MATIUS 21 - Kitta' Passitallikang Bau KAREBA BAJI'

Isa ripakala'biri ri Yerusalem 21:1-11

¹ Rihattunna Isa na ana'-ana' gurunNa seppa'mo ri Yerusalem na ambattuimu ri Betfage ri Bonto Zaitun, Isa assuro rua ana' gurunNa

² surang lapasangi, ”A'lampaiko mange ri desa rie' injo ri a'rakammu intu, na ri injo lanrumpa'ko sikaju kaladai damme' tattambang na ana'na rie'i riampi'na. Lekkesi tambanna ruaiya kaladai injo na erangi mae ri Nakke.

³ Ampa rie' tau appisangka ri kaui, paulalo: Lakaparalluangi Karaeng. Ia lalassiri juai lapahuliang.”

⁴ Passala injo a'jari solanna ripa'rupa Pau nulapabattu injo patteteang ri nabbi,

⁵ ”Paulalo mange ri ana'rarana Sion: Janjangi, Karaemmu rie'mu mange ri kau, Ia baji' nyaha na a'bai sikaju kaladai damme', na sikaju kaladai longko tekekang.”

⁶ Jari a'lampaimu ana' gurung risuro injo na lageokangi assimpole passsurona Isa mange ri iyai.

⁷ Larenrengimu kaladai damme' injo surang ana'na, ampai lalapaki ri pakeanna na nai'mu Isa a'bai.

⁸ Tau sanna' injo lohena lapaapara pakeanna ritangnga lalang, rie' todo' tau natta' tangke-tangke kaju na latalasai ritangnga lalang.

⁹ Tau a'lingka injo ri a'rakanna Isa na tau minahangi injo ribokoNa a'gora-gora: ”Hosana mange ri Ana' Daud ripakala'birimu Ia tubattu injo lalang arenna Karaeng, hosana Allataala Tukaminang la'biri!”

¹⁰ Rihattunna Ia antama' ri Yerusalem, rambai sibatu kota injo na rie' tau appau, ”Inaika tau inni?”

¹¹ Appihali tau lohe injo, ”Iamo inni Nabbi Isa battu ri Nazaret ri tana Galilea.”

Isa appakatangkasa Sapo Allataala 21:12-17

¹² Maeng injo Isa antama'i ri Sapo Allataala na labongkai sikuanna tau a'balu'-balu' rijurunna Sapo Allataala. Ia lapabulinta' ngase'i sikonjo mejang pappasambeang doe' na sikonjo bangkona pabalu'-balu' bangkeng bodo

¹³ na appaui mange ri iyai, ”Rie' ta'ukiri: SapongKu lariare' sapo pangera dowaang. Mingka kau mupaa'jari pammariang palukka'.”

¹⁴ Maeng injo riekimu tau buta na tau kempang injo mange ri Ia antama' ri Sapo Allataala na iyai injo ripakagassing ngase'i.

¹⁵ Mingka rihattunna imang ponggaha na guru Tora' injo lajanjangi kajariang gele injo samara nulapaa'jari Isa na lalangngerinna ana'-ana' a'nga'ngara injo lalang ri Sapo Allataala, ”Hosana mange ri Ana' Daud!” sarromu hussanna nyahana,

¹⁶ maeng injo appauimu mange ri Ia, ”Mulangngere nulapau injo ana'-ana' inni?” Lakuamo Isa mange ri iyai, ”Kulangngere; gelepai minang muaji: Battu ri babana sikonjo ana' lolo surang sikonjo ana' nyusu injo juapa Kau maeng appakasadia kelong-kelong?”

¹⁷ Maeng injo Ia labokoi ngase'mu na a'lampai ansulukang kota mange ri Betania na a'bangngi ri injo.

Isa na poong kaju ara 21:18-22

¹⁸ Rihattu ngesala'na juapa ripa'lingkaanNa muliang mange ri kota, Isa appisa'ringi pa're.

¹⁹ Ri biring lalang Ia anjanjangi poong ara ampai a'lampa mange konjo, mingka Ia gele nguppa bua ri poong kaju ara injo tahana jua rombong. PauNa mange ri poong kaju ara injo, ”Gelemoko lambua situlusu'na! Rihattu injo jua matei poong kaju ara injo.”

²⁰ Lajanjanna kajariang injo lannasa ngase'mu ana' gurunNa, ampai appau, ”Anteei kamua lama'ring nasikali mate poong kaju ara injo?”

²¹ Appihali Isa mange ri iyai, ”Sitoje'na Nakke appau mange ri kaui, ampa tappa'ko na pakatide'i bata-batamu, gele sangga nuappakonjo jua akkulle mugeokang assimpole nuKugeokang mange ri poong kaju ara injo, mingka injo pole ampa appauko mange ri bonto intu: Ta'bu'bu'ko na a'lette'ko mange ri tamparang! A'jari passala injo.

²² Apajua muera lalang dowaang surangang sisukku'na tappa'mu, tantu lamutarimana.”

Pakkuta'nang ripassala kahasana Isa 21:23-27

²³ Maeng injo Isa antama'i ri Sapo Allataala, na rihattunna Ia ngajara ri injo, riekimu imang ponggaha surang tutoa-toana Yahudi mange ri Ia, na akuta'nangi, ”Passabakang kahasa anteeang Kau anggeokang risikonjo passala intu? Inai assare kahasa ri Kau?”

