MARKUS 13 - Kitta' Passitallikang Bau KAREBA BAJI'

PASSALA 13 HATO'BA RIPASSALA ALLO KALA'BUSANG Sapo Allataala larisosara 13:1-2

¹ Rihattu ansulu'namo battu ri Sapo Allataala, rie' se're ana' gurunNa appau mange ri Ia, ”Guru, janjangimu anteekamua bakka'na batu-batu inni na anteekamua balloinna sapo intu!”

² Jari lakuamo Isa mange ri ia, ”Mujanjangi sapo ballo inni? Gele larie' manna se're batu larilappasang a'lonjo' ri bahonna batu maraeng, larisosara ngase'i.”

Pakaramulana kasissaang 13:3-13

³ Rihattu attolonna Isa rate ri baho Bonto Zaitun, laa'raki Sapo Allataala, Petrus, Yakobus, Yahya surang Andreas akkuta'nangi mange ri Ia,

⁴ ”Pauwangkang mae, sikuraiyamo nakajariangi, na apa pattanraanna, ampa iangase'na injo larapi'mu hattu kala'busanna.”

⁵ Jari pakaramulamu Isa appau mange ri iyai, ”Ngu'rangiko solanna anda rie' tau lapakalinguiko!

⁶ Lalohe tau rie' mae lapake arengKu na lakua: Nakkemo Ia, na iyai injo laappakalingu lohe tau.

⁷ Ampa allangngereko sa'ra pa'bundukang iyareka kareba passala pa'bundukang, akolalo balisai. Iangase'na injo parallui laa'jari, mingka gelepa injo kala'busanna.

⁸ Saba' tau lohe laasibaliang tau lohe na pakkaraengang laasibaliang pakkaraengang. Laa'jari anggeong sarroi tana ri lino ri antee-tee mae tampa', na larie' kalara' bakka'. Iangase'na injo ampamo pakaramulana kasissaang rilarie'namo jammang bau.

⁹ Mingka kau inni, tutulaloko! Kau laripassareangiko mange ri pangadelang agama; larirabungiko ri sapo passambajanganna na lariparapa'ko mange risikonjo gubernur na risikonjo karaeng kanara ri Nakke, assimpole se're passa'bi mange ri iyai.

¹⁰ Mingka Injili parallui ripappiissekang la'bi riolo mange risikuanna tau.

¹¹ Ampa rirenrengko na ripassareang, akomo bata-bata ri apa nuparallu lamupau, mingka paui apa nuripassareang injo ri kau rihattu injo, saba' gele kau a'bisara, mingka Nyaha Tangkasa.

¹² Se're urang siana' lalapassareang uranna siana' larihuno, appakonjo todo'i se're amma ri ana'na. Na sikonjo ana' lalabaliangi tau toana na lalahunoi.

¹³ Larikalikingangiko risikuanna tau kanara ri arengKu. Mingka tau attahang injo sa'genna rikala'busanna injo lasalama'i.”

Sissaang sarro na lohe Almase palusu 13:14-23

¹⁴ ”Ampa mujanjangi pamanraki nulaappakamate ammenteng ri tampa' nugele siratang – sikonjo paaji parallui lapipahangi – jari sikuanna tau ri Yudea parallui a'lampa nai' ri bonto.

¹⁵ Tau rie' injo ri pa'buhungang sapo andalaloi naung na antama' langalle manna apa jua ri saponna,

¹⁶ na tau rie' injo ri koko andalaloi muliang ri sapo langalle pakeanna.

¹⁷ Silakamu sikonjo bahine tianang iyareka tuappasusu injo ana' lolo rihattu injo.

¹⁸ Ngera dowaangiko, solanna iangase'na injo andai kajariang rihattu anranna'na bosi.

¹⁹ Saba' rihattu injo lakajariangi assimpole nugelepa maeng kajariang minang riuruna ripaa'jari lino, nulapaa'jari injo Karaeng Allataala, sa'genna rikonni-konnina na gelemu laa'jari pinruang.

²⁰ So'di injo Karaeng Allataala, gele labodoi hattu injo, jari gelemo rie' tau laripakasalama'; mingka kanara risikuanna tau pileang numaeng ripile injo ri Ia, Karaeng Allataala labodoi hattunna.

²¹ Rihattu injo ampa rie' tau appau mange ri kaui: Janjangi, Almase rie' ri inni, iyareka: Janjangi, Almase rie'i konjomange, akomo tappa'.

²² Saba' lohe Almase palusu na lohe todo' nabbi palusu laammumba na iyai laa'bua'i tanra-tanra surang nugele samara, solanna so'di injo ma'ringi, laappakalingu ri tau ripile injo.

²³ Tutulaloko! La'bi riolomu maeng Kupau iangase'na inni mange ri kaui.”

Pariekanna Ana' Rupatau Pakkalebarang ripassala poong kaju ara 13:24-32

²⁴ ”Mingka rihattu injo, ri maenna sessaang injo latide'mo matanna allo na bulang tide'mo saunna

²⁵ na sikonjo bintoeng laa'dappeki battu ri langi', na sikonjo kahasa ri langi' langgeong.

²⁶ Rihattu injo tau inni lanjanjang Ana' Rupatau rie'i ri salihu' lalang risikonjo kakahasaang na kala'biranNa.

²⁷ Rihattu injo Ia lalasuro ansulu' sikonjo malaeka' na lalaparappungi sikuanna tau pileanNa battu ripatangsulapa'na lino, battu riappa'na lino sa'genna mange riappa'na langi'.

²⁸ Allei pappilajarang battu ripakkalebarang poong kaju ara injo. Ampa lumui tangke-tangkenna na pakaramulamu assu'la', muisse'i ma'nassana gelemu sallo nabambangi allo.

²⁹ Appakonjo todo'i, ampa mujanjangi passala injo a'jari, piisseki ma'nassana gelemu sallo hattunna, rie'mu ri a'rakang babaang.

³⁰ Sitoje'na Nakke appau ri kaui: Sikuanna tau rie' rikonni-konnina gele laallalo, rigelenapa a'jari iangase'na injo.

³¹ Langi' na lino laallalo, mingka pauKu gelei lallalo.

³² Mingka passala allonna iyareka hattu injo gele rie' manna se're tau laisse'i, sikonjo malaeka' ri Suruga gele laisse', na manna Ana' gele todo'i, sangga Amma jua laisse'i.”

Pappiu'rangi solanna a'jaga-jaga 13:33-37

³³ ”Tutuko na a'jaga-jagako! Saba' gele muisse' sikuraiya nalarapi' hattunna.

³⁴ Hattu injo assimpole juai tau a'lampa-lampa, labokoi saponna na assare tanggongjawa' mange risikonjo atanna, massing-massing rijama-jamaanna, na assare parenta ripajaga babaang solanna a'jaga-jaga.

³⁵ Kanara injomo a'jaga-jagaiko, saba' gele muisse' risikuraiya hattu nalamuliangi opuna sapo, rilabangngina, iyareka ritangnga bangngina, iyareka ridanniarina, iyareka rirahungkalena juapa,

³⁶ solanna ampa sikali rie'i andako kauppaang attangnga tinro.

³⁷ Apa Kupau mange ri kaui, Kupau todo'i mange risikuanna tau: A'jaga-jagaiko!”