MATIUS 12 - Kitta' Passitallikang Bau KAREBA BAJI'

Ana'-ana' gurung ngattili bae gandong ri allo Passambajangang 12:1-8

¹ Rihattu injo, ri allo Passambajangang, Isa a'lingka ritangnga koko bae gandong. Saba' pa're, ana'-ana' gurunNa ngattili bullere bae gandong na lakanre.

² Lajanjanna injo, appauimu tau Farisi injo mange ri Ia, ”Janjangimu, ana'-ana' gurumMu anggeokangi nurikapallikang ri allo Passambajangang.”

³ Mingka pappihalinna mange ri iyai, ”Geleka maeng muaji apa nulageokang injo Daud, rihattunna ia na tau minahang injo ri ia kapa'reang,

⁴ anteekamua ia antama' ri Sapo Allataala na anteekamua iyai injo nganre roti nukapalli' ri kanre, baji' mange ri ia iyareka ri iyai tuminahang injo ri ia, passangadinna imang jua akkulle nganre?

⁵ Iyareka gelei minang muaji lalang ri kitta' Tora' ma'nassana ampa allo Passambajangang, sikonjo imang gele ngalleangang ri hukkung Passambajangang lalang ri Sapo Allataala, mingka gele sala?

⁶ Nakke appau mange ri kaui: Ri inni rie' nula'bi ri Sapo Allataala.

⁷ Ampa toje'i muissekinna battuanna pau inni: NuKukaa'raki iamo intu pangamaseang na gele passidakka, tantu gelemu assare hukkungang mange ri tau gele injo sala.

⁸ Saba' Ana' Rupatau iamo Karaeng ri allo Passambajangang.”

Isa appakagassing tau ri allo Passambajangang 12:9-15a

⁹ Sungka'i a'lampa battu ri injo, Isa antama'i ri sapo passambajangannai.

¹⁰ Ri injo rie' se're tau mate sihali limanna. Akkuta'nang ngase'i mange ri Ia, ”Akkullekika appakagassing tau ri allo Passambajangang?” Pattujunnai iamo intu solanna akkulle appassala ri Ia.

¹¹ Mingka appaui Isa mange ri iyai, ”Ampa rie' se're tau ri kau intu rie' sikaju jimbala'na na jimbala injo a'dappe'i naung ri balo ri allo Passambajangang, geleika ia laalle na lapanai'i?

¹² Gelejua rupatau la'bi loheang anggaranna battu ri jimbala injo? Injomo saba'na, akkulle anggeokang nubaji' ri allo Passambajangang.”

¹³ Jari appaui Isa mange ri tau mate sihali injo limanna, ”Patanjo limammu!” Jari lapatanjomu limanna tau injo, molemu limanna injo na a'jari baji'mu assimpole lima sihalina.

¹⁴ Jari ansulukimu tau Farisi injo na a'naha-nahai lalahuno Isa.

^15a Mingka Isa latarrusu pattujunna jari a'lampai battu ri injo.

Isa Ata Allataala 12:15b-21

^15b Lohe tau minahang ri Isa na Ia laapakagassing ngase'i.

¹⁶ Ia sanna' pappisangkana ri iyai laappala'bang Ia inai,

¹⁷ solanna ripa'rupa pau nulapabattu injo Nabbi Yesaya,

¹⁸ ”Janjangimu, intu AtangKu nuKupile, nuKukamaseang, numange ri Ia angngai nyahaKu. Nakke lanaro nyahaKu mange ri Ia, na Ia lalapappisa'biang kaadelang mange risikonjo bangsa.

¹⁹ Ia gele langgaga na gele lakkariu' na gele lalangngere tau sa'ranNa risikonjo pa'lalangang.

²⁰ Bulo lappa' Ia gele lapitappuki, na sumbu kanjoli lamma injo bola'na Ia gele lalahuno, sa'genna Ia lapaa'jari ambeta hukkung inni.

²¹ Na mange ri Iamo sikonjo tau maraeng lanaro pattajalliang.”

Isa na Beelzebul 12:22-37

²² Maeng injo rierammu mange ri Isa se're tau lataba setang. Tau injo buta na bongolo, jari Isa lapakagassingi, sa'genna tau bongolo injo appau-pau na anjanjangi.

²³ Jari takkajanna' ngase'i tau lohe injo, lakua, ”Ia inni assimpole Ana'na Daud.”

²⁴ Mingka rihattu lalangngerinna tau Farisi injo, appauimu, ”Passabakang Belzeebul, ponggaha setang, Ia angga'gara setang.”

²⁵ Mingka Isa latarusu pikkiranna jari appaui mange ri iyai, ”Sikonjo pakkaraengang ta'bage-bage tantu panra'na na sikonjo kota iyareka pakkalabiniang ta'bage-bage tantu gelena akkulle attahang.

²⁶ Appakonjo todo'i ampa Ibilisi angga'gara Ibilisi, manna ia ta'bage-bage todo'i na kalenna to'jua labaliang; anteekamua laattahang pakkaraenganna?

²⁷ Jari, ampa Nakke angga'gara setang surangang kahasa Belzeebul, surangang kahasanamo inai tuminahang injo ri kau lapake angga'gara ri ia? Injomo saba'na, iyaimo laa'jari tulangadelimmu.

