LUKAS 5 - Kitta' Passitallikang Bau KAREBA BAJI'

Palanra' juku' a'jari palanra' rupatau 5:1-11

¹ Rie' se're hattu Isa ammentengi ri biring bonena Tamparang La'ba Genesaret, ri injo lohe tau a'domung riampi'Na a'ra' appilangngeri pau Allataala.

² Ia anjanjangi ruambatu lopi ri biring bone. Naung ngase'mu opuna lopi na latangkasi lanra'na.

³ Ia nai'i risala se'renna lopi injo, ri lopinna Simon, na lasuro sorongi lopinna dere siso'di' battu ri biring bone. Maeng injo Ia attolongi na laajara ngase'i tau lohe injo battu rate ri lopi.

⁴ Sungka'i maeng a'bisara, Ia appaui mange ri Simon, ”Palolo'i lopimmu mange ri tampa' anralang na tantangi lanra'mu lanjakkala juku'.”

⁵ Appihali Simon, ”Guru, sibangngimakang bujuru akkareso terasa na tide' jua juku' tauppa manna sikaju, mingka saba' pauMu, jari lakutantang juapa lanra'ku.”

⁶ Sungka'na maemmo latantang lanra'na, lohe sarromo juku' lauppa, sa'genna pakaramulamu rie' hangka lanra'na.

⁷ Jari lakapeimu uranna turieki injo ri lopi maraeng solanna mange lambalii'. Jari rie' ngase'mu uranna, ampai surangi lapunai juku' lopi rua injo sa'genna siso'd'i kalemamo natallangi lopinna.

⁸ Rihattu lajanjanna Simon Petrus passala injo a'demporomamo ri a'rakanna Isa na lakua, ”Karaeng, a'lampaKi battu ri nakke, saba' nakke inni tau doraka.”

⁹ Saba' ia na sikonjo urang sipanjamaanna takkajanna'i pammate lohena juku' lauppai;

¹⁰ appakonjo todo'i Yakobus surang Yahya, ana'-ana'na Zebedeus urang sipanjamaanna Simon. Lakuamo Isa mange ri Simon, ”Ako malla', pakaramula allo inni lakupaa'jariko palanra' rupatau.”

¹¹ Sungka'i maemmo labesoki lopinna anra'i ri biring bone, labokoi ngase'mu apa-apanna, ampai minahang ri Isa.

Isa appakagassing se're tau garring kattakang 5:12-16

¹² Rie' se're hattu Isa ammarii rise're kota. Ri injo rie' se're tau kattakang. Rihattu lajanjannna Isa, a'demporomu na ngerai, ”Karaeng, ampa a'ra'Ki, Ditte akkullea ripakatangkasa.”

¹³ Jari lapatanjomu limanNa, lakaraha tau injo, na lakua, ”A'ra'a, a'jari tangkasamoko.” Rihattu injo toje' jua namolei garring katta'na.

¹⁴ Isa lapisangkai tau injo lapau mange-mange manna ri inai jua na lakua, ”A'lampamoko, pappijanjangi kalemmu mange ri imang injo na assareko koro'bang passidakka panangkasimmu assituru' passidakka nulaparentaang injo Musa, laa'jari tanra mange ri iyai.”

¹⁵ Mingka kareba passala'na Isa pela' deremu palla'banna jari a'bakkalangimu tau lohe injo mange ri Ia laappilangngeri ri Ia na laripakamole battu rigarrinnai.

¹⁶ Mingka lasa'la' kalenna Isa mange ri tampa' tassa'bu-sa'bu langera dowaang.

Tau pesu' lapakagassing 5:17-26

¹⁷ Rie' se're allo rihattu ngajara'na Isa, rie'mo siloheang tau Farisi surang guru Tora' attolong laappilangngeri. Iyai injo battui risikonjo kampong na desa ri Galilea na Yudea surang battu ri Yerusalem. Kahasa Karaeng Allataala minahang ri Ia, sa'genna Ia akkulle appakagassing tau garring.

¹⁸ Maeng injo rie'mo lohe tau a'bule' tau pesu' rate ri patinroang; apparri-parri lalaerangi antama' ri sapo na lalataroi ri a'rakanna Isa.

