MARKUS 6 - Kitta' Passitallikang Bau KAREBA BAJI'

Isa ritolla' ri Nazaret 6:1-6a

¹ Maenna injo a'lampai Isa ri injo na ambattui ri tampa' assala'Na, na suro-suroNa minahangi ri Isa.

² Ri Allo Passambajangang Ia pakaramula ngajara ri sapo passambajangang na lohe tau lannasa rilalangngere'Na na appaui, ”Ri antee mae nguppa pappilajarang passala appakonjo? Pangisse' anteekamua risareang mange ri Ia? Anteekamua kajariang nugele injo samara a'jari ri limanNa?

³ Gelejua Ia inni ana' tukang kaju, ana'na Maria, uranna siana' Yakobus, Yoses, Yudas na Simon? Gelejua sikonjo urang siana' bahineNa rie'i ri inni surangki?” Jari latollakimu Isa.

⁴ Rimaenna injo appaui Isa mange ri iyai, ”Se're nabbi ripakala'biri manna riapai mae, passangadinna ri kamponna to'jua, ribija pamanakanna surang ri saponna.”

⁵ Isa gele akkulle appaa'jari numasagala ri injo manna se're, maraenganna appakagassing sikura lohena tau garring ampa lataro limanNa rateanna.

^6a Lannasai Isa saba' geleinna tappa'.

Isa lapalampa suro sampulorua injo 6:6b-13

^6b Jari a'lingkai Isa a'lili' desa langajara.

⁷ Ia lakeo' suro sampulorua injo na pakaramulamu lasuroi ta'rua-rua. Isa laassare kahasa ri iyai mange risikonjo setang,

⁸ na appasangi mange ri iyai solanna andai ngerang bokong ripa'lampaanna, passangadinna tukkang, manna kanre gele akkulle, anda todo'i ngerang purukang pamunaang bokong, gele akkulle ngerang doe',

⁹ akkulle assandala, mingka gelei akkulle ngerang rua pakeang.

¹⁰ Lakua Isa, ”Ampa rise're tampa' antama'ko rise're sapo, ammariko ri injo sa'gemmu a'lampai ri tampa' injo.

¹¹ Ampa rie' se're tampa' nugele a'ra' latarimako na ampa gele a'ra' lapilangngeri paumu, ansulu'ko battu ri injo na pabe'besei limpurang nua'dakki' injo ri pala' bangkemmu assimpole se're tanra pappiu'rangi mange ri iyai.”

¹² Jari a'lampaimu appala'bang ma'nassana tau inni parallui jarra rikadorakaanna,

¹³ na angga'garai lohe rupanna setang, na assare minnya' rilohe tau garring na lapakagassing ngase'i.

Rihunoi Yahya pario 6:14-29

¹⁴ Karaeng Herodes lalangngere todo'i passala'na Isa, saba' baji' kaissekanna arenna na lalagarai tau, ”Yahya Pario attalasa muliang battu risikuanna tau maeng mate na iamo injo saba' na sikonjo kahasa rie' ri kalenna.”

¹⁵ Rie' todo' tau maraeng appau, ”Ia injo Elia!” Na tumaraeng pole appau, ”Ia injo se'rei nabbi assimpole nabbi-nabbi riolo.”

¹⁶ Hattu lalangngere'na Herodes passala injo, appaumu, ”Gele, ia injo Yahya pario tumaeng injo kusuro pappa' kallonna, na attallasai muliang.”

¹⁷ Saba' Herodesmo lasuro jakkalai Yahya ampai lasuro sangkala ri pattarungkuang rikanara kajariang Herodias, bahinenna Filipus uranna siana', saba' Herodes maemmo laalle a'jari bahinenna.

¹⁸ Yahya tulusu lapiu'rangi Herodes, ”Gele akkulle mualle bahinenna urammu siana'!”

