MARKUS 5 - Kitta' Passitallikang Bau KAREBA BAJI'

Isa ambongka setang battu ri tau Gerasa 5:1-20

¹ Jari ambattuimu anta'leang ri tamparang la'ba injo, ri tanana tau Gerasa.

² Ampa kalei Isa naung battu ri lopi, rie'mo se're tau ladongkoki setang battu ri pakkuburang injo laurangi assijanjang Isa.

³ Tau injo konjomange ammari na gelemo rie' manna se're tau akkulle lasangkala manna injo pole rirante,

⁴ saba' biasamu risangkala surang rirante, mingka sanging latappu'i rantena na sangkalana lapanraki, jari gelemo rie' tau akkullei lapakasannang.

⁵ Allo bangngi a'lingkai ri pakkuburang na nai'i ri bonto akkari-kariu ampai lapeppe' batu kalenna.

⁶ Sungka'i lajanjang dere Isa, allarimu na mange laruppai ampai nyomba ri a'rakanna Isa,

⁷ na appaui lalang risa'ra bakka', ”Apa passilolonganTa ri nakke, oe Isa Ana' Allataala Tukaminang la'biri? Lalang arenna Allataala, andalaloa risissa!”

⁸ Saba' la'bi riolomu Isa appau mange ri ia, lakua, ”Oe Nyaha daa! Ansulu'ko battu ri tau inni!”

⁹ Maeng injo akkuta'nangi Isa mange ri tau injo, ”Inai aremmu?” Pappihalinna, ”Arengku Legion, saba' lohekang.”

¹⁰ Ia sanna' laerana solanna Isa andai laga'gara ansulukang battu ri tana injo.

¹¹ Ri balibisi'na bonto injo sanna' lohena bahi a'bikanre,

¹² jari sikonjo setang laerai mange ri Isa, lakua: ”Risuromamokang antama' ri bahi intu, ripa'biangkang antama' ri injo!”

¹³ Laturuki Isa pangeranai, Jari ansulu' ngase'mu setang injo na antama'i ri bahi lohe injo. Bakkalang bahi injo larie'i ruangsa'bu na a'lumpa' ngase'i ri ta'bing naung ri tamparang la'ba jari mate ngase'mu ri injo.

¹⁴ Lari ngase'i pakalahakinna bahi injo na lalagarai passala injo ri kota na ri kampong-kampong seppa' ri injo. Jari mangeimu sikonjo assinna kampong lajanjangi apa numaeng kajariang.

¹⁵ Mange ngase'i ri Isa na lajanjangi tau pongoro injo attolong, maemmu makeang na baji'mu pikkiranna, tau ladongkoki injo setang Legion sumpae'. Jari malla' ngasekimu.

¹⁶ Sikuanna tau anjanjang rikajariang injo lalagarai mange ri iyai passala numaeng injo a'jari ri tau ladongkoki injo setang, na passala bahi lohe injo.

¹⁷ Maenna injo pakaramulamu lasuroi Isa solanna be'bere labokoi kamponna.

¹⁸ Rihattu nai'na Isa ri lopi, tuladongkoki injo setang sumpae' laerai, solanna ripa'biangi minahang ri Ia.

¹⁹ Isa gele lapa'biang minahang, mingka appaui Isa mange ri tau injo, ”Muliammoko ri sapommu, mange ri tau sikampommu, na pappiissekangi mange ri iyai sikuanna numaeng lapaa'jari Karaeng ri kau na anteekamua Ia ngamaseang ri kau!”

²⁰ A'lampamu tau injo na pakaramulamu lapappissekang ri tana Dekapolis sikonjo numaeng lageokang Isa ri kalenna jari lohemo tau a'jari kaliru.

Isa lapakaattallasai ana'na Yairus na appakagassingi se're bahine garring a'rara 5:21-43

²¹ Sungka'na Isa anta'leang tamparang pole make lopi, lohemo tau a'rurung-rurung mange a'domung ri Ia. Rihattu injo Ia rie' juapai ri biring tamparang la'ba injo,

²² rie'mo se're ponggaha pajaga sapo passambajangang turiare' Yairus. Sungka'na lajanjang Isa joppa'mu ri a'rakang bangkenNa,

²³ na sanna' laerana mange ri Isa, lakua, ”Garringi ana' bahineku, na ammadammu, mange laloKi na taro limanTa ri ia, solanna salama' na tallasai.”

