LUKAS 9 - Kitta' Passitallikang Bau KAREBA BAJI'

Lapalampai Isa sampuloiya rua suro-suro 9:1-6

¹ Isa lakeo'i sampuloiya rua suro-suroNa, ampai assare tangkahuku na kahasa mange ri iyai laappakatunru' sikonjo rupanna setang surang laappakagassing tau garring.

² Ia lasuro ngase'i a'lampa laappala'bang Pakkaraengang Allataala na laappakagassing tau garring.

³ Lakua pauNa mange ri iyai, ”Akomo ngerang-ngerangi ripa'lingkaammu, akomo ngerang tukkang iyareka purukang pamunaang bokong, kanre iyareka doe', iyareka pakeang passaling.

⁴ Ampa rie' latarimako ammari lalang rise're sapo, ammariko ri injo sa'gemmu a'lampai pole battu ri injo.

⁵ Ampa rie' tau geleko a'ra' latarima, ansulu'ko ri kotana na paka'kasai limpurang ri pala' bangkemmu laa'jari pappiu'rangi mange ri iyai.”

⁶ Jari a'lampaimu na lainroi ngase'i sikonjo desa ampai appala'bang Injili na ri antee-tee juai mae appakagassingi tau garring.

Herodes na Isa 9:7-9

⁷ Herodes se'rei karaeng, ri tana Galilea, lalangngere ngase'i sikonjo numaeng kajariang injo, na manna ia nangnga tommoi, saba' rie' tau appau ma'nassana Yahya Pario attallasa muliang battu ritangnga-tangngana tau mate.

⁸ Rie' todo' tau lapaui ma'nassana Nabbi Elia rie' muliang. Rie' pole tau maraeng appau ma'nassana sala se'renna risikonjo nabbi riolo attallasa muliang.

⁹ Mingka lapaui Herodes, ”Ampa Yahya maemmu kupappa' kallonna. Inaika pade' tau injo sitoje'na na takkarebai anggeokang nuappakonjo?” Jari a'bojamu lalang anteekamua solanna akkulle assijanjang Isa.

Isa appakanre limansa'bu tau 9:10-17

¹⁰ Rimulianginnamo suro-suro injo lapau ngase'i mange ri Isa apa numaeng lageokangi. Jari Isa laerangii a'lampa assa'la'-sa'la' na mange rise're kota riare' Betsaida.

¹¹ Mingka laisse'i tau lohe, jari minahangi ri Ia. Ia latarimai ngase'i na a'bisarai mange ri iyai passala Pakkaraengang Allataala na Ia lapakagassingi sikuanna tau parallu injo ri ilei.

¹² Rihattu pakaramulanamo labangngi, riekimu sampuloiya rua suroNa mange ri Ia na appaui, ”Suro ngase'i muliang tau lohe intu, solanna a'lampai mange ri desa-desa na ri kampong-kampong seppa' injo ri inni laa'bojai kanre surang pa'bangngiang, saba' rie'ki ri tampa' sino.”

¹³ Mingka appaui Isa mange ri iyai, ”Kauimo parallu laassare kanre!” Appihali ngase'mu, ”Nurie' ri kambe gele la'bi ri limambatu roti surang ruangkaju juku', injojua ampa a'lampakang tapammalliangi kanre tujunna tau lohe intu.”

¹⁴ Saba' ri intu larie'i limansa'bu tau bura'ne. Jari appaui Isa ri suro-suroNa, ”Suro ngase'i attolong a'limbo-limbo, silimbo limampulo tau lohena.”

¹⁵ Lageokang appakonjo suro-suroNa na lasuro ngase'i attolong tau lohe injo.

¹⁶ Sungka'i maemmo laalle Isa roti limambatu injo surang juku' ruangkaju injo, Ia ammongai nai' ri langi', masa barakka'i, ampai latu'be-tu'be roti injo na lapassareangi ri suro-suroNa solanna lapa'dahu-dahuang mange ri tau lohe injo.

¹⁷ Na nganre ngase'i sa'genna bassoro. Maenna injo laparappung ngase'mu la'binna roti sesanna lakanrei, rie'i sampulorua baku' lohena.

Pangakuanna Petrus 9:18-21

¹⁸ Rie' se're hattu ri assa'la'-sa'la'na Isa ngera dowaang, rieki ngase'i ana'-ana' gurunNa mange ri Ia. Jari akkuta'nangi Isa mange ri iyai, ”Lakua tau lohe injo, Nakke inni inai?”

¹⁹ Pappihalinnai, ”Yahya Pario, rie' todo' tau maraeng appau: Elia, rie' pole tau appau ma'nassana sala se'renna battu risikonjo nabbi riolo attallasa muliang.”