¹⁹ Injomo saba'na Herodias lananro ri atina a'ra' a'balasa ri Yahya na a'ra'i lahuno, mingka gele akkulle.

²⁰ Saba' Herodes ngali'i ri Yahya ma'nassana Yahya se'rei tau naba na tangkasa, jari ia laurangangi Yahya. Ampa lalangngere Yahya, sanging bata atina, mingka ia tulusu langai appilangngeri ri Yahya.

²¹ Rikala'busanna larapi'mu hattu baji' ri Herodias, rihattu nganre-nganreinna surang sikonjo pagahena, sikonjo parawirana na tau maraeng rikangalikang injo ri Galilea saba' attamma taungi Herodes.

²² Rihattu injo ana' bahinena Herodias mange ri a'rakang ampai attari-tariang, na ia lapakasannangi atina Herodes surang sikonjo toananna. Karaeng Herodes appau mange ri ana'rara injo, ”Ngerako apa jua mukaa'raki, lakusareangko!”,

²³ jari assapattamu mange ri ia, ”Apa jua muera laripassareangi mange ri kau, manna pole sibageang pakkaraengangku!”

²⁴ A'lampai ana'rara injo na lakuta'nang idonna, ”Apa nuparallu lakuera?” Lakuamo idonna, ”Ulunna Yahya Pario!”

²⁵ Jari lassirimu antama' poleang lapiuppai karaeng injo na ngerai, ”Nukukaa'raki, solanna rikonni-konninamo na musareanga ulunna Yahya Pario lalang ri dulang!”

²⁶ Jari sanna' pa'risimu nyahana karaeng injo, mingka kanara sapattana na kanara toananna jari gelemu akkulle latolla'.

²⁷ Lassiri karaeng injo lasuro se're tubiasa injo mappa' kallong tau solanna laalle ulunna Yahya. Tau injo a'lampai mange ri pattarungkuang na lapappa' kallonna Yahya.

²⁸ Laerangi ulu injo lalang rise're dulang bakka' na lasareangi mange ri ana'rara injo na ana'rara injo lapassareang todo'i mange ri idonna.

²⁹ Sungka'i ana'-ana' gurunna Yahya lalangngere passala injo, mangeimu na laalle batangkalenna Yahya, ampai lapaonrangi ri kuburu.

Isa assare kanre limansa'bu tau 6:30-44

³⁰ Maenna injo muliangimu sikonjo suro na asse'rei surang Isa na lapappiisekangi mange ri Isa sikonjo nulageokangi surang nulapangajarang injo.

³¹ Jari appaui Isa mange ri iyai, ”Maeko na a'lampaki assa'la-sa'la' ri tampa' sino, na ammari-mari mangngangki konjomange sinampe'!” Saba' toje'i sanna' lohena tau battu mange na a'lampa, sa'genna manna panganre gelemu sahe.

³² Jari nai' ngase'mu ri lopi na a'lampai mange assa'la'-sa'la ri tampa' sino.

³³ Mingka rihattu a'lampainna lohe tau lajanjangi na laissekii antee mae lalamangei. Jari apparri-parri a'lingka bangkeng tau lohe battu injo risikonjo kota mange ri tampa' injo sa'genna iyaimo riolo ambattu mange konjo.

³⁴ Rihattu a'bontoinnamo, lajanjangi Isa tau lohe injo a'domung, jari rie'mo ri atiNa kanara pangamaseang mange ri iyai, saba' iyai injo assimpole jimbala tide' pakalahakinna. Jari pakaramulamu Isa ngajara lohe passala mange ri iyai.

³⁵ Rihattu pakaramulanamo labangngi, riekimu suro-suroNa mange ri Ia na lakuai, ”Inni tampa' sino na labangngimu.

³⁶ Suroi a'lampai mange ri kampong-kampong na desa-desa seppa' injo ri inni, solanna akkulle ammalli kanre tujunna.”

