MARKUS 4 - Kitta' Passitallikang Bau KAREBA BAJI'

Pakkalebarang ripassala palamung 4:1-20

¹ Rie' se're hattu ripakaramulana ngajara Isa ri biring tamparang la'ba. Rie'mo tau sanna' lohe jumallana a'domung ri Isa, sa'genna Ia nai'i risibatu lopi a'labu injo ampai attolong ri injo, na tau lohe injo ammenteng ngase'i ribonto, ri biring tamparang la'ba injo.

² Ri injo lohe passala lapangajarang Isa mange ri iyai lalang pakkalebarang. RiajaranNa injo, lakua Isa mange ri iyai,

³ ”Pilangngeri! Rie' se're palamung mange a'lamung.

⁴ Rihattu a'lamunna, sidahuang lamunganna injo a'dappe' ri biring lalang, maeng injo rie'mo jangang-jangang na lakanre sa'genna la'busu.

⁵ Sidahuang a'dappe'i ri tana lohe batu-batunna nugele lohe assi tanana, jari lassiri attimbo lamungang injo, saba' so'di' assi tanana.

⁶ Mingka ri ambassi'namo matanna allo, lajumu lamungang injo na a'jari kalotoro saba' tide' aka'na.

⁷ Sidahuang pole a'dappe' ritangnga rompo' bunga jabe, jari pela' bakka'i bunga jabe injo na labohongi sa'genna mate, jari tide' buana.

⁸ Sidahuang a'dappe' ri tana baji', jari soppong timbona na ambuai. Hassele'na rie' nua'lappi tallumpulo, rie' nua'lappi annampulo, rie' nua'lappi sibilangang.”

⁹ Jari lakuamo Isa, ”Inai rie' tolinna laallangngere, sibaji'na ia appilangngeri!”

¹⁰ Rihattu akkale-kalena Isa, sikonjo tuminahang ri Ia na sampuloiya rua suro-suroNa akkuta'nang mange ri Isa passala pakkalebarang injo.

¹¹ Jari lakuamo Isa mange ri iyai, ”Ri kau maeng ripassareangi harasiana Pakkaraengang Allataala, mingka mange ri tau lohe rieki injo pantarang sikuanna parallui ripappauwang lalang ripakkalebarang,

¹² solanna: Manna injo anjanjangi, mingka gelei lapahang, manna injo toje'i allangngere, mingka gelei laisse', solanna iyai gele a'giling na risare pangampungang.”

¹³ Maeng injo appaui pole Isa mange ri iyai, ”Gelepai mupahangi pakkalebarang inni? Ampa appakonjoi anteekamua lamupahangi sikonjo pakkalebarang maraeng?

¹⁴ Palamung injo a'lamungi pau.

¹⁵ Sikuanna tau rie' ri biring lalang. Tampa'na pau injo rilamung, iamo intu tau allangngere injo pau, maeng injo rie'i Ibilisi na laalle pau nuampa injo rilamung ri iyai.

¹⁶ Appakonjo todo'i nurilamung injo ri tana a'batu-batu, iyaimo tau allangngere injo pau na lassiri latarima baji',

¹⁷ mingka gele a'dakki' na sinampe' juai attahang. Ampa rie'mo passissa iyareka pama'risi saba' ri pau injo, lassirimu a'boko.

¹⁸ Numaraeng injo iamo intu nua'dappe' injo ri rompo' bunga jabe; iamo injo tuallangngere injo pauna Allataala,

¹⁹ mingka passabakang bata-bata ri lino inni na pappalinguna kakalumannyangang na risikonjo a'ra' mata nugele injo akkulle ritahang iamo antama' laepe' pau injo jari gelei ambua.

²⁰ Kala'busanna nua'dappe' injo ri tana baji', iamo intu tau allangngere injo pau ampai latarima baji' pau injo jari ambuai, rie' nua'lappi tallumpulo, rie' nua'lappi annampulo, na rie' nua'lappi sibilangang.”

