MATIUS 10 - Kitta' Passitallikang Bau KAREBA BAJI'

Isa akkeo' sampulorua ana' gurung 10:1-4

¹ Isa lakeo' sampuloiya rua suroNa na assare kahasa mange ri iyai langga'gara setang na laappakagassing tau battu risikuanna garring-garring na kalammaang.

² Iamo inni arenna suro sampulorua injo: Makase're, Simon turiang injo Petrus na Andreas uranna siana', na Yakobus ana'na Zebedeus surang Yahya uranna siana',

³ Filipus na Bartolomeus, Tomas na Matius palele sima, Yakobus ana'na Alfeus, na Tadeus,

⁴ Simon tau battu ri Zelot na Yudas Iskariot tua'bali' ballang injo ri Ia.

Isa assuro ri sampulorua injo suro 10:5-15

⁵ Sampuloiya rua suro-suro risuro ri Isa na Ia appasang mange ri iyai, ”Akolalo a'lili mange ri pa'lalanganna tau maraeng iyareka antama' ri kota tau Samaria,

⁶ passangadinna a'lampako mange ri jimbala tappela' battu ri umma' Israele.

⁷ A'lampako na pala'bangi: Pakkaraengang Suruga gelemu dere.

⁸ Pakagassinglalo tau garring injo; pakaattallasai tau mate injo; pakamole tau kattakang injo; ga'garai sikonjo setang. Maeng muuppa ngase'mu nagelejua muhalli, injomo saba'na passareang todo'i nagele lahalli.

⁹ Akolalo ngerang bulaeng iyareka salaka, iyareka benggolo lalang ripanga'ba' aja'mu.

¹⁰ Akolalo ngerang purukang pamunaang bokong ripa'lingkaammu, akolalo ngerang ruallahara baju, sandala iyareka tukkang, saba' se're tau pajama siratangi lauppa sahala'na.

¹¹ Ampa antamakiko ri kota iyareka ri desa, bojalalo ri injo se're tau nusiratang na ammariko ri ia sa'gemmu a'lampai.

¹² Ampa antama'ko rise're saponna tau, assareko barasallang mange ri iyai.

¹³ Ampa iyai injo latarimai, barasallammu injo naungi mange ri iyai, ampa gele, barasallammu injo muliangi mange ri kau.

¹⁴ Ampa rie' tau geleko latarima na gele lapilangngeri paumu, ansulu'laloko na bokoi saponna iyareka kota injo na pabe'besei limpuranna battu ri bangkemmu.

¹⁵ Sitoje'na Nakke appau mange ri kaui: Rihattu pangadelang tana Sodom na Gomora lala'bi ringangang hukkunganna battu ri kota injo.”

Passissa nularie' injo na pangakuang ri Isa 10:16-33

¹⁶ ”Janjangi, Nakke assuro ri kaui assimpole jimbala mange ritangnga-tangngana asu borong, injomo saba'na paralluko sara'de' assimpole saa na baji' assimpole bangkeng bodo.

¹⁷ Mingka tutuko mange risikuanna tau; saba' rie' tulalapassareangko mange ri pangadelang agama na iyai injo lanrabung ri kau ri sapo passambajanganna.

¹⁸ Kanara Nakke, kaui lariparapa' mange ri a'rakanna sikuanna tukahasa na pamarenta assimpole se're passa'bi mange ri iyai na mange risikuanna tau gele injo tappa' ri Allataala.

¹⁹ Ampa iyai injo lapassarreangko, akolalo bata-bata ripassala anteekamua na apa nuparallu lamupau, saba' iangase'na injo ripassareangi mange ri kaui rihattu injo jua.

²⁰ Saba' gele kau appau-pau, mingka Nyaha Ammammu; Ia laappau-pau lalang ri kau.

²¹ Se're urang siana' lalapassareang uranna siana' larihuno, appakonjo todo'i se're amma mange ri ana'na. Ana' lamaronta' mange ri tau toana na lalahuno ngase'i.