³⁷ Mingka appihali Isa, ”Kaumo parallu assare kanre mange ri iyai!” Lakua ngase'mo mange ri Isa, ”Parallukang mange tapammalliangi roti anggarang ruambilangang sa'bu lalakanrei?”

³⁸ Mingka appaui Isa mange ri iyai, ”Sikurambatu roti rie' ri kaui? Paressa sai!” Sungka'i laisseki, lapaumu mange ri Isa, ”Limambatu roti na ruangkaju juku'.”

³⁹ Jari lasuroi Isa tau lohe injo, solanna attolongi a'limbo-limbo ri bahonna ruku' injo.

⁴⁰ Attolong ngase'mu, rie' tusibilangang, rie' tulimampulo.

⁴¹ Sungka'i laalle roti limambatu injo surang juku' ruangkaju injo, ammongai Isa nai' ri langi' masa barakka'i, ampai latu'be-tu'be roti injo na lapassareangi mange ri suro-suroNa, solanna lapassareangi mange ri tau lohe injo; appakonjo todo'i juku' ruangkaju injo lapa'dahu-dahuangi mange ri iyai ngase'.

⁴² Jari nganre ngase'mu sa'genna bassoro.

⁴³ Rimaenna injo laparappungi tau la'bi roti lakanre injo na rie'i sampulo ruangbaku' rassi na injo pole la'binna juku' injo.

⁴⁴ Tuminahang injo nganre roti rie'i limansa'bu tau bura'ne.

Isa a'lingka ri baho ere 6:45-52

⁴⁵ Maenna injo lasuroi Isa lassiri ana'-ana' gurunNa nai' ri lopi na a'lampa rioloi anta'leang, mange ri Betsaida, na rihattu injo todo' na lasuro tau lohe injo muliangi.

⁴⁶ Sungka'i assisa'lakimo, a'lampai Isa mange ri bonto langera dowaang.

⁴⁷ Ri labangnginamo lopi injo rie'mu ritangnga tamparang la'ba, na Isa rie' juapai ribonto kale-kalenNa.

⁴⁸ Sungka'i lajanjang Isa anteekamua marasainna ambisei saba' anging battu ri a'rakang, jari barang latette' tallu ribangngi injo a'lingkai Isa ri baho ere mange lapiuppai ana'-ana' gurunNa na a'ra'i lapilombai ngase'.

⁴⁹ Sungka'i lajanjangi Isa a'lingka ri baho ere, pa'ngare'nai setang, jari akkari'-kariu' ngasekimu,

⁵⁰ saba' iyai ngase' lajanjangi Isa na sanna' ta'bangkainna. Mingka lassirimu Isa appau mange ri iyai, ”Sannangiko! Nakke inni, akomo malla'!”

⁵¹ Jari nai'mu Isa ri lopi lapiuppai ngase'i, na a'jari luba'mu pole anging injo. Jari lannasa ngase'mu,

⁵² saba' gelepai lapahangi manna injo maemmu anjanjangi rikajariang roti limambatu injo, mingka gelepai tarang atina.

Isa appakagassing lohe tau garring ri Genesaret 6:53-56

⁵³ Riambattunamo anta'leang Isa surang ana'-ana' gurunNa a'bontoi ri Genesaret na a'labui ri injo.

⁵⁴ Rihattu ansulukinna battu ri lopi, lohemo tau laisse'i Isa.

⁵⁵ Jari lohemo tau rie' ri injo allari lalaerangi tau garrinna rate ri tappere'na ri antee juai mae lalangngeri Isa rie'.

⁵⁶ Ri antee-tee juai mae lalampai Isa, mange ri desa-desa, mange ri kota-kota, iyareka mange ri kampong-kampong, lohe tau lataro tau garrinna ri biring lalang na laerai mange ri Isa, solanna ripa'biangi laseru Isa manna appa' baju bakka'Na jua. Sikuanna tau garring laseru injo biring baju bakka'Na a'jari mole ngase'i.