MARKUS 1 - Kitta' Passitallikang Bau KAREBA BAJI'

Yahya Pario 1:1-8

¹ Iamo inni pakaramulana Injili passala'na Isa Almase, Ana' Allataala.

² Assimpole rie' ta'ukiri lalang ri kitta' Nabbi Yesaya: ”Janjangimu, Kusuro lapirioloiKo suroKu, ia lappakasadia pamolongang ri Kau;

³ rie' sa'ra bakka' a'nga'ngara ri parang luara: Pakasadiaangi pamolonganna Karaeng Allataala, lambusiangi pa'lalanganna”,

⁴ appakonjomu Yahya Pario rie' ri parang luara na lapappiissekangi: ”Jarrako na panriowang pajarra langampungi kadorakaang ri Allataala.”

⁵ Jari lohemo tau rieki mange ri ia battu ri Yudea na sikuanna taunna Yerusalem, na ampa laani kadorakaanna ririo ri ia ri Balang Yordan.

⁶ Pakeanna Yahya nubattu ri bulu unta na panga'ba' aja'na nubattu ri kukkulu, nulakanre katimbang jua na ere bani.

⁷ Ia lapappiissekang appakonjo, ”Ribokoangangku larie' Tula'bi kahasa battu ri nakke; manna laa'doko na lallekkesi tulu' sandalaNa nakke gelea siratang.

⁸ Nakke ere jua kupario tau, mingka Ia Nyaha Tangkasa lapake anrio tau.”

Isa ririo ri Yahya 1:9-11

⁹ Rihattu injo rie'mu Isa battu ri Nazaret ri tana Galilea, na Ia ririo ri Yahya ri Balang Yordan.

¹⁰ Rihattu nai'Na ri balang injo, lajanjangi tassungke langi', na Nyaha Tangkasa attanja' bangkeng bodo turung ri ulunNa.

¹¹ Maeng injo rie'mo sa'ra kalangngerang ri Suruga, ”Kaumo Ana'Ku turikamaseang, ri Kaumo Nakke angngai.”

Isa riso'ri ri parang luara 1:12-13

¹² Gele sallo maenna injo Isa rierang ri Nyaha Tangkasa mange ri parang luara.

¹³ Ri parang luara injomo patampulo allo sallona Ia riso'ri ri Ibilisi. Ia ammari ri injo assurangi sikonjo binantang lambara na sikonjo malaeka' lanjampangi ri Ia.

Isa rie' ri Galilea 1:14-15

¹⁴ Sungka'i rijakkala Yahya rie'mu Isa mange ri Galilea laappala'bang Injili Allataala,

¹⁵ pauNa: ”Larapi'mu hattunna; seppa'mu Pakkaraengang Allataala. Jarrako na tappa'ko ri Injili.”

Isa akkeo' ana'-ana' gurung 1:16-20

¹⁶ Rihattunna Isa attete ri biring tamparang la'bana Galilea, lajanjangi Simon na Andreas uranna siana'. Attangnga ngase'i a'lanra' juku' ri tamparang la'ba injo, saba' iyai palanra' juku'.

¹⁷ Appaumu Isa mange ri iyai, ”Maeko, minahangko ri Nakke laKupaa'jari ngase'ko palanra' rupatau.”

¹⁸ Jari lassirimu labokoi lanra'na na minahangi ri Isa.

¹⁹ Gele dere battu ri injo, Isa lajanjangi Yakobus ana'na Zebedeus na Yahya uranna siana', attangnga latangkasi lanra'na ri lopi.

²⁰ Rikeo' ngase'i ri Isa na labokoi Zebedeus ammanna rate ri lopi na sikuanna tau pasahala'na ampai minahangi ri Isa.

Isa ri sapo passambajangang ri Kapernaum 1:21-28

²¹ Ambattumu Isa surang ana'-ana' gurunNa ri Kapernaum. Sungka'i allo Passambajangang, lassirimu Isa antama' ri sapo passambajangang na ngajarai ri injo.

²² Rilalangngere'na lannasai tau lohe injo, saba' laajara ngase'i assimpole tau rie' kahasana, gele assimpole sikonjo guru Tora'.

