MATIUS 15 - Kitta' Passitallikang Bau KAREBA BAJI'

Parenta Allataala na kabiasaanna tau Yahudi 15:1-20

¹ Maeng injo rie'mo lohe tau Farisi na guru Tora' battu ri Yerusalem mange ri Isa na appaui,

² ”Ngura ana'-ana' gurumMu gele ngalleangang rikabiasaanna puwa-puwata? Gele labissai limanna ampa langanre.”

³ Mingka appihali Isa mange ri iyai, ”Ngura manna kau gele ngalleangang ri Parentana Allataala rikanara kabiasaanna puwa-puwamu?

⁴ Saba' Pauna Allataala: Pakala'biri ammammu surang idommu; na lakua pole: Inai latunrai ammanna iyareka idonna tantu larihukkung matena.

⁵ Mingka mukua: Inai jua appau mange ri ammanna iyareka ri idonna: Sikonjo sokongang nuparallu injo mutarima battu ri nakke iamo injo passidakka mange ri Allataala,

⁶ tau injo gelemu siratang lapakala'biri ammanna iyareka idonna. Ri appakonjona, Pauna Allataala murapangi tide' matu-matunna saba' rikabiasaammu to'jua.

⁷ Oe tau munape'! Toje'i panjanjanna Nabbi Yesaya ripassala'mu:

⁸ Bangsa inni appakala'biri ri Nakke surangang babana, mingka atina derei battu ri Nakke.

⁹ Tide' jua matu-matunna iyai assambajang mae ri Nakke, saba' ajarang nulapangajarangi injo iamo intu parenta rupatau.”

¹⁰ Jari Isa lakeo'i tau lohe injo na appaui mange ri iyai,

¹¹ ”Pilangngeri na pina'na'lalo: gele nuantama' injo ri baba appakaharang tau, passangadinna nuansulu' injo battu ri baba, iamo injo appakaharang ri tau.”

¹² Maeng injo riekimu ana'-ana' gurunNa na akkuta'nangi mange ri Ia, ”Muisse' juai ma'nassana pauMu injo appakapa'risimu nyaha ri tau Farisi?”

¹³ Pappihalinna Isa, ”Sikonjo lamung-lamung nugele injo rilamung ri AmmangKu nurie' injo ri Suruga laribu'bu'i surangang aka'-aka'na.

¹⁴ Akomo jampangi iyai injo. Iyai injo tau buta anrenreng ri paranna tau buta. Ampa tau buta anrenreng riparanna tau buta, tantu a'dappekinna naung ri balo.”

¹⁵ Jari akkuta'nangi Petrus mange ri Ia, ”Seseilalo pakkalebarang injo mae ri kambe.”

¹⁶ Pappihalinna Isa, ”Apa manna kau, gelepai mupahang?

¹⁷ Gelepai muisse' ma'nassana sikuanna nuantama' ri baba naungi ri pompong maeng injo ritaiangi?

¹⁸ Mingka apa nuansulu' battu ri baba assala'na nubattu ri ati na iamo injo appakaharang ri tau.

¹⁹ Saba' battu ri ati ammumba sikuanna pikkirang daa, pamunoang, passangkilang, kabalerang, pa'lukkakang, tunra bura na pattadea.

²⁰ Passala innimo appakaharang ri tau. Mingka nganre gele injo a'bissa lima gelei appakaharang ri tau.”

Bahine Kanaan tappa' 15:21-28

²¹ Maeng injo a'lampai Isa battu ri injo na mangei ri kampong Tirus na Sidon.

²² Jari rie'mo se're tau bahine Kanaan battu ri kampong injo na a'nga'ngarai, ”Kamaseanga, oe Karaeng, Ana' Daud, saba' ana' bahineku lapantamai setang na sanna'i sissana.”

²³ Mingka Isa gele lapihalii. Jari mangemu suro-suroNa na laerai mange ri Ia, ”Surolaloi a'lampa, ia minahangi riditte na akkari'-kariu'i.”

²⁴ Appihali Isa, ”Nakke risuro sangga lamange jua risikonjo jimbala tappela' ri umma' Israele.”

²⁵ Mingka pela' seppa'i bahine injo na nyombai ri Ia ampai appau, ”Karaeng, tulunglaloa.”

²⁶ Mingka pappihalinna Isa, ”Gelei siratang langalle roti nuripakasadiaang injo mange ri ana'-ana' na ripabuangi mange ri asu.”

²⁷ Lakua bahine injo, ”Toje'i Karaeng, mingka asu injo nganre baru'bu' kanre nua'dappe' ri mejang panganreang opuna.”

²⁸ Jari appaui Isa mange ri ia, ”Oe idong, bakka' tappa'mu, a'jarimu ri kau assimpole numukaa'raki injo.” Rihattu injo jua sikali gassimmu ana'na.

Isa appakagassing lohe tau garring 15:29-31

²⁹ Sungka'i labokoi kampong injo, Isa attete biring bone ri tamparang la'ba Galilea na nai'i ri baho bonto ampai attolong ri injo.

³⁰ Maeng injo lohemo tau a'rurung-rurung mange ri Ia ngerang tau pesu', tau kempang, tau buta, tau pepe, na lohe pole tau garring maraeng, ampai lataro riampi' bangkenna Isa na Ia lapakagassing ngase'i.

³¹ Jari takkajanna' ngase'i tau lohe injo rilajanjanna tau pepe akkulle appau, tau kempang baji' pa'lingkana, tau pesu' akkulle ammenteng, tau buta akkulle anjanjang, na iyai injo appakala'biri Allataalana Israele.

Isa appakanre patansa'bu tau. 15:32-39

³² Maenna injo Isa lakeo' ana'-ana' gurunNa na appaui, ”Tasseru nyahaKu ripangamaseang mange ri tau lohe intu. Tallungallomu minahangi ri Nakke na tide' kanrena. Gele Kupa'biangi lamuliang ampa pa'rei, barang sikali daa nyahanai ritangnga lalang.”

³³ Appaumu suro-suroNa mange ri Ia, ”Anteekamua ri tampa' tassa'la'-sa'la' inni languppa roti laripakanreangi tau sanna' intu lohena?”

³⁴ Appaui Isa mange ri iyai, ”Sikurambatu roti rie' ri kaui?” ”Tujumbatu,” pappihalinna, ”na rie' todo' sikurangkaju juku' ki'di'.”

³⁵ Jari Isa lasuroi tau lohe injo attolong ri tana.

³⁶ Maeng injo Ia laalle tujumbatuiya roti surang juku' ki'diki injo, masa barakka'i, latu'be-tu'bei na lapa'dahu-dahuangi mange ri suro-suroNa, na suro-suroNamo lapa'dahu-dahuangi mange ri tau lohe injo.

³⁷ Nganre ngase'i sa'genna bassoro. Maeng injo lapaparappummu tau sikonjo roti la'binna, tujumbaku' rassi lohena.

³⁸ Tuminahang nganre patansa'bu tubura'ne, gelepai antama' tubahine surang ana'-ana' injo.

³⁹ Maeng injo Isa lasuromu tau lohe injo muliang. Ia nai'i ri lopi ampai a'lampa mange ri tana Magadan.