MARKUS 8 - Kitta' Passitallikang Bau KAREBA BAJI'

Isa assare kanre patansabu tau 8:1-10

¹ Rihattu injo rie' todo' tau sanna' lohena ri injo, na saba' gele rie' kanrenai, jari Isa laeko'mu suro-suroNa na appaui mange ri iyai,

² ”Rie' ri atiku saba' ripangamaseang mange ri tau lohe inni, saba' tallungallomu minahang ri Nakke na tide' kanrenai.

³ Ampa pa're na Kusuro muliangi ri saponna, injo ladaa nyahana ritangnga lalang, saba' rie' tau battu dere.”

⁴ Appihali ngase'mu suro-suroNa, ”Anteekamua ri tampa' sino inni rie' tau akkulle assare roti mange ri iyai sa'genna bassori?”

⁵ Akkuta'nangi Isa mange ri iyai, ”Sikurambatu roti rie' ri kau?” Pappilahalinnai, ”Tujumbatu.”

⁶ Maeng injo lasuro tau lohe injo attolong ri tana. Sungka'i attolong ngase'mo Isa laalle roti tujumbatu injo, masa barakka'i, latu'be-tu'be na lapassareangi mange ri suro-suroNa solanna lapa'dahu-dahuangi mange ri tau lohe injo.

⁷ Rie' todo' sikurangkaju juku' ki'di', na rimaennamo lapamasaang barakka' juku' injo, lasuro pole Isa suro-suroNa lapa'dahu-dahuang.

⁸ Jari nganre ngase'mu sa'genna bassori. Maeng injo laparappungimu la'binna roti lakanrei injo, rie'i tujumbaku' rassi.

⁹ Lohena tau nganre rie'i patansabu. Jari Isa lasuro ngase'mu tau lohe injo muliang.

¹⁰ Ia lassirii nai' ri lopi surang suro-suroNa na a'lampai mange ri tana Dalmanuta.

Tau Farisi ngera tanra 8:11-13

¹¹ Maenna injo lohemo tau Farisi mange konjo na pakaramulamu assikuta'nang surang Isa. Lalaso'ri Isa jari ngeraimu ri Ia se're tanra ri Suruga.

¹² Jari a'nganroi Isa lalang ri atiNa na appaui, ”Ngura tau konni-konni ngerai tanra? Sitoje'na Nakke appau mange ri kaui, mange risikuanna tau rie' ri inni gele rie' tularisare tanra.”

¹³ Ia labokoi ngase'i, ampai nai' poleang ri lopi na a'lampai anta'leang.

Passala bibi tau Farisi na bibi Herodes 8:14-21

¹⁴ Ana'-ana' gurunna Isa lakaluppai ngerang roti, passangadinna sangga sibatu jua roti rie' lalang ri lopinna.

¹⁵ Jari Isa lapiu'rangi ngase'mu, ”A'jaga-jagaiko na tutuiko ri bibina tau Farisi na bibina Herodes.”

¹⁶ Jari lalagarimu ma'nassana gele ngerangi roti.

¹⁷ Sungka'i laisse' Isa passala injo, appaumu mange ri iyai, ”Ngura mulagarai passala tide'na roti? Gele juapai mupahang surang gele tompai muisse'? Gelepai tarang atimu?

¹⁸ Kau rieki matammu, geleka mujanjangi na kau rieki tolimmu, geleka mulangngeri? Gelemu muu'rangi,

¹⁹ rihattungKu nu'be-nu'be limambatu roti lappakanre limansa'bu tau, na sikura baku' la'binna roti injo rimaennamo muparappungi?” Pappihalinnai, ”Sampulorua baku'.”

²⁰ ”Rihattu roti tujumbatu injo lappakanre patansa'bu tau, na sikura la'binna roti injo rimaennamo muparappungi?” Pappihalinnai, ”Tujumbaku'.”

²¹ Maeng injo appaui Isa mange ri iyai, ”Gele juapai mupahangi?”

