MATIUS 20 - Kitta' Passitallikang Bau KAREBA BAJI'

Pakkalebarang ripassala tau assahala ri koko anggoro 20:1-16

¹ ”Passala Pakkaraengang Suruga assimpole se're tau rie' koko anggoro'na nungesala kalejuapa ansulu'mu a'boja tulanjama ri kokonna.

² Sungka'na ia assituru' pajama injo ripassala sahala'na sampulo sa'bu siallo, lasuromu mange ri koko anggoro'na.

³ Tette' kaassa ngesala ansulu'mu isse' na nguppai pole tau maraeng ri pasara tide' jamaanna.

⁴ Lakua mange ri iyai: A'lampai todo'ko mange ri koko anggoro'ku na apa nusiratang lakupassareang ri kau. Jari a'lampai toje'mu.

⁵ Tette' sampulorua na tette' tallu ri allona ansulu'i pole nalageokangi assimpole sumpae'.

⁶ Tette' lima rikarahie'na ansulu'mu isse' na anrumpa'i pole tau maraeng, jari lakua mange ri iyai: Ngura geleiko anjama ri inni siallo bujuru?

⁷ Lakuaimo mange ri ia: Saba' gele rie' tau lapisahalikang. Lakuamo mange ri iyai: A'lampai todo'ko mange ri koko anggoro'ku.

⁸ Sungka'i bangngi opuna koko injo appaui mange ri madoro'na: Keo' ngase'i mae sikonjo pajama na bajara sahala'nai, pakaramula ri iyai tau anjama kaminang riboko injo sa'genna ri tau anjama kaminang riolo injo.

⁹ Jari riekimu tau pakaramula injo anjama ri tette' limana na iyai injo narima tassampulona sa'bu.

¹⁰ Maenna injo antamaki tommoi tau kaminang riolo injo anjama, pa'ngare'nai languppai la'bi loheang, mingka manna iyai sampulo to'jua sa'bu latarimai.

¹¹ Rihattunna latarimai, a'moro-moroimu mange ri opuna koko,

¹² lakua: Iyai tau antama' kaminang riboko injo sijaang juai anjama na kau mupassimpole juakang nusiallo bujuru anjama terasa surang attingallo.

¹³ Mingka appihali opuna koko injo mange rise're tau battu ri iyai: Urang siana', tide'kale geo'ku nugele adele mange ri kau. Gelejua maeng assituru' muki sampulosa'bu siallo?

¹⁴ Allei dahuammu na a'lampako; nakke a'ra'i kupassareang mange ri tau kaminang riboko inni assimpole mange ri kau.

¹⁵ Gelejua a'ra'-a'ra'ku make ri anungku assituru' a'ra'na atiku? Iyareka siriatikoka, saba' lumui nyahaku?

¹⁶ Appakonjomu tau kaminang riboko injo laa'jari kaminang riolo na tau kaminang riolo injo laa'jari kaminang riboko.”

Pintallummu lapappiissekang passala rikasissaanna Isa 20:17-19

¹⁷ Rihattu laa'lampana Isa mange ri Yerusalem, Ia lakeo'i assa'la-sa'la sampuloiya rua suro-suroNa na appaui mange ri iyai rihattu attangnga lalanginna,

¹⁸ ”Konni-konnina laa'lampaki mange ri Yerusalem na Ana' Rupatau laripassarengi mange risikonjo imang ponggaha na risikonjo guru Tora', na iyaimo laassare hukkungang mate ri Ia.

¹⁹ Ia lalapassareangi mange ri tau maraeng, solanna Ia ritua-tuai, rirabung na risalli', mingka ri allo makatalluna Ia laattallasai muliang.”

Pangerana idonna Yakobus na Yahya Gele lamarenta mingka lanjampangi 20:20-28

²⁰ Maeng injo rie'mu bahinenna Zebedeus surang ana'-ana'na mange ri Isa, ampai joppa' ri a'rakanNa langera se're passala ri Ia.

²¹ Appaui Isa, ”Apa mukaa'raki?” Pappihalinna, ”Sarelalo parenta, solanna ruaiya inni ana'ku akkulle attolong sallo' lalang ri PakkaraenganTa, sitau rikananTa na sitauang rikairinTa.”

²² Mingka appihali Isa, lakua pauNa, ”Gele muisse' apa muera? Akkullejuako laminahang rikasissaang, nuparallu injo laKuuppa?” Lakuaimo mange ri Ia, ”Akkullekang.”

²³ Appaui Isa mange ri iyai, ”Toje'i laminahangimmu rikasissaang laKupisa'ringi injo, mingka passala attolong risa'ri kanangKu iyareka risa'ri kairingKu, tide' pakkulleKu laassare. Injo laripassareangi mange risikonjo tumaeng lapasadiaang injo AmmangKu.”

²⁴ Lalangngere'na injo kukukimu suro-suro sampulo injo mange ri ruaiya tuassiana'.

²⁵ Mingka Isa lakeo' ngase'i ampai appau, ”Muisse'i ma'nassana sikonjo pamarenta ri lino laparenta taunna, na sikonjo ponggaha lapalingka terasa kahasana ri iyai.

²⁶ Gelei appakonjo ri kaui. Inai jua a'ra' a'jari bakka' ri kaui, ia parallui a'jari pajampangimmu,

²⁷ na inai jua a'ra' ripakala'biri ri kau ia parallui a'jari atammu;

²⁸ assimpole Ana' Rupatau rie'i mae ri lino gele larijampangi, mingka lanjampangi na lalapassareangi nyahaNa a'jari pallappasi kadorakaang ri tau lohe.”

Isa appakaanjanjang rua tau buta 20:29-34

²⁹ Rihattunna Isa surang ana'-ana' gurunNa ansulu' battu ri Yerikho, lohemo tau a'rurung-rurung minahang ri Ia.

³⁰ Rie' rua tau buta attolong ri biring lalang lalangngere ma'nassana Isa lumalo, jari a'nga'ngarimu, ”Karaeng, Ana' Daud, kamaseanglalokang!”

³¹ Mingka appisangka tau lohe injo solanna sannangi. Mingka pela' bakka' sa'rannai a'nga'ngara, ”Karaeng, Ana' Daud, kamaseangkang!”

³² Jari attaangi Isa na lakeo'i. Akkuta'nangi, ”Apa mukaa'raki laKugeokangi mange ri kau?”

³³ Pappihalinnai, ”Karaeng, solanna akkulle anjanjang matamba.”

³⁴ Jari rie'mo ri atina Isa ripangamaseang mange ri iyai, Ia lakaraha matannai na rihattu injo toje' jua anjanjangimu matanna jari minahangi ri Ia.