MARKUS 16 - Kitta' Passitallikang Bau KAREBA BAJI'

Isa attallasa muliang 16:1-8

¹ Sungka'i allalomo allo hattu passambajangang injo, Maria Magdalena na maria idonna Yakobus surang Salome mange ammalli rampa-rampa lalaerangi mange ri kuburu na lalaminnyakii Isa.

² Ngesalakale juapai ri allo makase'rena ri sijumaa injo, ri ampana ambassi' matanna allo, a'lampaimu mange ri kuburu.

³ Allagarimu, lakua, ”Inaimo laladoluangki batu bakka' panongko' babaanna kuburu injo?”

⁴ Mingka rihattu seppakinnamo ri kuburu injo, kajanjangammu ma'nassana batu injo maemmu ta'dolu ri babaanna kuburu injo. Batu injo sanna' bakka'na.

⁵ Jari antamakimu ri kuburu injo na lajanjangi rie' se're tau taruna make baju bakka' pute attolong ri sa'ri kanang. Jari sanna' ta'bangkainna,

⁶ mingka appaui taruna injo mange ri iyai, ”Akomo mallaki! Kau mubojai Isa tau nazaret injo, Turisalli' injo. Ia attallasai muliang. Ia tide'mu ri inni. Janjangi! Iamo inni tampa'na lapaonrangi Isa.

⁷ Mingka konni-konnina a'lampaimoko, na jarrungiangi mange risikonjo ana'-ana' gurunNa na mange ri Petrus. Ia riolomu mange ri Galilea; konjopai mange mujanjangi Isa, assimpole numaeng injo lapau Isa mange ri kaui.”

⁸ Jari ansulukangimu na lari labokoi kuburu injo, saba' benterinna na lakahasainna rikajariang injo. Jari gelemu lapau-pau manna mange ri se're tau saba' sanna' mallakinna. [Bodo juai pappasang injo lajarrungiang mange ri Petrus na urang-uranna. Maeng injo Isamo lalang ripassabakang suro-suroNa lapala'bangi battu raja sa'genna kalau' kareba Tangkasa inni na gele akkulle ripakamate passala kasalamakang mannannungang injo.] [

Pinsikurangi Isa lapappijanjangang kalenNa na lasuroi ana'-ana' gurunNa Nai'mu Isa ri Suruga 16:9-20

⁹ Sungka'i attallasamo muliang Isa ringesalakalena juapa ri allo makase'rena ri sijumaa injo, Ia pakaramulamu lapappijanjangang kalenNa mange ri Magdalena. Isa maengi angga'gara setang battu ri ia.

¹⁰ Jari bahine injo tulusu a'lampai lapappiissekang mange ri iyai tuminahang injo ri Isa riolo na rihattu injo attangngai pa'risi kamateang na apparaui.

¹¹ Mingka rihattu lalangngerinna ma'nassana attallasai Isa muliang na maemmu kajanjangang ri ia, gelemu tappa'.

¹² Rimaennamo injo Ia lapappijanjangi kalenNa lalang tappa maraeng mange ri rua ana' gurunNa, rihattunna attangnga lalangi ansulukang kota.

¹³ Jari muliangimu na lapanjarrungangi mange ri ana' gurung maraeng injo, mingka manna iyai pole gele tappa' mange ri tau rua injo.

¹⁴ Rikala'busanna Ia lapappijanjangangi kalenNa mange ri sampuloiya se're suro-suroNa rihattu attangngana nganrei, na Ia lasalla ngase'i pagelena tappa' na paterasa'na atina, rikanara gelena tappa' mange risikuanna tau maeng injo anjanjang ri Ia rihattu attallasa'Namo muliang battu rikamateang.

¹⁵ Jari appaui Isa mange ri iyai, ”A'lampamoko mange risibatu lino, pala'bangi Injili mange risikonjo mahallo'.

¹⁶ Inai tappa' na ririo languppai kasalamakang, mingka inai gele tappa' larihukkungi.

¹⁷ Tanra-tanra inni lalapinahangi sikuanna tau tappa': Akkulle angga'gara setang passabakang arengKu, iyai la'bisara lalang rita'ra pa'bisara bau,

¹⁸ laneteng saa, na manna nginungi rasung appakamate, gelejuai languppa kasilakaang; lambarakkaki sikuanna tau garring, na tau injo akkulle gassing.”

¹⁹ Rimaenna Karaeng Isa a'bisara appakonjo ri iyai, tarangka'mu nai' ri Suruga, ampai attolong risa'ri kananNa Allataala.

²⁰ Na iyai a'lampaimu appala'bang Injili mange risibatu lino, na Karaeng minahangi anjama na lapakasa'ga'i pauNa injo lalang ritanra-tanra lapinahangi injo.]