MARKUS 9 - Kitta' Passitallikang Bau KAREBA BAJI'

¹ Lakua pole pauNa mange ri iyai, ”Sitoje'na Nakke appau mange ri kaui, turie' injo ri inni rie' tulagele mate ampa gelepai maeng lajanjang ma'nassana rie'mu Pakkaraengang Allataala surangang kahasa.”

Isa ripakala'biri rate ri baho bonto 9:2-13

² Annangallo maenna injo Isa laurangi Petrus, Yakobus na Yahya na assurangi nai' ri bonto langkasa. Ri injo iyai jua. Maenna injo appinra tappana Isa ri a'rakang matanna,

³ na baju bakka'Na pute a'billa'i. Tide' manna se're tau pasassa ri lino inni akkulle appakapute pakeang assimpole injo.

⁴ Jari kajanjangammu ri iyai Elia surangi Musa, ruaiya allagara Isa.

⁵ Lakua Petrus mange ri Isa, ”Guru, sukku' baji'na rie'ki ri tampa' inni. Baji'i ampa ambaungkang tallu barumbarung, se're dahuamMu, se're dahuanna Musa na se're pole dahuanna Elia.”

⁶ Ia gele laisse' apa nuparallu lalapau, saba' sarro mallakinna.

⁷ Sikalinna rie'mo salihu' ladohungi na battu ri salihu' injo rie' sa'ra kalangngerang, ”Iamo inni Ana'Ku turikamaseang, Iamo mupilangngeri.”

⁸ Sikalinna rihattu latangarinna risiappuna, gelemu anjanjangi manna se're tau uranna, passangadinna Isamamo kale-kalenNa.

⁹ Rihattu naunginnamo battu ri bonto injo, appasangi Isa mange ri iyai, solanna gelei lalagara manna mange ri inai jua ripassala numaeng injo lajanjangi, rigelenapa Ana' Rupatau attallasa muliang battu rikamateang.

¹⁰ Lateteng jarreki pappasang injo mingka lalagarii apa lakuangang Isa ”attallasa muliang battu rikamateang.”

¹¹ Jari akkuta'nangimu mange ri Isa, ”Ngura sikonjo guru Tora' appau ma'nassana Elia parrallu larie' la'bi riolo?”

¹² Pappihalinna Isa mange ri iyai, ”Toje'i Elia larie' la'bi riolo na lalapakabaji'i sikuanna. Injojua, anteekamua nurie' injo ta'ukiri ripassala'na Ana' Rupatau ma'nassana Ia lasanna' sissaNa surang laritua-tuai?

¹³ Mingka Nakke appau mange ri kaui: Toje'i Elia rie'mu na tau inni labuaki juai assituru' anteekamua a'ra'nai, assituru' rie' nuta'ukiri ripassala'Na.”

Isa ambongka setang battu rise're tau pepe 9:14-29

¹⁴ Rihattunna Isa, Petrus, Yakobus surang Yahya muliangimo mange ri ana'-ana' gurung maraeng injo, lajanjangimu lohe tau ladomungi ana'-ana' gurung injo, na rie' todo' sikura guru Tora' assare pakkuta'nang ri iyai.

¹⁵ Rihattunna tau lohe injo lajanjangi Isa, takkajanna' ngase'mu ampai mange laruppai Isa.

¹⁶ Jari akkuta'nangi Isa mange ri iyai, ”Apa mupakkuta'nangangi?”

¹⁷ Rie'mo se're tau battu ri tau lohe injo appihali, ”Guru, kuerangi ana'ku inni mange ri Kau, saba' ladongkoki setang na lapakapepei.

¹⁸ Ampa setang injo rie' ri ia, setang injo lapatappasai naung ri tana; jari a'busa-busamu babana, a'reku' giginna na ngojo kalenna. Maemmu kuerang mange ri ana'-ana' gurumMu, solanna labongkai setang injo, mingka gele lakulle.”

¹⁹ Jari appaui Isa mange ri iyai, ”Oe kau tau gele intu tappa', lasikurapa salloKu laammari ri kaui? Lasikurapa salloKu lasabbara mange ri kaui? Erangi mae ana' intu!”

²⁰ Jari laerangimu ana' injo mange ri Ia. Hattunna setang injo lajanjangi Isa, lassirimu lage'gese kalenna ana' injo, na ana' injo ta'bulinta'i naung ri tana na a'loli'-lolisi, na a'busa-busa babana.

²¹ Jari appaui Isa mange ri ammanna ana' injo, ”Sallomuka ia garring appakonni?” Pappihalinna, ”Minang riki'di'na juapa.

²² Na biasai setang injo larenrengi antama' ri api iyareka naung ri ere lalahuno. Mingka ampa akkulleKi a'bua' se're passala, ritulungkang na rikamaseangkang.”

²³ Lakuamo Isa, ”Paumu: Ampa akkulleKi? Sikuanna ma'ringi mange ri tau tappa' inni!”

²⁴ Lassirimu ammanna ana' injo appau bakka', ”Nakke tappa'a, tulunglalo tau gele inni tappa'!”

²⁵ Rihattu lajanjanna Isa pela' lohe tau battu a'domung, Ia laga'gara setang injo lalang risa'ra bakka', ”Oe kau tumusabaki injo a'jari pepe surang bongolo tau inni, Kuparentako, ansulu'ko battu ri ana' intu na akolalo muliang antama' ri ia!”

