MARKUS 11 - Kitta' Passitallikang Bau KAREBA BAJI'

Isa ripakala'biri ri Yerusalem 11:1-11

¹ Rihattu seppa'namo Isa surang ana'-ana' gurunNa ri Yerusalem, riampi'na Betfage na Betania nurate injo ri bontona Zaitun, Isa lasuro rua suro-suroNa

² na lapasangi, ”A'lampaiko mange ri desa rie' injo ri a'rakammu intu. Rihattu antama'mu ri injo, lanrumpa'ko sikaju kaladai longko tattambang, na nugelepa minang labai tau. Lekkesi tambanna kaladai injo na muerangi mae.

³ Ampa rie' tau appau mange ri kau: Ngura mugeokangi intu, appakonni pappihalimmu: Laparalluangi Isa. Lalassiri juai kupahuliang mae konni.”

⁴ Jari a'lampamu, na anrumpa' toje'i sikaju kaladai longko tattambang pantarang riampi' babaang, ri biring lalang, ampai lalekkesi tambanna.

⁵ Rie' sikura tau ammenteng ri injo appau mange ri iyai, ”Apa mugeokang intu? Ngura mulekkesi tambanna kaladai intu?”

⁶ Jari appihalimu assimpole numaeng lapauwang injo Isa, jari sikuanna tau rie' ri injo lapa'biangi laerang kaladai injo.

⁷ Jari laerangimu kaladai longko injo mange ri Isa, na pakeannai lapake allapa', maeng injo nai'i Isa a'bai.

⁸ Lohemo tau lapaapara pakeanna ri tangnga lalang, rie' todo' tuattalasa tangke-tangke basa nuampa latattaki ri koko.

⁹ Sikuanna tau a'lingka ri a'rakanNa na iyai tuminahang injo a'lingka ribokoNa a'gora-gora, ”Hosana! Pakala'biri Ia turie' injo lalang arenna Karaeng Allataala,

¹⁰ pakala'biri Pakkaraengang rie' injo, Pakkaraenganna ammanta Daud, Hosana ri tampa' kaminang la'biri!”

¹¹ Riambattunamo ri Yerusalem, antama'i Isa ri Sapo Allataala. Ri injo Ia laparessai iangase'na, mingka kanara labangngimu, Ia ansulu'i na mange ri Betania surang sampuloiya rua suro-suroNa.

Isa attadea poong kaju ara 11:12-14

¹² Rimintara'namo mae rihattunna Isa surang sampuloiya rua suro-suroNa labokoi Betania, appisa'ringi pa're Isa.

¹³ Dere juapai Isa anjanjangi poong kaju ara nulohemo tahana. Laseppaki poong kaju ara injo lalajanjangi barang komo apa nanguppai bua ri poong kaju ara injo. Mingka rihattu ambattunamo ri injo, Ia gele anrumpa' bua passangadinna taha jua rombong, saba' toje'i gele hattu pambuana poong kaju ara injo.

¹⁴ Lakuamo Isa mange ri poong kaju ara injo, ”Gelemo larie' tau lalakanre buamu situlusu'na!” Lalangngere todo'i suro-suroNa.

Isa appakatangkasa Sapo Allataala 11:15-19

¹⁵ Jari ambattumo Isa surang ana'-ana' gurunNa ri Yerusalem. Sungka'na antama' Isa ri Sapo Allataala, pakaramulamu ambongka sikuanna tau a'balu'-balu' ri jurunna Sapo Allataala. Ia lapatua'-tuasa ngase'i mejang panukarang doe' surang bangko-bangkona padanggang bangkeng bodo injo,

¹⁶ na Ia gele lapa'biang tau inni ngerang barang-barang a'molong ri jurunna Sapo Allataala.

¹⁷ Maeng injo Ia laajara ngase'i, lakua pauNa, ”Gelejua rie' ta'ukiri: SapongKu lariare' sapo pangera dowaang mange ri sikuanna tau? Mingka kau inni mupaa'jari pammariang palukka'!”

¹⁸ Sikonjo imang ponggaha na sikonjo guru Tora' lalangngere passala injo, na a'bojamu akkala daa lalahuno Isa, saba' iyai malla'i ri Isa, saba' tau lohe injo sanna' lannasinna ripangajaranNa.

¹⁹ Rihattu labangnginamo, ansulukangi pole battu ri kota injo.

Poong kaju ara kalotoro injomo Pappiu'ranginna Isa ripassala pangera dowaang 11:20-26

²⁰ Ngesala kalejuapai Isa surang ana'-ana' gurunNa a'molong, lajanjangimu poong kaju ara injo sumpae' a'jari kalotoro ngase' tahana sa'genna aka'na.

²¹ Jari lau'rangimu Petrus na appaui mange ri Isa, ”Guru, janjangsai, poong kaju ara nuMutadea injo kalotoromu.”

²² Lakuamo Isa mange ri iyai, ”Tappa'ko ri Allataala!

²³ Sitoje'na Nakke appau mange ri kaui: Inai jua appau mange ri bonto inni: Tarangka'ko na taramballungko naung ri tamparang! assala tide' bata-bata ri atina, mingka tappa'i ma'nassana apa nulapau injo laa'jari, a'jari toje'i passala injo ri ia.

²⁴ Injomo saba'na Nakke appau mange ri kaui: Apa jua muera lalang ri dowaang, tappa'moko ma'nassana passala injo larisareangi mange ri kau.

²⁵ Ampa ammentengiko langera dowaang, ampungi riolo ampa rie' tau rie' salana ri kau, solanna Ammammu laampungi todo'i sikonjo kasalaammu.” [

²⁶ Mingka ampa geleko assare ampung, Ammammu ri Suruga gele todo'i laampungi sikonjo kasalaammu.]

Pakkuta'nang ripassala kahasa ri Isa 11:27-33

²⁷ Jari rie'mu isse' Isa surang ana'-ana' gurunNa ri Yerusalem. Rihattu a'lingkana Isa ri jurunna Sapo Allataala, mange ngase'mu guru Tora' surang imang ponggaha na tutoa-toa injo,

²⁸ na akkuta'nangi mange ri Ia, ”Lalang kahasa anteeang mupake anggeokang risikuanna injo? Inai assare kahasa mange ri Kau, sa'genna akkulle Mugeokang passala injo?”

²⁹ Lakuamo Isa mange ri iyai, ”Nakke laakkuta'nang todo' mange ri kau. Pauwanga pappihalinna, jari Kupau todo'i ri kau lalang rikahasa anteeang na Kugeokangi passala injo.

³⁰ Panriona Yahya, battu ri Suruga iyareka nubattu ri rupatau? Sarea pappihali!”

³¹ Allagara ngase'mu, na lakuai, ”Ampa rikua: Battu ri Suruga, Ia tantu lakuana: Ampa appakonjo, ngura geleiko tappa' ri ia?

³² Mingka tantu gelena larikua: Nubattu ri rupatau jua!” Sanna' mallakinna mange ri tau lohe injo, saba' sikuanna tau larapangi Yahya Pario toje'i se're nabbi.

³³ Jari lakua ngase'mo ri Isa, ”Gele taisse'.” Lakuamo Isa mange ri iyai, ”Ampa appakonjo, Nakke gele todo'i laKupau mange ri kau lalang kahasa anteeang Kugeokangi passala injo.”