MARKUS 10 - Kitta' Passitallikang Bau KAREBA BAJI'

Passipelakang 10:1-12

¹ Battu ri injo a'lampai Isa mange ri tana Yudea na ri tana ha'leanna Balang Yordan na lohemo isse' tau battu a'domung riampi'Na; na assimpole biasana Ia laajarai pole.

² Jari rie'mo lohe tau Farisi, na lalaso'ri Isa jari akkuta'nangimu mange ri Ia, ”Apa se're inni bura'ne akkulle lapela' bahinenna?”

³ Mingka pappihalinna Isa mange ri iyai, ”Apa nulapassurang injo Musa mange ri kau?”

⁴ Lakuamo, ”Musa lapa'biangi se're inni bura'ne lapela' bahinenna ampa lapa'buakangi sura' talla'.”

⁵ Jari appaui Isa mange ri iyai, ”Saba' pammate terasa'na atimu jari Musa laukiri parenta inni mange ri kau.

⁶ Sitoje'na minang ripakaramulana lino inni, Allataala appaa'jari bura'ne na bahine,

⁷ injomo saba'na se're inni bura'ne lalabokoi ammanna surang idonna na assialle surang bahinenna,

⁸ jari ruaiya a'jarimu se're batangkale. Ri appakonjona iyai injo gelemo rua mingka se're.

⁹ Injomo saba'na apa numaeng lapasse're Allataala gele akkulle lapassipelakang rupatau.”

¹⁰ Rihattunnamo ambattui ri sapo, akkuta'nangi pole ana'-ana' gurung injo mange ri Isa ripassala injo.

¹¹ Jari lakuamo Isa mange ri iyai, ”Inai jua lapela' bahinenna ampai a'bonting ri bahine maraeng, ia assangkili mange ri bahinenna.

¹² Ampa rie' bahine lapela' bura'nenna na a'bontingi ri bura'ne maraeng, ia assangkili mange bura'nenna.”

Isa ambarakkaki ana'-ana' 10:13-16

¹³ Rie'mo tau ngerang ana'-ana' ki'di' mange ri Isa, solanna labarakkaki ngase'i Isa, mingka ana'-ana' gurunNa lapisangkai tau lohe injo.

¹⁴ Lajanjanna passala injo, kuku'i Isa na appaui mange ri iyai, ”Lappasangi ana'-ana' ki'di' intu battu mae ri Nakke, ako muampangi, saba' tau assimpole injomo inni lalaampunnai Pakkaraengang Allataala.

¹⁵ Sitoje'na Nakke appau mange ri kaui: Inai jua gele anruppai Pakkaraengang Allataala assimpole ana'-ana' ki'di' inni, ia gele laantama' ri injo.”

¹⁶ Jari laraka'i Isa ana'-ana' ki'di' injo na lataro limanNa rateang ulunnai tanra pambarakkaki.

Tau kalumannyang inni sukkarai antama' ri Pakkaraengang Allataala 10:17-27

¹⁷ Rihattunna Isa latarrusang pa'lingkaanNa, rie'mo se're tau allari anruppai ri Ia na akkolantu'i ri a'rakanNa ampai akkuta'nang, ”Guru tubaji', apamo parallu kugeokang lakuuppai tallasa mannannungang?”

¹⁸ Appihalimu Isa, ”Ngura mupaui Nakke tubaji? Gele rie' manna se're tau baji' passangadinna Allataala jua.

¹⁹ Tantu muisse'na sikonjo parenta inni: Akolalo muno, akolalo assangkili, akolalo a'lukka', akolalo assare sa'bi gele naba, akolalo tipui parammu tau, ngali'ko ri ammammu na ri idommu!”

²⁰ Jari lakuamo tau injo mange ri Isa, ”Guru, iangase'na injo maeng kugeokammu minang ri ana'-ana'ku juapa.”

²¹ Mingka latangarai Isa tau injo na lakamaseangi, jari appaui mange ri ia, ”Rie'pa se're nukurang ri kau: A'lampako, na balukangi sikuanna pa'barang-barangammu na pa'dahu-dahuangi mange risikuanna tau kaasi-asi, jari nguppako pa'barang-barangang ri Suruga, maeng injo maeko konni na minahangko ri Nakke.”

²² Rilalangngere'na pau injo pi'lasamu rupanna, ampai a'lampa lalang ri kapa'risang, saba' tau kalumannyangi.

²³ Jari Isa latangarai ana'-ana' gurunNa rie' injo ri ampi'Na na appaui mange ri iyai, ”Sukku' terasa'na tau kalumannyang inni laantama' ri Pakkaraengang Allataala.”

²⁴ Kaliru ngase' ana'-ana' gurunNa lalangngere'na pau injo. Mingka appaui pole Isa, ”Ana'-ana'Ku, sukku' terasa'na antama' ri Pakkaraengang Allataala.

²⁵ La'bi lo'morangi sikaju unta a'molong ri balo jarung na tukalumannyang antama' ri Pakkaraengang Allataala.”

²⁶ Jari pela' lannasamu ana'-ana' gurunNa na assilagari, ”Ampa appakonjo, inaimo akkulle ripakasalama'?”

²⁷ Latangarai Isa na appaui, ”Ri rupatau inni passala injo gele ma'ring, mingka gele appakonjo ri Allataala. Saba' sikuanna ma'ringi Allataala.”

Sahala minahang ri Isa 10:28-31

²⁸ Jari appaui Petrus mange ri Isa, ”Kambe inni tabokoi ngase'mu anumba na minahangkang ri ditte!”