¹⁹ Kanara geleinna akkulle laerangi antama' saba' lohena tau ri injo, jari ngambikimu nai' ri ata' sapo injo, maeng injo laka'ka' ata' injo, na lauloro tau injo surang patinroanna naung ritangnga-tangngana tau lohe injo ri a'rakanna Isa.

²⁰ Sungka'i lajanjang Isa katappakannai, lakuamo, ”Oe, urang siana', maeng rilappasi ngase'mu sikonjo kadorakaammu.”

²¹ Mingka sikonjo guru Tora' surang tau Farisi injo appikkiri lalang ri ati, ”Inai tau inni attua-tua ri Allataala? Inaimo akkulle allappasi kadorakaang passangadinna Allataala?”

²² Mingka Isa latarrusu pikkirannai, jari appaui mange ri iyai, ”Apa mupikkiri lalang ri ati?

²³ Anteeang la'bi lo'morang, rikua: rilappasi kadorakaammu, iyareka na rikua, Ammentengko na a'lingkako?

²⁴ Mingka solanna muisse' ma'nassana ri lino inni Ana' Rupatau kahasa lallappasi kadorakaang” – appaui Isa mange ri tau pesu' injo –: ”Kupaui mange ri kau, ammentengko, angka'i patinroammu na muliangko mange ri sapommu!”

²⁵ Rihattu injo toje' jua ammentengi tau injo ri a'rakannai, maeng injo laangka'i patinroanna na muliangi mange ri saponna ampai lapakala'biri Allataala.

²⁶ Takkajanna' ngase'i tau lohe injo, ampai appakala'biri Allataala, na sanna' mallakinna, lakua, ”Allo inni maeng tasa'bikammu passala nusanna' injo appakalannasa.”

Lewi palele sima minahang ri Isa 5:27-32

²⁷ Maeng injo, rihattunna Isa a'lampa ansulukang, Ia anjanjangi se're tau palele sima, turiareng Lewi, attangngai attolong-tolong ri tampa' pa'bajarang sima. Appaui Isa mange ri ia, ”Minahangko ri Nakke!”

²⁸ Jari ammentengi Lewi na labokoi iangase'na, ampai minahang ri Ia.

²⁹ Maeng injo Lewi lapanganre-nganreang bakka'i Isa ri saponna na sanna' lohe todo' palele sima surang tau maraeng minahang nganre surangi Isa.

³⁰ A'nahu'-nahusimu tau Farisi na guru Tora' injo mange ri ana'-ana' gurunna Isa, lakua, ”Ngura nganre manginungiko assurang palele sima na tau doraka intu?”

³¹ Jari lakuamo Isa mange ri iyai, ”Gele rie' tau gassing parallu sanro; mingka tau garring inni jua;

³² Nakke rie' mae konni gele laakkeo' tau naba, mingka tau doraka injo jua solanna jarrai.”

Passala appuasa 5:33-39

³³ Appau ngase'i pole tau Farisi injo mange ri Isa, ”Ana'-ana' gurunna Yahya biasai appuasa na assambajangi, appakonjo todo'i ana'-ana' gurunna tau Farisi inni, mingka ana'-ana' gurumMu tuli nganre manginung juai.”

³⁴ Lakuamo Isa mange ri iyai, ”Akkulle juaika bahaanna bonting bura'ne injo risuro appuasa ampa assurang juapai bonting injo?

³⁵ Mingka larie' hattunna, ampa riallemu bonting injo battu ri iyai, rihattu injomo nalaappuasai.”

³⁶ Appaui pole Isa se're pakkalebarang mange ri iyai, ”Gele rie' manna se're tau lasesse' baju bauna ampai lapatampangi ri baju toa. Saba' ampa appakonjo, sesse'i nubau injo na nutoa injo gele todo'i siratang ritampangi ri kaeng bau injo.

³⁷ Appakonjo todo'i gele rie' manna se're tau muna anggoro bau lalang ri pamunaang kukkulu toa, saba' ampa appakonjoi, anggoro bau injo lapakabettese pamunaang injo na anggoro injo latappelaki todo'i na panra'i pamunaanna.

³⁸ Mingka anggoro bau parallui ripuna lalang ripamunaang bau todo'.

³⁹ Gele todo' rie' manna se're tau maeng nginung anggoro toa a'ra' nginung anggoro bau. Saba' ia lalakua: Bajikangangi anggoro toa intu.”