²⁶ Jari ansulu'mu setang injo na akkari'-kariu' na lapage'gese sarro ana' injo. Ana' injo kajanjangang assimpolemu tau mate, jari lohemo tau appau, ”Ia matemu.”

²⁷ Mingka Isa latetengi limanna ana' injo na lapabaungi, ampai ammenteng.

²⁸ Rihattunna Isa antama' ri sapo, na ana'-ana' gurunNa jua kale-kalenna surang Ia, akkuta'nangimu mange ri Ia, ”Ngura gelekang akkulle angga'gara ri setang injo?”

²⁹ Appihali Isa mange ri iyai, ”Setang appakonni inni gelei akkulle ribongka rimaraenganna pangera dowaang.”

Makapinruammo lapappiissekang kasissaanna Isa 9:30-32

³⁰ A'lampai Isa surang ana'-ana' gurunNa battu ri injo na a'molongi ri Galilea, na Isa gele a'ra' passala injo laisse' tau;

³¹ saba' Ia attangngai laajara ana'-ana' gurunNa. Appaui Isa mange ri iyai, ”Ana' Rupatau laripassareangi lalang ri limanna rupatau, na lalahuno, na tallungallo maenna rihuno Ia laattallasai muliang.”

³² Gele laisseki battuanna pau injo, mingka gele todo'i akkuta'nang mange ri Ia.

Inai lakaminang bakka' risikonjo ana' gurung 9:33-37

³³ Maenna injo ambattumu Isa na ana'-ana' gurunNa ri Kapernaum. Sungka'na Isa rie'mu lalang ri sapo, akkuta'nammu mange ri ana'-ana' gurunNa, ”Apa mulagari sumpae' ritangnga lalang?”

³⁴ Mingka gele appaui, saba' ritangnga lalang sumpae' a'beserei ripasala inai lakaminang bakka' ri iyai.

³⁵ Jari attolongi Isa na lakeo'i sampuloiya rua suro-suroNa. Lakuamo Isa mange ri iyai, ”Ampa rie' tau a'ra' a'jari kaminang ri ulu, parallui a'jari kaminang riboko riiangase'na na pajampangi riiangase'na.”

³⁶ Jari ngalle Isa se're ana' ki'di' na lapaentengi a'bora tangnga ri iyai, maeng injo laraka' ana' injo na appaui mange ri iyai,

³⁷ Inai jua anruppai se're ana' assimpole inni lalang arengKu, ”Nakkemo intu laruppai. Na inai jua anruppai ri Nakke, gele Nakke jua laruppai, mingka Ia tuassuro injo ri Nakke.”

Rie' se're tau gele ana' gurung ri Isa angga'gara setang 9:38-41

³⁸ Lakua Yahya mange ri Isa, ”Guru, anjanjangkang rie' se're tau gele minahang ri ditte angga'gara setang lalang aremMu, jari tapisangkaii.”

³⁹ Mingka lakua Isa, ”Akomo mupisangkai tau injo! Saba' gelepa minang rie' manna se're tau anggeokang nugele samara lalang arengKu akkulle ampa rihattu injo jua assallai ri Nakke.

⁴⁰ Inai jua gele a'bali ri ditte, ia rie'i ri ditte.

⁴¹ Sitoje'na Nakke appau mange ri kaui: Inai jua assare ere inung sigalasi mange ri kau passabakang tuminahangko ri Almase, ia gele latappela' sahala'na.”

Inai lapaa'jari tau inni doraka Passala se'la 9:42-50

⁴² ”Inai jua lapaa'jari sala se'renna ana'-ana' ki'di' tappa' inni ri Nakke anggeokang kadorakaang, la'bi bajikangi mange ri ia ampa se're gilingang batu ritolangangi kallonna ampai rilabuang ri tamparang.

⁴³ Ampa limammu lasabakiko anggeokang kadorakaang, pappa'i, saba' la'bi bajikangi ri kau antama' ritallasa potte limammu na larie'i ruaiya limammu ripamballung antama' ri naraka, ri api gele injo minang mate bola'na; [

⁴⁴ ri tampa' injo attallasai olo'na, na gele minang mate apinna.]

⁴⁵ Ampa bangkemmu lasabakiko anggeokang kadorakaang, pappa'i, saba' la'bi bajikangi ri kau antama' ritallasa kempang bangkemmu na larie'i ruiya bangkemmu ripamballung antama' ri naraka; [

⁴⁶ ri tampa' injo attallasai olo'na, na gele minang mate apinna.]

⁴⁷ Ampa matammu lasabakiko anggeokang kadorakaang, su'bi'i, saba' la'bi bajikangi ri kau antama' ri Pakkaraengang Allataala buta sihali matammu na larie'i ruaiya ripamballung antama' ri naraka,

⁴⁸ ri injo gele mate olo'na na apinna gele todo'i minang mate.

⁴⁹ Saba' sikuanna tau larise'lai ri api.

⁵⁰ Se'la intu baji'i, mingka ampa a'jari la'bai se'la injo, apamo laripake appakapa'ja? Paralluko tulusu ngampunnai se'la ri kalemmu na tallasako lalang dame mange risikuanna tau.”