MARKUS 15 - Kitta' Passitallikang Bau KAREBA BAJI'

Isa ri a'rakanna Pilatus 15:1-15

¹ Ngesala kalejuapai sikonjo imang ponggaha assurangi sikonjo tutoa-toa na sikonjo guru Tora' surang sikonjo uranna Mahkama Agama maraenganna a'rappungi. Maeng injo laranteimu Isa ampai laparapaki mange ri Pilatus.

² Akkuta'nangi Pilatus mange ri Ia, ”Kaumo karaenna tau Yahudi?” Appihali Isa, ”Kau to'juamo mupaui.”

³ Jari sikonjo imang ponggaha assare pitina mange ri Ia.

⁴ Akkuta'nangi pole Pilatus mange ri Ia, ”GeleKo lappihali manna siso'di'? Pilangngeri, sanna' lohe pappitinana mange ri Kau!”

⁵ Mingka Isa gele sikali appihali, sa'genna lannasamo Pilatus.

⁶ A'jari kabiasammu ampa allo passua'-suarang, Pilatus allappasangi se're tau ritarungku assituru' pangeranai.

⁷ Rihattu injo rie' sitau turiareng Barabas ritarungku surang lohe pole tau maraeng uranna maronta'. Iyai injo maengi muno tau lalang rise're pamarontakang.

⁸ Jari rie'mo lohe tau na laerai solanna ia lageokangi passala injo assimpole biasana.

⁹ Appihalimu Pilatus mange ri iyai na akkuta'nangi, ”Apa mukaa'raki solanna kupalappasa karaenna tau Yahudi inni?”

¹⁰ Ia laisse' memammu ma'nassana sikonjo imang ponggaha laparapa'i Isa ripassabakang siriati.

¹¹ Mingka sikonjo imang ponggaha larekesi ngase'i tau lohe injo lalaera solanna Barabasmo ripalappasa ri iyai.

¹² Akkuta'nangi pole sikali Pilatus mange ri iyai, ”Ampa appakonjoi, apamo parallu lakugeokang mange ri tau inni tumuareki injo karaenna tau Yahudi?”

¹³ A'gora ngase'mu, lakua, ”Salli'i Isa!”

¹⁴ Jari appaui Pilatus mange ri iyai, ”Mingka apa geo' sala Ia maeng lageokang?” Mingka pela' bakka'i sa'rannai a'gora, ”Salli'i Isa!”

¹⁵ Saba' Pilatus a'ra'i lapakarannu atina tau lohe injo, jari lapalappasamu Barabas ri iyai, na Isa larabung ampai lapassareang mange ri iyai lalasalliki.

Isa rituai-tuai 15:16-20a

¹⁶ Maeng injo sikonjo sorodadu laerangi Isa mange rijurunna sapo pammarianna Gubernur, na lakeo'i sikonjo pasukanna lasse're.

¹⁷ Lapipakei baju bakka' kamummu' mange ri Isa, na nganangii pole se're songko' kakaraengang nubattu ri katinting na lapisongkokiangi rate ri ulunNa.

¹⁸ Maeng injo pakaramulamu appakala'biri mange ri Isa, lakua, ”Sombangku, oe karaenna tau Yahudi!”

¹⁹ Ngalle bulo ampai larabungang ulunNa, surang lape'rui ampai akkolantu' nyomba ri Ia.

^20a Rimaennamo latua-tuai Isa lapasulukimu baju bakka' kamummu' nulapipakeangi injo na lapipakeangi pole pakeanNa.

Isa risalli' 15:20b-32

^20b Maenna injo laerangimu Isa ansulukang kota larisalli'.

²¹ Rihattu injo rie' se're tau lumalo turiareng Simon, tau Kirene, ammanna Aleksander na Rufus, tuampa rie' battu pantarang kota, na tau injomo lasuro passai lanyompo salli'na Isa.

²² Laerangi Isa mange rise're tampa' nuriareng Golgota, nua'battuang: Tampa' Ka'daroulu.

²³ Maeng injo lasareimu Isa nginung anggoro a'leo' mur, mingka gelei a'ra' lainung.

²⁴ Maenna injo lasalli'mu Isa, ampai labage-bage pakeanNa lagossangi inai languppa dahuang.

²⁵ Ritette' kaassana ngesala lasallikimu Isa.

²⁶ Apa passabakanna ngura narisalli'i Isa rie'i ta'ukuri ri injo: ”Karaeng tau Yahudi.”

