LUKAS 6 - Kitta' Passitallikang Bau KAREBA BAJI'

Ana' gurunna Isa ngattili bae gandong ri allo Passambajangang 6:1-5

¹ Rie' se're allo Passambajangang, rihattu a'molonna Isa ri koko bae gandong, ana'-ana' gurunNa ngattili bullere bae gandong ampai lakanre, na limanna jua lapabi'bi'.

² Jari rie'mo tau Farisi appau, ”Ngurai namugeokangi se're passala nukapalli' rigeokang ampa allo Passambajangang?”

³ Jari lakuamo Isa mange ri iyai, ”Geleika minang muaji apa nulageokang injo Daud, rihattunna kapa'reang surangang sikuanna tau minahang injo ri ia.

⁴ Anteekamua ia antama' ri sapo passambajangang na ngalle roti koro'bang, ampai lakanre na lapassareang todo'i mange risikuanna tau minahang injo ri ia, nasitoje'na roti injo kapalli'i rikanre rimaraenganna sikonjo imang?”

⁵ Lakuamo pole Isa mange ri iyai, ”Ana' Rupatau inni, Iamo Karaeng ri allo Passambanjangang.”

Isa appakagassing tau garring ri allo Passambajangang 6:6-11

⁶ Rie' se're allo Passambajangang maraeng, Isa antama'i ri sapo passambajangang, ampai ngajara. Ri injo rie' tau kape lima kananna.

⁷ Lohe guru Tora' na tau Farisi latili'-tilingi Isa barang appakagassingi tau garring ri allo Passambajangang, solanna nguppai lalang lappassala mange ri Isa.

⁸ Mingka Isa latarrusu pikkirannai, jari appaui mange ri tau kape sihali injo limanna, ”Ambaungko na ammentengko ritangnga!” Jari ambaung toje'mu tau injo na ammentengi.

⁹ Maeng injo appaui Isa mange ri iyai, ”A'ra' todo'a laakkuta'nang mange ri kau: anteeang ripa'biang ri allo Passambajangang, a'geo' baji' iyareka a'geo' daa, appakasalama' nyaha iyareka rihunoi?”

¹⁰ Maenna injo Isa latangarai siappuna mange ri iyai ngase', ampai appau mange ri tau garring injo, ”Patanjo limammu!” Lageokang appakonjo toje'i tau injo sikalinna baji' toje'mu limanna.

¹¹ Jari sanna'mu kuku'nai, na a'runding ngase'i, apa nulalageokang injo mange ri Isa.

Isa akkeo' sampulorua suro 6:12-16

¹² Rihattu injo a'lampai Isa mange rise're bonto langera dowaang na sibangngi bujuru Ia ngera dowaang mange ri Allataala.

¹³ Sungka'i latangnga allomo, Ia lakeo'mu ana'-ana' gurunNa mange riampi'Na, ampai lapile sampulorua battu ri iyai ngase' nulagallara injo suro:

¹⁴ Simon laareng injo Petrus, na Andreas uranna siana' Simon, Yakobus na Yahya, Filipus na Bartolomeus,

¹⁵ Matius na Tomas, Yakobus ana'na Alfeus, na Simon tau riareng injo tau Zelot,

¹⁶ Yudas ana'na Yakobus, na Yudas Iskariot tau a'bali'ballang injo.

Isa ngajarai surang appakagassingi lohe tau garring 6:17-19

¹⁷ Maenna injo naungimu battu ri baho bonto na attaangi rise're tampa' lappara: Ri injo rie'mo siloheang pole tau asse're battu ripapinahanNa na lohe todo' tau maraeng tubattu risibatu Yudea na tubattu ri Yerusalem surang tubattu ri biring bonena Tirus surang Sidon.

¹⁸ Rieki ngase'i mange konjo laappilangngeri ri Isa na laripakamolei risikonjo rupanna garrinnai; injo pole tau ripantama'i injo ri setang nguppa ngase'i kagassingang.

¹⁹ Tau lohe injo agassing-gassingangi lamange a'karaha ri Isa, saba' rie' kahasa ansulu' battu ri kalenNa na lapakagassing ngase'i.

Pau-pau Barakka' surang pappainga 6:20-26

²⁰ Maeng injo, Isa latangara ana'-ana' gurunNa ampai appau: ”Sunggumoko, oe kau tau kaasi-asi intu, saba' kaumo ampunna Pakkaraengang Allataala.

²¹ Sunggumoko, oe kau tau pa're intu rihattu inni, saba' kaumo laripakabassoro. Sunggumoko, oe kau tau ammarrang intu rikonni-konnina, saba' kaumo lagege.

²² Sunggumoko, ampa kanara Ana' Rupatau nasikuanna tau liking ri kau, nageleko a'ra' laurangi a'limbo-limbo na lasallako surang gelei a'ra' lapau aremmu kalaarei' se're nudaa.

²³ A'rannu-rannuko rihattu injo na atte'ne-te'nemoko, saba' sitoje'na, bakka' passahalammu ri Suruga; saba' appakonjo todo'i panggeokanna puwa-puwanai mange risikonjo nabbi.

²⁴ Mingka silakamo kau, oe kau tau kalumannyang intu, saba' lalang rikakalumannyangammu namuuppai kasannangang inni.

²⁵ Silakamo kau, tau bassori intu rikonni-konnina, saba' kaumo laripakapa're sallo'. Silakamo kau, tugege intu rikonni-konnina, saba' laripakapa'risi nyahamu na lapparauko.