²⁴ Appihali Isa mange ri iyai, ”Nakke laakkuta'nang todo'a mange ri kau na assareko pappihali mae ri Nakke, injo Nakke lappihali todo'a mange ri kau lalang kahasa anteeang Nakke anggeokang ripassala injo.

²⁵ Battu ri antee mae panriona Yahya? Battu ri Allataala iyareka battu ri rupatau?” Lalagarimu passala injo ritangnga-tangngana, na lakua, ”Ampa ripaui: Battu ri Allataala, Ia lalapaui mae ri ditte: Ampa appakonjo, ngura nageleko tappa' mange ri ia?

²⁶ Mingka ampa ripaui: Battu ri rupatau, malla'ki mange ri tau lohe inni, saba' sikuanna tau larapangi Yahya se'rei nabbi.”

²⁷ Jari appihali ngase'mu mange ri Isa, ”Gelei taisse'.” Appau todo'i Isa mange ri iyai, ”Ampa appakonjo, Nakke gele todo'i laKupau mange ri kau lalang kahasa anteeang Nakke anggeokang risikonjo passala inni.”

Pakkalebarang passala rua ana' 21:28-32

²⁸ ”Mingka anteekamua panguppamu ripassala inni: Rie' se're tau rua ana' bura'nena. Ia a'lampai mange ri ana' lihuana na lakua, Ana'ku, a'lampako na anjamako allo inni lalang ri koko anggoro.

²⁹ Pappihalinna ana' injo: Nakke gelea attua. Mingka maeng injo ia lasassala kalenna na a'lampai.

³⁰ Maeng injo a'lampai pole mange ri ana' bungkona na appakonjo todo' pauna. Appihali ana' injo: Baji'mu, Amma. Mingka ia gelejuai a'lampa.

³¹ Inaiang ri tau rua injo lageokang passuroanna ammanna?” Pappihalinnai, ”Tulihua injo.” Appaui Isa mange ri iyai, ”Sitoje'na Nakke appau mange ri kaui, palele ngowa na bahine bandarang injo la'bi rioloang ri kau antama' ri Pakkaraengang Allataala.

³² Saba' Yahya rie'i lalapappiissekangi pa'lalangang kanabaang mange ri kau, na kau gele tappa' mange ri ia. Mingka palele sima na bahine bandarang injo tappa'i mange ri ia. Manna injo muisse'i, mingka gele musassala kalemmu na gele todo'ko tappa' mange ri ia.”

Pakkalebarang passala ri koko anggoro 21:33-46

³³ ”Pilangngeri baji'i se're pakkalebarang maraeng. Rie' se're tau luara tampa'na nyungke koko anggoro na latondo'i siappuna. Akkekei balo tampa' pallessorang anggoro na ambaungi barumbarung pangahungang lalang ri kokonna. Maeng injo lapappisahalangi jamaang kokonna mange ripasahala, ampai a'lampa ri kampong maraeng.

³⁴ Sungka'i seppa'mo hattu panduruang bua anggoro, lasuromu sikonjo atanna mange ripasahala kokonna langalle hassele dahuanna.

³⁵ Mingka pasahala injo lajakkala ata injo: Se're tau larabungi, se're tau lahunoi na tumaraeng injo labundu'i batu.

³⁶ Maeng injo opuna koko lasuroi pole ata maraenna, la'bi lahoeang nanurioloang injo, mingka manna iyai ripakaassimpole todo'i uranna.

³⁷ Sa'genna ana'namo lasuro a'lampa mange ripasahala injo, lakua: Ana'ku lalakangalikangi.

³⁸ Mingka rihattu lajanjanna pasahala injo ana' injo, assamaturuki ngase'mu, lakua: Iamo inni tulaharisi'na, maemoko narihunoi, larialle kaharisanna.

³⁹ Lajakkalimu na lapamballungi ansulukang tondo', ampai lahunoi.

⁴⁰ Jari akkuta'nangi Isa, ampa battui opuna koko injo, apamo lalageokang mange ripasahala injo?”

⁴¹ Lakuaimo mange ri Isa, ”Ia lalahuno ngase'i tau daa injo geo'na na koko anggoro'na lalapappisahalangi ri tau maraeng, tulaassare injo hassele'na ampa larapi' hattunna.”

⁴² Appaui Isa mange ri iyai, ”Gelepaika minang muaji lalang ri Kitta' Tangkasa: Batu nulapela' injo tukang batu a'jarimu batu possi' sapo passala injo a'jari battu ri Karaeng Allataala se're panggeokang numasagala lajanjang matanta.

⁴³ Injomo saba'na, Nakke appau mange ri kaui ma'nassana Pakkaraengang Allataala larialle ri kaui na laripassareangi mange rise're tau maraeng nulaassare hassele nubaji' ri Pakkaraengang Allataala. [

⁴⁴ Na inai jua a'dappe' ri batu injo, latepo'i buku-bukunna na inai lataburi batu injo, laa'baru'bu'i.]”

⁴⁵ Sikonjo imang ponggaha na tau Farisi injo, rihattu lalangngere'na sikonjo pakkalebarang nulapau injo Isa, lapahangi ma'nassana iyaimo rikuangang.

⁴⁶ Jari assamturukimu lalajakkalai Isa, mingka malla'i ri tau lohe, saba' tau lohe injo larapangi Isa Nabbi.