Isa appakaanjanjang tau buta ri Betsaida 8:22-26

²² Maeng injo ambattumu Isa surang ana'-ana' gurunNa ri Betsaida. Jari rie'mo tau ngerang mange ri Isa se're tau buta na laerai mange ri Ia, solanna lakaraha tau injo.

²³ Isa lateteng limanna tau buta injo na larenrengi ansulukang desa. Jari Ia lape'rui matanna tau injo na lataro limanNa rateang ulunna, na akkuta'nangi mange ri ia, ”Akkullemoko anjanjang siso'di'?”

²⁴ Anjanjangi mange ri a'rakang tau injo, ampai appau, ”Anjanjamma tau assimpole poong-poong kaju, mingka kujanjangi a'lingka-lingkai.”

²⁵ Isa lataro pole limanNa ri matanna tau injo, jari akkulle toje'mu anjanjang tau injo na molemu, jari akkullemu baji' panjanjanna mange riiangase'na.

²⁶ Maeng injo Isa lasuro tau injo muliang mange ri saponna na lakua, ”Akomo muliang antama' ri desa intu.”

Pangakuanna Petrus 8:27-30

²⁷ Maenna injo Isa surang ana'-ana' gurunNa a'lampai mange ri desa-desa ri ampi'na Kaisarea Filipi. Rihattunna attangnga lalangi akkuta'nangi Isa mange ri ana'-ana' gurunNa, ”Lakua tau, Nakke inni inai?”

²⁸ Pappihalinnai mange ri Ia, ”Rie' tau appau: Yahya Pario, rie' tau maraeng appau: Elia, na tau maraeng pole appau: Se're battu risikonjo nabbi.”

²⁹ Akkuta'nangi Isa mange ri iyai, ”Mingka panguppamu, Nakke inni inai?” Appihali Petrus, ”Kaumo Almase!”

³⁰ Jari Isa lapisangkai ngase'i solanna andai lapappiissekang mange ri inai jua passala'Na.

Pakaramulamu lapappiissekang passala kasissaanna Isa na sara'-sara' laminahang ri Ia 8:31–9:1

³¹ Maeng injo pakaramulamu Isa ngajara mange ri iyai ma'nassana Ana' Rupatau parallui lananggong lohe kasissaang na laritolla'i ri tutoa-toa, risikonjo imang ponggaha surang risikonjo guru Tora', ampai rihuno mingka laattallasai muliang ri allo makatalluna.

³² Passala inni lapau lambusui Isa. Mingka Petrus labeso'i Isa mange risa'ri na pakaramulamu lapisangkai terasa Isa.

³³ Jari a'gilimmu Isa na latangarai ana'-ana' gurunNa na Ia lapisangkai terasai Petrus, ”A'lampako Ibilisi, saba' gele mupikkiri apa nulapikkiri injo Allataala, passangadinna apa jua nulapikkiri rupatau.”

³⁴ Maeng injo Isa lakeo'i tau lohe injo surang ana'-ana' gurunNa na appaui mange ri iyai, ”Ampa rie' tau a'ra' minahang ri Nakke, parallui lasangkali kalenna, lasompo salli'na na minahangi ri Nakke.

³⁵ Saba' inai jua a'ra' lapakasalama' nyahana, ia latappela' nyahana; mingka inai jua tappela' nyahana kanara ri Nakke na kanara ri Injili, iamo injo lalapakasalama'i.

³⁶ Apamo matu-matunna se're inni tau lauppa ngase'i assinna lino, mingka tappela'i nyahana?

³⁷ Saba' apamo laakkulle risareangi passambe ri nyahana?

³⁸ Saba' inai jua siri' kanara ri Nakke na kanara ri pauKu ritangngana tau lohe gele injo mallang na tau doraka injo, Ana' Rupatau lasiri' todo'i rikanara tau injo ampa rie'mu sallo' lalang rikala'biranna AmmanNa, surang sikonjo malaeka' tangkasa.”