²⁷ Ri injo rie' todo' rua tau palukka' uranna Isa risalli', sitau risa'ri kananNa na sitauang injo risa'ri kairinNa. [

²⁸ Ri appakonjona ripa'rupai pauna Kitta' Tangkasa inni nulakua injo, ”Ia larirekengi antama' ri uranna sikuanna tau daa geo'Na.”]

²⁹ Sikuanna tau a'molong ri injo attua-tua ngase'i ri Isa, na lapabihe mori-morina na lakua, ”Oe Kau tua'ra' intu lanroka Sapo Tangkasa na a'ra'i mubaung poleang lalang hattu tallungallo jua,

³⁰ naungKo ri salli' intu na pakasalama'i kalemMu!”

³¹ Appakonjo todo'i pattua-tuainna mange ri Isa sikonjo imang ponggaha assurang-surang sikonjo guru Tora' na lakuai, ”Tau maraeng Ia lapakasalama', mingka kalenNa gele akkulle lapakasalama'!

³² Baji'mu Almase, Karaenna Israele, naungKo battu ri salli' intu konni-konnina solanna tajanjangi latappa'kang.” Injo pole tau rua uranna Isa risalli' attua-tua appakonjo todo'i.

Matei Isa 15:33-41

³³ Ritette' sampulonamo rua ri allona, kalammang kapu'i risiappuna tampa' injo na kajariang injo sa'gennai tette' tallu.

³⁴ Ritette' tallunamo appau bakka'i Isa lakua, ”Eloi, Eloi, lama sabakhtani?” nuabattuang: AllataalaKu, AllataalaKu, ngura Kau a'boko ri Nakke?

³⁵ Lalangngerinna injo, sikura tau rie' ammenteng ri injo appau, ”Janjangimu, Ia langa'ngarai Elia.”

³⁶ Maenna injo rie'mo se're tau mange na allomai nuassimpole bunga bassa lalang ri anggoro kassi injo ampai laka'bakang ri bulo na lasarei Isa nginung na lakua, ”Baji' ritajangi na rijanjangi barang rie'i Elia lapanaungi ri salli' injo.”

³⁷ Jari appau bakka'i Isa na lapassareammu nyahaNa.

³⁸ Rihattu injo ampang-ampang rie' injo ri Sapo Tangkasa bissa' ta'bage ruai battu rate sa'genna appa' rahana.

³⁹ Rihattunna ponggaha pasukang ammenteng injo ri a'rakanNa lajanjang kajariang lappasa'na nyahana Isa assimpole injo, appaumu, ”Toje'i tau inni Ana' Allataala!”

⁴⁰ Rie' todo' sikura bahine anjanjang dere, ri injo rie'i Maria Magdalena, Maria idonna Yoses na Yakobus longko injo juapa, surang Salome.

⁴¹ Iyai ngase'mo injo lapinahangi Isa na lajampangi Isa rihattunna Isa ri Galilea. Lohe todo' bahine maraeng rie' ri injo battu ri Yerusalem lapinahangi Isa.

Isa ripantama' ri kuburu 15:42-47

⁴² Rihattu injo pakaramulamu bangngi na allo injo allo pappasadiaang, iamo intu lamba'na allo Passambajangang.

⁴³ Injomo saba'na Yusuf, tau Arimatea injo, se'rei ri uranna Majelis Bakka' rikangalikang, tuattajang todo' ri Pakkaraengang Allataala, lapa'baraniang kalenna mange ri Pilatus na laerai batangkalenna Isa.

⁴⁴ Lannasai Pilatus rihattu lalangngere'na ma'nassana matemu Isa. Jari lakeo'i ponggaha pajaga injo na akkuta'nangi mange ri ia toje'i matemu Isa.

⁴⁵ Sungka'i lalangngere pauna ponggaha pajaga injo, ia lapassareammu batangkalenna Isa mange ri Yusuf.

⁴⁶ Yusuf ammalli todo'i kaeng alusu, maeng injo ia lapanaungi batangkalenna Isa battu ri salli' na laroko'i surangang kaeng alusu injo. Maeng injo ia lapaonrangi batangkalenna Isa lalang ri kuburu ta'keke ri batu a'poong. Maeng injo lapandoluangi se're batu panongko' mange ri babaanna kuburu injo.

⁴⁷ Maria Magdalena na Maria idonna Yoses lajanjangi ri antee Isa ripaonrang.