²⁸ Mingka ampa Nakke angga'gara setang surangang kahasa Nyaha Allataala, injo sitoje'na Pakkaraengang Allataala gelemu dere ri kaui.

²⁹ Iyareka anteekamua tau inni akkulle antama' ri saponna se're tau sa'ga' na laalle pa'barang-baranganna ampa gele lasokke' la'bi riolo tau sa'ga' injo? Maempai lasokke' ampamu ia akkulle lalukkaki sapo injo.

³⁰ Inai gele a'urang ri Nakke, ia a'bali ri Nakke na inai gele apparappung surangang Nakke, ia appassiassiara.

³¹ Injomo saba'na, Nakke appau mange ri kaui: Sikuanna kadorakaang na pattadea mange ri Nyaha Tangkasa gele akkulle ri ampungi.

³² Ampa rie' se're tau appau se're passala labaliangi Ana' Rupatau, ia lariampungi, mingka ampa ia appau labaliang Nyaha Tangkasa, ia gele lariampungi, ri lino inni gele, na ri lino labattu injo sallo' gele todo'i.

³³ Ampa se're poong kaju murapang baji', injo baji' todo'i buana; ampa se're poong kaju murapang daa, injo daa todo'i buana. Saba' battu ri buana poong kaju inni ri isse'.

³⁴ Oe kau pinangka' saa moso, anteekamua kau akkulle appau passala nubaji', na kau to'jua daa? Saba' nulapau inni baba ansulu'i battu ri ati.

³⁵ Tau baji' inni appasulu'i passala nubaji' battu panaroang baji'na na tau daa intu sipa'na appasulu'i passala nudaa battu ripanaroang daana.

³⁶ Mingka Nakke appau mange ri kaui: Sikuanna pau tide' injo matu-matunna nulapau tau injo parallu ritanggongjawaki ri allo pangadelang.

³⁷ Saba' assituru' paumu kau ripa'naba, na assituru' todo' paumu kau larihukkung.”

Tanra Yunus 12:38-42

³⁸ Rihattu injo lohemo guru Tora' na tau Farisi appau mange ri Isa, ”Guru, kambe a'ra'i tajanjang se're tanra battu ri Kau.”

³⁹ Mingka Ia appihali mange ri iyai, ”Tau konni-konni daa sipa'na surang gele mallang a'bojai se're tanra. Mingka manna se're gele larisare tanra mange ri iyai passangadinna tanra ri Nabbi Yunus.

⁴⁰ Saba' assimpole Yunus ammari lalang ri pompong juku' bakka' tallu allo tallu bangngi, appakonjo todo'i Ana' Rupatau laammari lalang ri pomponna tana inni tallu allo tallu bangngi.

⁴¹ Rihattu pangadelang, sikuanna tau Niniwe laammenteng assurang-surang tau konni-konni na langadeli todo'i. Saba' sikuanna tau Niniwe jarra ngase'i rimaenna lalangngere pappauna Yunus, sitoje'na ri inni rie' tula'bi battu ri Yunus!

⁴² Rihattu pangadelang injo, karaeng bahine battu rateang injo laammenteng assurang-surang tau konni-konni na ia langadeli todo'i. Saba' karaeng bahine injo rie'i battu riappa'na lino laappilangngeri pangisse'na Suleman na sitoje'na ri inni rie' tula'bi battu ri Suleman!”

Pamulianna setang injo 12:43-45

⁴³ ”Ampa rie' setang ansulu' rise're tau, ia injo a'lambarai mange-mange ri tampa' apparang a'boja pammariang. Mingka ia gele nguppa.

⁴⁴ Jari ia appau: Nakke lamuliang mange ri sapo numaeng kubokoi injo. Jari ia a'lampai na larumpa' sapo injo tide' assinna, tangkasa na baji'mu atoro'na.

⁴⁵ Jari ia asulu'i na akkeo'i tuju setang maraeng nula'bi sarroang daana battu ri ia na iyai injo antama' ri sapo na ammari ri injo. Kamaenganna, tau injo pela' daamu battu ri uruna. Appakonjo todo'i lakajanjangang ri tau daa inni.”

Isa na uranNa siana' 12:46-50

⁴⁶ Rihattu a'bisarana juapa Isa surangang tau lohe injo, idonNa na uranNa siana' rie'i ammenteng pantarang na a'ra'i laurang assijanjang Isa.

⁴⁷ Jari rie'mo se're tau appau mange ri Ia, ”Janjammu, idomMu na uramMu siana' rie'i pantarang na a'ra'Ko laurang assijanjang.”

⁴⁸ Mingka appihali Isa mange ri tau appabattu injo pasang ri Ia, ”Inai idongKu? Inai urangKu siana'?”

⁴⁹ Jari lakua pauNa, ampai a'jo'jo' mange ri ana'-ana' gurunNa, ”Iamo inni idongKu na urangKu siana'!

⁵⁰ Saba' inai jua anggeokang a'ra'na AmmangKu ri suruga, iamo urangKu siana' bura'ne, urangKu siana' bahine na idongKu.”