna siana'.

²⁶ Appakonjo todo'i tumakarua injo na tumakatallu sa'genna tumakatuju.

²⁷ Kamaenganna, sungka'i mate ngase', mate tommo bahine injo.

²⁸ Inaimo ri tau tuju injo laa'jari bura'nenna bahine injo rihattu attallasa injo muliang rikamateang? Saba' maeng ngase'i labontingi.”

²⁹ Appihali Isa mange ri iyai, ”Linguiko, saba' gele mupahang Kitta' Tangkasa iyareka kahasana Allataala!

³⁰ Saba' rihattu attallasa injo muliang rikamateang, iyai injo gelemu labonting na gele tommo laripa'bontingang mingka laattallasai assimpole malaeka' ri suruga.

³¹ Mingka passala attallasa'na muliang rikamateang sikuanna tau mate geleka maeng muaji nulapau injo Allataala, rihattunna Ia appau:

³² Nakkemo Allataalana Abraham, Allataalana Ishak na Allataalana Yakub? Ia gelei Allataala ri tau mate, mingka Allataala ri tau attallasa.”

³³ Tau allangngere injo lannasa ngase'mu mange ripangajaranNa.

Poong parenta 22:34-40

³⁴ Rihattunna lalangngere tau Farisi injo ma'nassana Isa maemmu lapakagele akulle appau tau Saduki injo, asse're ngase'mu

³⁵ na rie' se're tau ri iyai, se'rei guru Tora', akkuta'nang lasso'ri ri Ia,

³⁶ ”Guru, anteeang poong parenta lalang ri hukkung Tora'?”

³⁷ Pappihalinna Isa mange ri ia, ”Passukku'i pangamaseammu mange ri Karaeng Allataalamu, risiganna'na atimu surang nyahamu na harasiamu.

³⁸ Iamo injo poong parenta na makase're.

³⁹ Parenta makarua, nuassimpole injo, iamo intu: Kamaseangi parammu rupatau assimpole mukamaseanna kalemmu.

⁴⁰ Ri ruaiya inni parenta rie' ngase'mu sikonjo hukkung Tora' surang kitta'na sikonjo nabbi.”

Passala Almase na Daud 22:41-46

⁴¹ Rihattunna asse'rei tau Farisi injo, akkuta'nangi Isa mange ri iyai,

⁴² ”Anteekamua panguppamu ripassala Almase? Ia inai Ana'?” Appauimu mange ri Ia, ”Ana'na Daud.”

⁴³ PauNa mange ri iyai, ”Ampa appakonjo, anteekamua Daud ripangajara'na Nyaha Tangkasa akkulle laare' Ia injo Karaenna, rihattunna ia appau:

⁴⁴ Karaeng Allataala maengi appau mange ri tungataingku: attolommoko risa'ri kanangKu, sa'genna sikonjo balimMu Kutaro rahanganna bangkemMu.

⁴⁵ Jari, ampa Daud laare'i Ia injo Karaeng, anteekamua lama'ring Ia ana'na todo'?”

⁴⁶ Gele rie' manna se're tau akkulle appihali ripakkuta'nanNa, na pakaramula rihattu injo gelemo rie' manna se're tau barani akkuta'nang mange ri Ia.