MARKUS 3 - Kitta' Passitallikang Bau KAREBA BAJI'

Isa appakagassing tau garring ri allo Passambajangang 3:1-6

¹ Maeng injo antama'i pole Isa ri sapo passambajangang. Ri injo rie' se're tumate sihali limanna.

² Latili'-tilingi Isa, barang appakagassingi tau garring ri allo passambajangang, solanna akkulle appassala mange ri Ia.

³ Lakua Isa mange ri tau injo, ”Maeko, ammentengko a'bora tangnga!”

⁴ Maeng injo lakuamo Isa mange ri iyai, ”Anteeang ripa'biang ampa allo passambajangang, a'bua' nubaji' iyareka a'bua' nudaa, appakasalama' nyaha tau iyareka rihuno?” Mingka ammottoki ngase' juai.

⁵ Sanna'i pa'risi'na nyahana Isa saba' terasa'na atinai na kuku'i latangara ngase' sikuanna tau rie' riampi'Na ampai appau mange ri tau mate sihali injo limanna, ”Patanjo mae limammu!” Lapatanjo toje'mu limanna tau injo, jari baji' toje'mu limanna.

⁶ Jari ansulu' ngase'mu tau Farisi injo na lassiri a'buaki naha-naha daa surang sikonjo uranna Herodes lalahunoi Isa.

Isa appakagassing lohe tau garring 3:7-12

⁷ Maeng injo Isa surang ana'-ana' gurunNa a'lampai mange ri biring tamparang la'ba, na lohe tau battu ri Galilea laminahang ri Ia, rie' todo' tubattu ri Yudea,

⁸ battu ri Yerusalem, battu ri Idumea, battu ha'leanna Balang Yordan, battu ri tana Tirus surang Sidon. Iangase'na injo riekii mange ri Isa, saba' lalangngerinna risikonjo passala nulageokang Isa.

⁹ Ia lasuro ana'-ana' gurunNa appakasadia sibatu lopi lalapake saba' lohena tau, jari gele lapareppesi Isa.

¹⁰ Saba' lohemo tau garring lapakagassing Isa, sa'genna sikuanna tau rie' garrinna laosso'i Isa a'ra'i laserui.

¹¹ Ampa sikonjo setang lajanjangi Isa, joppa' ngase'i ri a'rakanNa na akkariu' bakka'i, ”Kaumo Ana' Allataala.”

¹² Mingka Isa lapisangkai terasai solanna gele lapappiissekang inai Ia sitoje'na.

Isa akkeo' sampulo rua suro-suro 3:13-19

¹³ Maenna injo nai'mu Isa ri baho bonto. Ia akkeo'i tau lakaa'raki injo na mangei toje'mu ri Ia.

¹⁴ Ia latantuangi sampulo rua tau, tulaare' injo Isa suro-suro, lalapinahangi Isa na larisuroi ri Isa appala'bang Injili

¹⁵ na larisarei ri Isa kahasa langga'gara setang.

¹⁶ Sampuloiya rua suro-suro latantuang injo Isa, iamo intu: Simon, tulasare injo areng Petrus,

¹⁷ Yakobus ana'na Zebedeus, na Yahya uranna siana' Yakobus, ruaiya inni lasare Isa areng iamo intu Boanerges, nubattuanna ana' gunturu,

¹⁸ Sitarrusu'na Andreas, Filipus, Bartolomeus, Matius, Tomas, Yakobus ana'-ana'na Alfeus, Tadeus, Simon tau battu ri Zelot,

¹⁹ na Yudas Iskariot, tua'bali'ballang injo ri Isa.

Isa na Beelzebul 3:20-30

²⁰ Maeng injo antama'i Isa ri se're sapo. Lohemo isse' tau battu a'domung, sa'genna manna panganre gelemu sahe.

²¹ Hattu lalangngere'na passiana'Na, a'rakimu battu lalaurangi Isa, saba' lakuai tau lohe injo Ia gelemu toro pikkiranNa.

²² Sikonjo guru Tora' battu injo ri Yerusalem, appau, ”Ia lapantamai setang Beelzebul,” na: ”Saba' ponggaha setang Ia angga'gara setang.”

²³ Rikeo' ngase'i ri Isa, ampai appau mange ri iyai lalang rise're pakkalebarang, ”Anteekamua Ibilisi akkulle ambongka paranna Ibilisi?

²⁴ Ampa rie' se're pakkaraengang ta'bage-bage, gele akkulle attahang pakkaraengang injo,

²⁵ na ampa rie' se're pakkalabiniang ta'bage-bage, tantu gelena akkulle attahang pakkalabiniang injo.

²⁶ Ampakonjo todo'i Ibilisi ampa kalenna labaliang na ta'bage-bage, ia gele akkulle attahang, mingka larapi'mu hattu kapanrakanna.

²⁷ Mingka manna se're tau gelei akkulle antama' ri saponna se're inni tau sa'ga' la'lukka' pa'barang-baranganna ampa gelei lasokke' riolo opuna sapo na laalle assinna sapo injo.

²⁸ Sitoje'na Nakke appau mange ri kaui: Sikonjo kadorakaang na pattadea nulapau injo tau akkulle rilappasi.

²⁹ Mingka inai mamo attadea ri Nyaha Tangkasa gele akkulle rilappasi situlusu'na, mingka salai saba' a'bua'i kadorakaang tide' puppusu'na.”

³⁰ Lapau appakonjo Isa saba' iyai lapaui ma'nassana Ia latabai setang.

Isa surang Uranna siana' 3:31-35

³¹ Maenna injo rie'mu idonNa surang uranna siana' Isa. Riammentenginna juapa pantarang, rie'mo tau lasuro mange ri Isa lalakeo'i.

³² Lohe tau attolong risiappuNa, lakua ngase'mo mange ri Ia, ”Janjammu, idomMu na uramMu siana' rie'i pantarang na a'ra'i laurangKi assijanjang.”

³³ Lakuamo Isa mange ri iyai, ”Inai idongKu na inai urangKu siana'?”

³⁴ Ia latangarai sikuanna tau rie' attolong riampi'Na na appaui, ”Iamo inni idongKu na urangKu siana'!

³⁵ Inai jua lageokang a'ra'na Allataala, iamo urangKu siana' bura'ne, iamo urangKu siana' bahine na iamo idongKu.”