²² Larikali'kingangko risikuanna tau kanara arengKu; mingka tau attahang injo sa'genna rikala'busanna lasalama'i.

²³ Ampa iyai injo nyissa ri kau lalang rise're kota, a'lampako mange ri kota maraeng; saba' sitoje'na Nakke appau mange ri kaui: Rigelenapa la'bang mubattui sikonjo kota ri Israele, Ana' Rupatau rie'mu.

²⁴ Se're ana' gurung gele la'bi battu ri anrong gurunna, iyareka se're ata la'bi battu ri tau ngatainna.

²⁵ Ganna'mu rise're inni ana' gurung ampa ia a'jari assimpole anrong gurunna na rise're inni ata ampa ia a'jari assimpole tau ngatainna. Ampa opuna sapo riare' Belzeebul, la'bipa pole assinna sibatu sapo.

²⁶ Jari, akolalo malla' mange ri iyai, saba' gele rie' manna se're nutattongko' lagele ribungkara, na gele rie' manna se're nutassa'bu lagele ripappiissekang.

²⁷ Apa Kupau mange ri kaui lalang rikalammang, lagarai injo lalang ri tampa' sinara; na apa nuribisi' mange ri tolimmu, pappiissekangi injo battu rate ripa'buhungang sapo.

²⁸ Akolalo malla' mange ri iyai tuakkulle injo muno batangkale, mingka tide' kahasana lamuno nyaha; malla'laloko mange ri Ia tukahasa injo lamuno baji' nyaha iyareka batangkale lalang ri naraka.

²⁹ Gelejua dongi' intu ribalukangi ruangkaju silahara doe' ki'di'? Mingka, manna sikaju gelerie' a'dappe' naung ri tana pantarang ria'ra'na Ammammu.

³⁰ Na kau, manna uhu' ri ulummu ta'rekeng ngase'i.

³¹ Injomo saba'na, akolalo malla', saba' kau la'bi riekang anggaranna battu ri dongi' lohe injo.

³² Sikuanna tau ngani ri Nakke ri a'rakang rupatau, Nakke langani todo' ri ia ri a'rakanna AmmangKu ri suruga.

³³ Mingka inai jua a'boko ri Nakke ri a'rakanna rupatau, Kubokoi todo'i ri a'rakanna AmmangKu ri suruga.”

Isa ngerang passisala pahangang Anteekamua minahang ri Isa 10:34–11:1

³⁴ ”Akolalo a'ngare' ma'nassana Nakke rie' mae langerang dame ri bahonna lino inni; Nakke rie' mae gele langerang dame, mingka pa'dang.

³⁵ Saba' Nakke rie' mae lappassisa'la' tau battu ri ammanna, ana' bahine battu ri idonna, ana' mintu bahine battu ri matoang bahinena,

³⁶ na balinna tau inni iamo intu tau assinna saponna.

³⁷ Inai jua ngamaseang ri amma iyareka ri idonna la'bi battu ri Nakke, ia gele siratang ri Nakke; na inai jua ngamaseang ri ana' bura'nena iyareka ri ana' bahinena la'bi battu ri Nakke, ia gelei siratang ri Nakke.

³⁸ Inai jua gele lasompo salli'na na minahang ri Nakke, ia gelei siratang ri Nakke.

³⁹ Inai jua lakakutui nyahana, ia latappela' nyahana, na inai jua tappela' nyahana kanara ri Nakke, ia lauppai muliang.

⁴⁰ Inai jua anruppai ri kau, ia anruppai ri Nakke, na inai jua anruppai ri Nakke, ia anruppai Ia tuassuro injo ri Nakke.

⁴¹ Inai jua anruppai se're nabbi assimpole nabbi, ia lanarima passahalang nabbi, na inai jua anruppai tau naba, ia lanarima passahalang tau naba.

⁴² Inai jua assare ere inung manna se're jua galasi mange risala se'renna tau ki'di' inni, saba' ia ana' gurungKu, sitoje'na Nakke appau mange ri kaui: Ia gele latappela' passahalanna.”