²⁴ Jari a'lampamu Isa surang tau injo. Tau lohe injo minahangi ri Isa na assiosso'i riampi'Na.

²⁵ Rie' todo' ri injo bahine sampulomu ruantaung garring a'rara.

²⁶ Ia akkuling-kulimmu lasuro ilei ri dottoro, sa'genna la'busu ngase'mu sikonjo apa-apanna, mingka tide'jua matu-matunna, sibale'na pela' sarro pa'risi'na.

²⁷ Ia maeng lalangngeremu passala'na Isa, jari ritangnga-tangngana tau lohe injo ia apparri-parrii laseppaki Isa battu riboko solanna akkulle lakaraha baju bakka'Na.

²⁸ Saba' lakua, ”Assala kuseru baju bakka'Na, mole garringku.”

²⁹ Rihattu injo toje' jua attaangi pa'rarana na lapisa'ringi kalenna ma'nassana molemu garrinna.

³⁰ Rihattu injo todo' Isa laisse'i ma'nassana rie' kahasa ansulu' battu ri kalenNa, jari a'gilingi ri tau lohe injo na akkuta'nangi, ”Inai laseru baju bakka'Ku?”

³¹ Appihali ngase'mu ana'-ana' gurunNa, ”Rijanjang juai tau lohe inni assiosso'-osso' riampi'Mu na akkuta'nangKo: Inai nyeru ri Nakke?”

³² Jari Isa latangarai siappuNa lalajanjangi inai maeng anggeokang ripassala injo.

³³ Bahine injo, a'jari malla'i na annettere rihattu laisse'na apa kajariang ri kalenna, a'lampai mange ri a'rakang na joppa'i ri a'rakanNa na lapappiissekangi mange ri Isa sikonjo nua'jari ri kalenna.

³⁴ Jari lakuamo Isa mange ri bahine injo, ”Oe ana'Ku, tappa'mu lapakasalama'ko. A'lampamoko lalang dame latulusu molei garrimmu!”

³⁵ A'bisara juapai Isa rie'mo se're tau battu ripassiana'na ponggaha sapo passambajangang injo na appaui, ”Matemu ana'mu, ngura namupakasusa juapai Guru?”

³⁶ Mingka Isa gele lapitoli pauna injo na appaui mange ri ponggaha sapo passambajangang injo, ”Akomo malla', tappa'ko!”

³⁷ Jari Isa gele appa'biang manna se're tau minahang ri Ia, maraenganna Petrus, Yakobus na Yahya, uranna siana' Yakobus.

³⁸ Ambattuimu ri saponna ponggaha sapo passambajangang injo, na ri injo lajanjangi Isa lohe tau gorong, ammarrang na apparau bakka'.

³⁹ Sungka'i antama'mo ri sapo injo appaui Isa mange ri tau injo, ”Ngura gorongiko na apparaui? Gele juai mate ana' inni, mingka tinroi!”

⁴⁰ Mingka rikekeki Isa ri tau lohe injo. Sikuanna tau lasuro Isa ansulukang, ampai laurang ammanna na idonna ana' injo surang sikonjo uranna Isa antama' ri bili' injo.

⁴¹ Jari latetemmu limanna bahine injo, lakua Isa, ”Talita Kum,” nua'battuang, ”Oe ana' bahine, Nakke appau ri kaui, ambaummoko!”

⁴² Rihattu injo jua ammentengi ana' injo na a'lingkai, saba' ummuru'na sampulorua taung. Sikuanna tau rie' ri injo sanna' lannasa'na.

⁴³ Appasang terasai Isa mange ri iyai, solanna anda rie' manna sitau lapappiissekangi passala injo, maeng injo lasuro sarei kanre ana' injo.