²⁹ Appihali Isa mange ri ia, ”Sitoje'na Nakke appau mange ri kaui, sikuanna tau passabakang ri Nakke na rikanara Injili na labokoi saponna, iyareka urang siana' bura'nena iyareka urang siana' bahinena, iyareka idonna iyareka ammanna, iyareka ana'-ana'na, iyareka kokonna,

³⁰ tau injo rihattu inni jua na latarimai muliang a'lappi sibilangang: sapo, urang siana' bura'ne, urang siana' bahine, idong, amma, ana' na koko manna injo lapinahangi kasissaang, na sallo' lanarimai tallasa mannannungang.

³¹ Mingka lalohe tau kaminang riolo laa'jari kaminang riboko na tukaminang riboko injo laa'jari kaminang riolo.”

Makapintallunna lapappiissekang passala kasissaanna Isa 10:32-34

³² Isa na ana'-ana' gurunNa attangnga lalangimu lamange ri Yerusalem na Isa a'lingkai ri a'rakang. Bentere ngase'i ana' gurunNa na tau lohe minahang injo ri Ia battu ri boko mallaki todo'i. Sikalipa pole Isa lakeo'i sampuloiya rua suro-suroNa na pakaramulamu Isa lapau mange ri iyai apa nulaa'jari ri kalenNa,

³³ ”Konni-konnina a'lampaki mange ri Yerusalem na Ana' Rupatau laripassareangi mange risikonjo imang ponggaha surang risikonjo guru Tora', na iyai lalasare hukkungang mate mange ri Ia. Iyaimo lalapassareangi mange ri tau maraeng,

³⁴ na Ia laritua-tuai, laripe'rui, larirabungi na larihuno, mingka ri allo makatalluna Ia laattallasai muliang.”

Pangerana Yakobus na Yahya Gele lamarenta mingka lanjampangi 10:35-45

³⁵ Jari Yakobus surang Yahya, ana'-ana'na Zebedeus, laseppaki Isa na appaui mange ri Ia, ”Guru, taminasai ri Kau bisannabali narigeokangi ri nutaera injo ri Kau!”

³⁶ Appihali Isa mange ri iyai, ”Apa mukaa'raki Kugeokangi ri kau?”

³⁷ Lakuaimo, ”Ripa'biangkang attolong lalang rikala'biranTa sallo', se're risa'ri kananTa na se're risa'ri kairinTa.”

³⁸ Mingka appaui Isa mange ri iyai, ”Gele muisseki numuera injo. Makala akkulle juako laminahang rikasissaang nuparallu injo laKupa'lalangi iyareka ri panrio nuparallu injo laKutarima?”

³⁹ Pappihalinnai, ”Akkullekang.” Appaui Isa mange ri iyai, ”Toje'i, laminahangiko rikasissaang laKupa'lalangi injo na lanrioiko ripanrio laKutarima injo.

⁴⁰ Mingka passala attolong risa'ri kanangKu iyareka risa'ri kairingKu, Nakke tide' pakkulleKu laassare. Injo risareangi mange risikuanna tau numaeng ripasakadiaang injo mange ri ia.”

⁴¹ Lalangngere'na injo kukukimu sampuloiya suro-suro maraeng mange ri Yakobus na ri Yahya.

⁴² Jari Isa lakeo' ngase'i na appaui, ”Muisse'i ma'nassana turiakui injo assimpole pamarenta risikuanna tau lapalingka kahasana assimpole karaeng ri jannanganna, na sikuanna tau kahasa lalisakangi.

⁴³ Gele appakonjo ri kaui. Inai jua a'ra' a'jari lakaminang bakka' ri kaui, parallui a'jari pajampangimmu,

⁴⁴ na inai jua a'ra' a'jari lakaminang rate, parallui lapaa'jari ata kalenna.

⁴⁵ Saba' Ana' Rupatau rie'i gele larijampangi, mingka lanjampangi na lalapassareangi nyahaNa a'jari pallappasi kadorakaang rilohe tau.”

Isa lapakaanjanjangi Bartimeus 10:46-52

⁴⁶ Jari ambattumu Isa surang ana'-ana' gurunNa ri Yerikho. Sungka'i ansulu' Isa ri Yerikho surang ana'-ana' gurunNa na lohe pole tau a'rurung-rurung minahang, rie'mo se're paera-era buta, turiare' Bartimeus attolong ri biring lalang.

⁴⁷ Sungka'i lalangngere ma'nassana tua'molong injo iamo Isa tau battu injo ri Nazaret, pakaramulamu a'nga'ngara, ”Isa Ana' Daud, rikamaseanga!”

⁴⁸ Lohe tau appisangka solanna ammakkang. Mingka pela' bakka'i sa'ranna a'nga'ngara, ”Ana' Daud rikamaseanga.”

⁴⁹ Jari attaangi Isa ampai appau, ”Keo'i mae!” Jari lakeokimu tau buta injo na appaui mange ri ia, ”Pakasa'ga'i nyahamu, na ammentengko, Ia lakeo'ko.”

⁵⁰ Tau buta injo lataro baju bakka'na, ampai lassiri ammenteng na a'lingkai mange ri Isa.

⁵¹ Pakkuta'nanna Isa mange ri ia, ”Apa mukaa'raki ri Nakke laKugeokangi ri kau?” Pappihalinna tau buta injo, ”Guru, a'ra'a kodong anjanjang!”

⁵² Jari appaui Isa mange ri ia, ”A'lampamoko, tappa'mu lapakasalama'ko!” Rihattu injo jua na akkullei anjanjang matanna, jari minahammu ri Isa ripa'lingkaanNa.