MATIUS 14 - Kitta' Passitallikang Bau KAREBA BAJI'

Yahya Pario rihuno 14:1-12

¹ Rihattu injo ambattumu karebana Isa mange ri Herodes, karaeng ri tampa' injo.

² Jari ia appau mange risikonjo pagahena, ”Iamo inni Yahya Pario; ia attallasai muliang battu rikamateang na iamo injo saba'na kahasa injo a'geo'i lalang ri Ia.”

³ Toje'i Herodes maeng lasuro lajakkalai Yahya, lasangkalai na latarungkui, ripassala kajariang Herodias, bahinenna Filipus uranna siana'.

⁴ Saba' Yahya akuling-kulingi lato'ro, pauna, ”Gele akkulle mualle Herodias!”

⁵ Manna injo Herodes a'ra'i lahuno, ia malla'i ri tau lohe larapang injo Yahya se're nabbi.

⁶ Mingka rihattu attamma taunna Herodes, attari-tariammu ana' bahinena Herodias ri a'rakanna tau lohe injo na lapakarannu nyahana Herodes,

⁷ sa'genna Herodes assapatta lassare mange ri ia apajua laera.

⁸ Sungka'i rioso' ri idonna, ana' bahine injo appau, ”Erangi mae ri nakke ulunna Yahya Pario lalang rise're dulang.”

⁹ Jari simpummu nyahana karaeng injo saba' sapattana na kanara toananna jari lapassuroammu laripassareang mange ri ia.

¹⁰ Lasuro pappa'mu ulunna Yahya ri pattarungkuang

¹¹ na ulunna laerangi tau lalang rise're dulang bakka', ampai ripassareang mange ri ana'rara injo na ia laerangi mange ri idonna.

¹² Maeng injo rie'mu ana'-ana' gurunna Yahya Pario laalle batangkalenna na laloangangi. Jari a'lampa ngasekimu lapappiissekangi mange ri Isa.

Isa assare kanre limansa'bu tau 14:13-21

¹³ Sungka'i Isa lalangngere kareba injo Ia a'lilimu battu ri injo, na a'ra'i akkale-kale ri lopi mange ri tampa' tassa'bu-sa'bu. Mingka tau lohe injo laisse'i na minahangi ri Ia a'lingka battu ri se're kota mange ri kota maraeng.

¹⁴ Rihattunna rampe Isa, Ia anjanjangi tau lohe bakka' jumallana, jari rie'mo ri atiNa pangamaseang mange ri iyai na Ia lapakagassing ngase'i tau garring injo.

¹⁵ Sungka'i labangngi, suro-suroNa rie'i mange ri Ia na appaui, ”Tampa' inni sino na a'birimmu bangngi. Surolalo tau lohe intu a'lampa solanna iyai akkulle ammalli kanre ri desa-desa.”

¹⁶ Mingka appaui Isa mange ri iyai, ”Gele parallu iyai intu a'lampa, kau parallu assare kanre ri iyai.”

¹⁷ Appaihali ngase'mu, ”Nurie' ri kambe ri inni limambatu jua roti na ruangkaju juku'.”

¹⁸ Appaui Isa, ”Erangi mae ri Nakke.”

¹⁹ Maeng injo Ia lasuro tau lohe injo attolong ri ruku'. Ri laalleNa roti limambatu na juku' ruangkaju injo, ammongai Isa nai' ri langi' na masa barakka'i. Ia latu'be-tu'be roti injo na lapassareangi ri suro-suroNa, jari suro-suroNamo lapa'dahu-dahuangi mange ri tau lohe injo.

²⁰ Iangase'na nganre sa'genna bassori. Maeng injo laparrapungi tau roti la'binna, lohena sampulorua baku' rassi.

²¹ Tuminahang larie'i limansa'bu tau bura'ne, gelepai rirekeng tau bahine na ana' ki'di' injo.

Isa a'lingka ri baho ere 14:22-33

²² Rimaenna injo Isa lasuro lassiri suro-suroNa nai' ri lopi na a'lampa riolo ri Ia anta'leang. Rihattu injo Ia lasuro ngase'i tau lohe injo muliang.

²³ Sungka'i lasuromo tau lohe injo muliang, Isa nai'i ri baho bonto langera dowaang kale-kalenna. Rilabangnginamo, Ia kale-kalenna ri injo.

²⁴ Lopinna suro-suroNa deremu battu ri biring bone na laembo-emboammu bombang, saba' anging battu ri a'rakang.

²⁵ Latette' tallu ribangngi injo rie'mu Isa a'lingka bangkeng ribaho ere mange ri iyai.

²⁶ Rihattunna suro-suroNa lajanjangi Isa a'lingka ribaho ere, ta'bangkaimu na a'gora, ”Setang intu!”, ampai akkari'-kariu' kanara malla'.

²⁷ Mingka lassiri appau Isa mange ri iyai, ”Sannangko! Nakke inni, ako malla'!”

²⁸ Jari appaui Petrus mange ri Ia, ”Karaeng, ampa Kau intu, surolaloa battu mange ri Kau a'lingka ri baho ere.”

²⁹ Appaui Isa, ”Maemoko!” Jari naummu Petrus ri lopi injo na a'lingkai ri baho ere laruppai Isa.

³⁰ Mingka rihattu lapisa'rinna anging ammarrisi injo, malla'mu na pakaramulamu tallang jari a'gorai, ”Karaeng, allea!”

³¹ Lassirimu Isa lapatanjo limanNa, latetengi Petrus na appaui, ”Oe tau kurang tappa', ngura bata-batako?”

³² Maeng injo naikimu ri lopi na a'jari luba'mu anging injo.

³³ Sikuanna tau rie' ri lopi nyomba ri Ia, lakua, ”Sitoje'na Kau Ana' Allataala.”

Isa appakagassing tau garring ri Genesaret 14:34-36

³⁴ Sungka'i ambattumo anta'leang mangeimu ri Genesaret.

³⁵ Sungka'na Isa riisse' ri tau lohe ri tampa' injo, iyai injo lapappissekangi risikuanna tau rie' ri tampa' injo. Lohemo tau garring rierang mange ri Ia.

³⁶ Iyai injo laerai mange ri Ia solanna ripa'biang manna sangga laseruna jua rombe-rombe baju bakka'Na. Sikuanna tau laseru injo a'jari gassing ngase'i.