Pakkalebarang ripassala kanjoli na passuka' 4:21-25

²¹ Maeng injo appaui Isa mange ri iyai, ”Makalama'ringi tau inni ngerang kanjoli solanna lataro rahangang talle iyareka rahangang patinroang? Gelejua solanna ritaro rate ri tampa'na?

²² Saba' gele rie' manna se're nutassa'bu lagele kauppaang, na gele rie' manna se're nuharasia lagele ripappiissekang.

²³ Inai rie' tolinna lallangngere, sibaji'na ia appilangngeri!”

²⁴ Maenna injo appaumu isse' Isa, ”Pariatilalo apa numaeng mulangngere! Passuka' numupake injo lanyuka' iamo laripasuka' mange ri kau, na rimaraenganna injo laritambai pole mange ri kau.

²⁵ Saba' inai rie' anunna, ia lasare, mingka inai tide' anunna, apa jua rie' ri ia larialle ngase'i.”

Pakkalebarang ripassala lamungang attimbo 4:26-29

²⁶ Jari lakuamo Isa, ”Injo passala Pakkaraenganna Allataala appakonni: assimpole tau a'lamung lamungang ri tana,

²⁷ ampa bangngi tinroi na ampa allo ambaungi, anteekamua kajarianna gele laisse' tau injo.

²⁸ Lino inni appasulu' kale-kale bua, pakaramula tangke-tangkena, ampamo bullere'na, maeng injo lisere'na rassi lalang ri bullere injo.

²⁹ Ampa toamu bua injo, lassirimu opuna koko labingalai, saba' larapi'mu hattu panduru.”

Pakkalebarang ripassala lisere sinahu 4:30-34

³⁰ Lakuamo pole Isa, ”Apamo a'ra' laripassinrapangangi Pakkaraengang Allataala, iyareka pakkalebarang anteeammo a'ra' larija'bangangi?

³¹ Injo passala Pakkaraengang Allataala assimpole lisere sinahu nuritahuru injo ri tana. Lisere'na sinahu injo kaminang ki'di' battu risikonjo lisere lamung-lamung rie' ri lino.

³² Mingka ampa ritahurui, attimbo lisere injo na a'jari kaminang bakka' battu risikonjo gangang-gangang maraeng na rie' pangka-pangkana nubakka', jari lohemo jangang-jangang akkulle a'bua' poo ri injo.”

³³ Lohe rupanna pakkalebarang assimpole injo, lapake Isa appala'bang pauna Allataala mange ri iyai assituru' pakkullena lappahang,

³⁴ na ampa gele pakkalebarang Isa gele appau mange ri iyai, mingka mange ri suro-suroNa Ia lasesei baji'i sikonjo numaeng lapau lalang ri pakkalebarang.

Anging parupusu lapakaluba' 4:35-41

³⁵ Ri allo injo, sungka'i labangngi, lakuamo Isa mange ri iyai, ”Maemoko a'lampaki anta'leang.”

³⁶ Labokoi tau lohe injo ampai a'lampai na laurang todo'i Isa lalang ri lopi na attolongi ri injo na lohe pole lopi maraeng minahang ri Isa.

³⁷ Sikalinna rie'mo anging parupusu na ere injo antama'mu ri lopi, jari lopi injo pakaramulamu rassi ere.

³⁸ Rihattu injo Isa attangngai tinro make lungang riboko lopi. Jari ana'-ana' gurunNa laronrongi Isa na appaui mange ri Isa, ”Guru, Kau gele mupaduli ma'nassana latallangki?”

³⁹ Jari ambaungi Isa na laga'gara anging parupusu injo na lakua mange tamparang la'ba injo, ”Ammariko! Sannangko!” Jari luba'mu anging parupusu na tamparang la'ba injo a'jari sannang.

⁴⁰ Jari appaui Isa mange ri iyai, ”Ngura namallaki konjoko? Ngura geleiko tappa'?”

⁴¹ Jari pela' mallakimu na lakuai, ”Inai sitoje'na tau inni, na manna anging surang ere tamparang la'ba inni turu' mange ri Ia?”