²⁶ Silakamoko, ampa sikuanna tau appakala'biri mange ri kau, saba' appakonjo todo'i panggeokanna puwa-puwanai mange risikonjo nabbi palusu injo.”

Kamaseangi balimmu 6:27-36

²⁷ ”Mingka mange ri kau, tau allangngere injo ri Nakke, Kupauwangiko: Kamaseangi balimmu, a'geo' baji'ko mange ri tau liking injo ri kau;

²⁸ pangera-ngeraangi baji' tau lapangera-ngeraang injoko daa; na pangera dowaangi tau daa sipa' injo mange ri kau.

²⁹ Inai jua latampilingi pilisi'mu sihali, sareang todo'i pilisi sihaliammu, na inai jua laalle passa lipa'mu, sareangi ampa a'ra' todo'i laalle bajummu.

³⁰ Sarei sikuanna tau ngera injo ri kau; na akokale erai muliang ri tau laalle injo anummu.

³¹ Appanteekamua mukaa'raki solanna lageokangi parammu tau mange ri kau, geokang appakonjo todo'i mange ri iyai.

³² Ampa tau ngamaseang injo jua ri kau mukamaseang, apa pade' sahala'mu? Saba' manna tau doraka injo ngamaseang juai ri tau ngamaseang injo mange ri iyai.

³³ Saba' ampa a'geo' baji'ko ri tau baji' injo geo'na mange ri kau, apa pade' sahala'mui? Saba' manna tau doraka injo appakonjo todo'i geo'na.

³⁴ Ampa appiinrangko mange riparammu tau, kanara tajallimu lanarima todo' battu ri ia, apa pade' sahala'mui? Saba' manna tau doraka injo appiinrang juai mange riparanna tau doraka, solannna lanarima assimpole lohena.

³⁵ Mingka kau, kamaseangi balimmu na a'geo' baji'ko mange ri iyai na piinrangi surangang andamoko tajalli lanarima poleang, jari bakka'i sahala'mu na kaumo laa'jari ana'-ana'na Allataala Tukaminang la'biri injo, saba' Ia baji'i mange risikuanna tau gele injo ngisse' nanrai tau na mange risikuanna tau daa injo geo'na.

³⁶ Paralluko lumu nyaha, assimpole Ammammu lumu nyahai.”

Passala appassala 6:37-42

³⁷ ”Akolalo appassala riparammu tau, jari gele todo'ko ripassala ri Allataala. Akolalo assare hukkungang riparammu tau, jari gele todo'ko rihukkung ri Allataala; assareko ampung riparammu tau lariampungi todo'ko ri Allataala.

³⁸ Assreko riparammu tau larisare todo'ko ri Allataala: Se're sukakang baji', nuripakarassi, nurike'no na nuallua laripaburusu lalang ri rihaammu. Saba' passuka' mupake injo nyuka', iamo injo laripasuka' mange ri kau.”

³⁹ Appaui pole Isa se're pakkalebarang mange ri iyai, ”Makala akkullejuai tau buta inni anrenreng riparanna tau buta? Gelejua ruayai laa'dappe naung ri balo?

⁴⁰ Se're ana' gurung gele alla'bi battu ri anrong gurunna, mingka inai sangka' pappilajaranna lassimpolei gurunna.

⁴¹ Ngura mujanjangi baru'bu' kaju lalang injo ri matanna urang siana'mu, mingka balo' lalang ri matammu gele mujanjang?

⁴² Anteekokamua akkulle appau mange ri urang siana'mu: Urang siana', kupasulukangko baru'bu' kaju rie' injo lalang ri matammu, na balo' lalang ri matammu gele mujanjang? Oe tau munape', pasulu'i riolo balo' rie' injo ri matammu, jari akkulle baji' panjanjammu laappasulu' baru'bu' kaju battu ri matanna urang siana'mu.”

Poong kaju surang buana 6:43-45

⁴³ ”Saba' gele rie' poong kaju nubaji' na buana gele baji', na gele todo' rie' poong kaju nugele baji' na baji'i buana.

⁴⁴ Saba' sikonjo poong kaju riisse'i battu ri buana. Saba' battu ri bunga jabe geleki akkulle ngattili bua kaju ara na battu ri rompo' katinting geleki akkulle ngattili anggoro.

⁴⁵ Tau baji' intu appasulu'i barang baji' battu lalang ri ati baji'na na tau daa intu sipa'na appasulu'i barang daa battu lalang ri ati daana. Saba' nulapau injo babana, poonna nubattu lalang ri atina.”

Rua rupanna pallangga 6:46-49

⁴⁶ ”Ngura akkeo'ko mae ri Nakke: Karaeng, Karaeng, na gelejuai mugeokang apa numaeng injo Kupau?

⁴⁷ Sikuanna tau battu mae ri Nakke na lapilangngeri pauKu surang lageokangi – Nakke laassare passa'bi mange ri kau surangang inaimo uranna ia akkulle ripassimpoleang –,

⁴⁸ ia assimpole se're tau appaenteng sapo: Lakeke anralangi pallanggana na lataroi rate ri batu. Sungka'i battu a'ba na a'ba injo laso'lo'i sapo injo, sapo injo gele miriang, saba' jarre'i paentenna sapo injo.

⁴⁹ Mingka inai allangngere ripauKu, na gele lageokang, ia assimpole se're tau appaenteng injo sapo ri tana tide' pallanggana. Sungka'i laso'lo' a'ba, anra'bai sapo injo na sarro panra'na.”