²⁰ Akkuta'nangi pole Isa mange ri iyai, ”Panguppamu, Nakke inni inai?” Appihali Petrus, ”Almase battu ri Allataala.”

²¹ Jari Isa lapappisangkaangi mange ri iyai, solanna andai lapappiissekangi passala injo manna mange ri inai jua.

Pakaramula lapappiissekanna passala kasissaanna Isa na sara'-sara' paminahang ri Ia 9:22-27

²² Maeng injo appaui Isa, ”Ana' Rupatau parallui lananggong lohe kasissaang na laritolla'i ri tutoa-toa, sikonjo imang ponggaha na guru Tora', ampai rihuno na attallasai muliang ri allo makatalluna.”

²³ Lakuamo pole Isa mange ri iyai ngase', ”Sikuanna tau a'ra' minahang ri Nakke, parallui lasassali kalenna, lasompoi salli'na allo bangngi ampai minahang ri Nakke.

²⁴ Saba' inai jua tau a'ra' lapakasalama' nyahana, latappela'i nyahana; mingka inai tau tappela' nyahana kanara ri Nakke, iamo lalapakasalama'i.

²⁵ Apamo matu-matunna se're inni tau lauppa ngase'i sibatu lino, mingka lapakamatei iyareka lapakasilaka kalenna?

²⁶ Saba' inai jua tau siri' rikanara Nakke na rikanara pauKu, Ana' Rupatau lasiri' todo'i rikanara tau injo, ampa Ia rie'i sallo' lalang ri kala'biranna Amma surang sikonjo malaeka' tangkasa.

²⁷ Sitoje'na Nakke appau mange ri kaui: Risikuanna tau rie' injo ri inni rie' tugele lamate ampa gelepai lajanjang Pakkaraengang Allataala.”

Isa ripakala'biri rate ri bonto 9:28-36

²⁸ Rie'i barang karua allonna ri maennamo lapau ngase' pangajarang injo, Isa laurangi Petrus, Yahya surang Yakobus, ampai nai' ri bonto langera dowaang.

²⁹ Rihattunna ngera dowaang Isa, appinrai tappaNa na pakeang bakka'Na a'jari pute ammillere.

³⁰ Maeng injo rie'mo kajanjangang rua tau laurangi a'bisara Isa, iamo intu Musa surang Elia.

³¹ Ruayai lapappijanjangang kalenna lalang kala'birang na labisarai passala palaa'lampaNa lamange appa'rupa pauna Allataala ri Yerusalem.

³² Rihattu injo kara'rakangi Petrus surang uranna na rihattu nya'ringinna lajanjangimu Isa lalang rikala'biranNa: na tau rua injo ammentengi riampi'Na.

³³ Sungka'i tau rua injo a'ra' labokoi Isa, appaui Petrus mange ri Isa, ”Guru, sukku' baji'na ditte rie' ri tampa' inni. Baji'i ampa appaentengkang tallu barumbarung, se're dahuamMu, se're dahuanna Musa na se're dahuanna Elia.” Mingka Petrus gele lapahang nulapau injo.

³⁴ Riappau appakonjona juapa, rie'mo rammang labohongi. Sungka'i labohongimo rammang injo, sanna'mu malla'nai.

³⁵ Rimaenna injo kalangngerammu sa'ra lalang ri rammang injo, lakua, ”Iamo inni Ana' Kupile injo, Iamo pilangngeri.”

³⁶ Rihattu kalangngeranna sa'ra injo, kajanjangammu Isamamo kale-kalenNa. Ana'-ana' gurunNa lananro passala injo lalang ri ati, na rihattu injo gele lapappiissekang mange ri tau maraeng apa numaeng lajanjangi.

Isa ambongka Nyaha daa battu rise're ana' lataba garring 9:37-43a

³⁷ Mintara'na mae rinaunginnamo battu rate ri bonto injo, rie'mo lohe tau a'rurung-rurung mange laurangi assijanjang Isa.

³⁸ Rie' tau ri tulohe injo a'nga'ngara, lakua, ”Guru, kuerai ri Ditte solanna mange ritilingi ana'ku, saba' ia jua ana'ku kale-kalenna.

³⁹ Ia a'lellengi labattui setang, ampai sikali ngariu' na lapakangappa'-ngapparai sa'genna a'busa-busa babana. Nyaha daa injo tarru'-tarrusui lasissa ana'ku na assimpolekalena gelemu lalabokoi.

⁴⁰ Nakke maeng todo'mu kuera ri ana'-ana' gurumMu solanna lapasalaangi setang injo, mingka gele lakulle.”