²³ Rihattu injo lalang ri sapo passambajangannai, rie' se're tulapantamai setang. Appau bakka'mu tau injo:

²⁴ ”Apa passilolonganTa mae ri kambe, oe Isa tau Nazaret? Apa rie'Ki mae konni laMuhunokang? Kuisse'Ki: Tutangkasa battu ri Allataala.”

²⁵ Mingka riga'garai ri Isa, ”Oe ammakkangko, ansulu'ko battu ri ia!”

²⁶ Setang injo lapakaambibi-bibi tau injo, na akkariu' bakka'i ampai ansulu' battu ri tau injo.

²⁷ Lannasa ngase'i, sa'genna lalagara, lakua, ”Apa inni? Se're ajarang bau nulapinahang kahasa! Ia assare parenta mange risikonjo setang na turu' ngase'i mange ri Ia!”

²⁸ Maenna injo takkarebamu mange-mange passala'Na risikonjo tana Galilea.

Isa lapakagassingi matoang bahinena Petrus na lohe pole tau maraeng 1:29-34

²⁹ Riansulu'na Isa surang Yakobus na Yahya battu ri sapo passambajangang injo a'lampai mange ri saponna Simon na Andreas.

³⁰ Matoang bahinena Simon tinro-tinroi saba' rammungi. Lapiissekiangi mange ri Isa.

³¹ Mangei Isa ri patinroanna bahine injo, na latetengi limanna ampai lapabaung, jari lannya'mu garrinna bahine injo. Maeng injo lapa'daha-dahaangimu bahine injo.

³² Sungka'i labangngi, lohemo tau garring surang tau lapantamai setang rierang mange ri Isa.

³³ Sikuanna tau assinna kota injo asse're ri a'rakang babaang saponna Simon.

³⁴ Isa appakagassing lohe tau garring surang lohe rupanna kagarringang na lohe todo' rupanna setang laga'gara; gele lapa'biang sikonjo setang allagara saba' iyai laisse'i Isa.

Ngajarai Isa ri kota-kota maraeng 1:35-39

³⁵ Ngesala kalejuapai, saba' kalammang juapai, ambaummu Isa na ansulukang kota. Ia a'lampai mange ri tampa' sino na ngera doawaangi.

³⁶ Mingka Simon surang bahaanna mange laboja.

³⁷ Sungka'i lauppai, appauimu mange ri Isa, ”LabojaKi tau lohe injo.”

³⁸ Pappihalinna, ”Maemoko na a'lampaki ri tampa' maraeng, mange risikonjo kota seppa' injo ri inni, solanna appala'banga Injili konjomange, saba' iamo injo na Nakke rie' mae.”

³⁹ Jari a'lampamu Isa lapila'bangi Galilea appa'labang Injili lalang risikonjo sapo passambajangang na ambongkai lohe rupanna setang.

Isa appakamole se're tau garring kattakang 1:40-45

⁴⁰ Rie'mo se're tau kattakang mange ri Isa, na joppa'i ri a'rakanNa ampai ngera tulung ri Isa, lakua, ”So'di a'ra'Ki, Ditte akkulle appakamole ri nakke.”

⁴¹ Jari rie'mo ri atina Isa saba' pangamaseang. Lapatanjo limanna Isa, lateteng tau injo na lakua mange ri ia, ”Nakke a'ra'a, jari tangkasamoko.”

⁴² Rihattu injo toje' jua sikali lannya'i garring katta'na tau injo jari molemu garrinna.

⁴³ Jari lassirimu lasuro tau injo a'lampa lalang pau terasa,

⁴⁴ ”U'rangi, akolalo lagarai manna mange ri inai jua, mingka a'lampamoko, na pappijanjangangi kalemmu mange ri imang na akkoro'bangko tanra molena garrimmu panangkasi rigarrimmu assituru' nulaparenta injo Musa, laa'jari tanra ri iyai.”

⁴⁵ Mingka tau injo a'lampai na lapappiissekangi sikonjo kajariang surang lapaui mange-mange, jari Isa gelemu akkulle antama' ri kota. Ia ammarimamo pantarang kota ri tampa' sino; mingka tulusu lohe tau mange ri Ia battu risikonjo kampong surang kota.