MARKUS 2 - Kitta' Passitallikang Bau KAREBA BAJI'

Tau pesu' ripakagassing 2:1-12

¹ Maenna injo, sungka'i sikurang allomo, rihattunna Isa muliang mange ri Kapernaum, a'lelemu isse' karebana ma'nassana Isa rie'i ri sapo.

² Jari lohemo tau battu a'domung sa'genna gelemo rie' tampa', manna pole ri a'rakang babaang rassi ngase'. Rihattunna Isa appabattu Pau ri iyai,

³ rie'mo tau ngerang mange ri Ia se're tau pesu', appa' tau a'bule'.

⁴ Mingka gele akkulle laerangi mange ri Isa saba' lohena tau ri injo, jari ngambikimu na ngakka'i ata' riattana Isa; ampai lauloro tau pesu' injo surang tappere tampa' patinroanna tau pesu' injo.

⁵ Sungka'i lajanjang Isa katappakanna, appaumu mange ri tau pesu' injo, ”Oe ana'Ku, lappasamu sikonjo kadorakaammu!”

⁶ Mingka lohe guru Tora' rie' attolong ri injo, na appikiri ngase'i lalang ati,

⁷ ”Ngura tau inni appakonjo pauNa? Ia latua-tuai Allataala. Inaimo akkulle allappasi kadorakaang maraenganna Allataala?”

⁸ Mingka Isa lassiri laisse' ri atiNa ma'nassana appakonjo pikkiranna, jari appaui Isa mange ri iyai, ”Ngura appakonjo pikkiranna atimu?

⁹ Antee lo'morang, rikua mange ri tau pesu' inni: lappasamu sikonjo kadorakaammu, iyareka rikua: Ambaungko, angka'i tappere'mu na a'lingkako?

¹⁰ Mingka solanna muisseki ma'nassana Ana' Rupatau kahasai lallappasi kadorakaang ri lino inni” – Appaui Isa mange ri tau pesu' injo –,

¹¹ ”Mange ri kau Kupaui, ambaungko, angka'i tappere'mu na muliammoko ri sapommu!”

¹² Ambaummu tau injo, na laangka'i tappere'na ampai a'lampa ansulukang ri a'rakanna tau lohe injo, sa'genna takkajanna' ngase' ampai lapakala'biri Allataala. Lakua: ”Nuappakonni inni gelepai minang rijanjang.”

Lewi palele sima minahang ri Isa 2:13-17

¹³ Sungka'i maemmo injo a'lampai pole Isa mange ri biring tamparang la'ba, na tau lohe injo tulusu minahangi ri Ia, jari laajara ngase'mu.

¹⁴ Maeng injo rihattu a'molonna ri injo, Ia lajanjangi Lewi ana'na Alfeus attolong ri tampa' pa'bajarang sima jari appaui Isa mange ri ia, ”Minahangko ri Nakke!” Jari ammentengi Lewi ampai minahang ri Isa.

¹⁵ Maeng injo, sungka'na Isa nganre ri saponna tau injo, lohemo pole palele sima maraeng na tau doraka nganre surang Isa na ana'-ana' gurunNa, saba' lohe tau lapinahangi Isa.

¹⁶ Rihattu injo lohemo guru Tora' battu risossorang Farisi lajanjangi ma'nassana Isa nganre surang palele sima na tau doraka injo, jari appau ngasekimu mange ri ana'-ana' gurunNa, ”Ngura Isa nganre surang palele sima na tau doraka?”

¹⁷ Lalangngere Isa na appaui mange ri iyai, ”Gele tau gassing parallu ile, mingka tau garring; Nakke rie' mae gele laakkeo' tau naba, mingka tau rie' injo kadorakaanna.”

Passala appuasa 2:18-22

¹⁸ Rie' se're hattu ana'-ana' gurunna Yahya na lohe tau Farisi attangngai appuasa, rie'mo sikura tau na lapaui mange ri Isa, ”Ngura ana'-ana' gurunna Yahya appuasai na ana'-ana' gurumMu gelei?”

¹⁹ Lakuamo Isa mange ri iyai, ”Akkulle juaika bahaanna bonting bura'ne injo appuasa ampa rieki juapai ri injo? Ampa assurangi juapai bonting injo, gele akkulle appuasa.

²⁰ Mingka larie' hattunna bonting injo larialle battu ri iyai, na rihattu injomo ampai appuasa.

²¹ Gele rie' manna se're tau nampangi baju toa na kaeng gelepa late lapake nampangi, saba' ampa appakonjo kaeng panampangi injo lalahangkai baju toa injo, jari pela' luaramo sesse'na.

²² Appakonjo todo'i gele rie' manna sitau muna anggoro bau lalang ri pamunaang toa, saba' ampa appakonjo anggoro injo lalabettese pamunaang toa injo, jari panra'mu pamunaanna na ta'burusang todo'i anggoro injo. Mingka anggoro bau injo sibaji'na ripunai lalang ri pamunaang bau todo'.”

Ana'-ana' gurunNa Isa ngattili bae gandong ri allo Passambajangang 2:23-28

²³ Rie' se're allo Passambajangang, Isa surang ana'-ana' gurunNa a'lingka ri koko bae gandong, rihattu a'lingkainna ri injo ana'-ana' gurunNa ngattili bullere bae gandong.

²⁴ Jari appau ngase'i tau Farisi injo mange ri Isa, lakua, ”Janjangi! Ngura appanggeokangi nugele ripa'biang ampa allo Passambajangang?”

²⁵ Lakuamo Isa mange ri iyai, ”Gelepai minang muaji numaeng lageokang injo Daud, rihattunna ia surang tuminahang injo ri ia kapa'reang,

²⁶ anteekamua Daud, rihattunna Abyatar se'rei Imang Bakka', antama' ri Sapo Allataala ampai lakanre roti maeng ri saji injo – nugele akkulle lakanre tau ri maraenganna imang – na lapassareang todo'i mange risikonjo tuminahang ri ia?”

²⁷ Lakuamo pole Isa mange ri iyai, ”Allo Passambajangang ripaa'jari lalapake tau, na gele tau lalapake allo Passambajangang.

²⁸ Saba' Ana' Rupatau iamo Karaeng, manna pole mange ri allo Passambajangang.”