⁴¹ Jari lakuamo Isa, ”Oe kau tau gele intu tappa' surang tau lingu intu, lasikurapa salloKu parallu laammari ritangnga-tangngamui surang lasabbara mange ri kau? Erangi mae ana'mu intu!”

⁴² Na rihattu seppa'namo ana' injo ri Isa, ripatappasai ri setang injo naung ri tana na lapatopa-topai. Mingka Isa laga'gara bakka'i setang injo na lapakagassingi ana' injo, ampai lapahuliang mange ri ammanna.

^43a Jari ammangnga-mangnga ngase'i tau lohe injo kanara kakahasaanna Allataala.

Makapinruanna Isa lapappiissekang passala kasissaanna 9:43b-45

^43b Rihattu ammangnga-mangngana ngase' juapa tau lohe injo kanara ripanggeokanNa injo, appaui Isa mange ri ana'-ana' gurunNa,

⁴⁴ ”Pilangngeri na pina'na' baji' ngase'i inni pauKu: Ana' Rupatau laripassareangi lalang limanna rupatau.”

⁴⁵ Gele laisseki pau injo, saba' botoanna tattongko'i mange ri iyai, sa'genna gele akkulle lapahangi. Mingka, malla' ngase'i akkuta'nang botoanna pau injo mange ri Ia.

Inai kaminang bakka' risikuanna Ana' gurung 9:46-48

⁴⁶ Maeng injo rie'mo pa'beserang ri ana'-ana' gurunna Isa passala inai kaminang bakka' ri iyai.

⁴⁷ Mingka Isa latarrusu pikkirannai. Injomo saba'na Ia ngallei ana' kidi-kidi na lapaentengi risa'rinNa,

⁴⁸ na appaui mange ri iyai, ”Inai jua latarima ana' ki'di' inni lalang arengKu, injo Nakkemo latarima; na inai narima ri Nakke, injo Iamo latarima Tuassuro injo ri Nakke. Saba' tukaminang ki'di' injo ri kau ngase', iamo lakaminang bakka'.”

Se're tau gele ana' gurung ri Isa angga'gara setang 9:49-50

⁴⁹ Appaui Yahya, ”Guru, anjanjangkang rie' se're tau angga'gara setang lalang arenTa, jari tapisangkai tau injo, saba' tau gele minahang ri ditte.”

⁵⁰ Lakuamo Isa mange ri ia, ”Ako pisangkai, saba' inai geleko labaliang, urammu intu.”

Isa surang tau Samaria 9:51-56

⁵¹ Sungka'i seppa' larapi' hattunna Isa tarangka' mange ri Suruga, Ia lapa'batumu nyahaNa laa'lampa mange ri Yerusalem,

⁵² na Ia assuroi sikura tau a'lingka rioloanNa. A'lampai turisuro injo, na antama'i rise're desa pammarianna tau Samaria laappakasadia riiangase'na ri Ia.

⁵³ Mingka sikuanna tau Samaria injo gele a'ra' latarima Isa, saba' laa'lampana mange ri Yerusalem.

⁵⁴ Sungka'i ruaiya suroNa injo, iamo intu Yakobus na Yahya, lajanjang passala injo, appauimu, ”Karaeng, ampa Mukaa'raki, solanna tasuroi turung bosi api battu ri langi' lalapakamate ngase'i?”

⁵⁵ Mingka, a'gilingi Isa na laga'gara ngase'i.

⁵⁶ Jari a'lampaimu mange ri desa maraeng.

Passala minahang ri Isa 9:57-62

⁵⁷ Rihattunna Isa surang ana'-ana' gurunNa latarrusang lingkana, rie'mo se're tau ritangnga lalang appau mange ri Isa, ”Nakke laminahanga ri Kau, manna antee mae lampaMu.”

⁵⁸ Appaui Isa mange ri ia, ”Balaho rie' balona na jangang-jangang rie' poona, mingka Ana' Rupatau gele rie' tampa' manna pappasanderang ulunNa.”

⁵⁹ Jari Ia appaui pole mange ri tau maraeng, ”Minahangko ri Nakke!” Mingka appaui tau injo, ”Karaeng, ripa'bianga riolo kuloangang ammangku.”

⁶⁰ Mingka lakua Isa mange ri ia, ”Lappasang tommo tau mate alloangang paranna tau mate; mingka kau, a'lampako na ri antee-tee mae pappiissekangi Pakkaraengang Allataala.”

⁶¹ Jari rie' pole tau maraeng appau, ”Nakke a'ra'a minahang ri Ditte, Karaeng, mingka ripa'bianga riolo muliang kupauwangi passiana'ku.”

⁶² Mingka lakua Isa mange ri ia, ”Sikuanna tau sadia injomo anrangkala mingka assaile bokoi, gele siratang ri Pakkaraengang Allataala.”