LUKAS 23 - Kitta' Passitallikang Bau KAREBA BAJI'

Isa ri a'rakanna Pilatus 23:1-7

¹ Jari ammenteng ngase'mu tau a'rappung injo na laparapa'i Isa mange ri Pilatus.

² Ri injo pakaramulamu lapitinai Isa, lakua, ”Kambe tauppai ma'nassana tau inni laajara salai bangsaba, na appisangkai a'bajara bea mange ri kaisar, na passala ri kalenNa lapaui ma'nassana Iamo Almase, iamo intu Karaeng.”

³ Akuta'nangi Pilatus mange ri Isa, ”Kaumoka Karaeng tau Yahudi?” Pappihalinna Isa, ”Kaumo appau.”

⁴ Appaui Pilatus mange risikonjo imang ponggaha na ri tau lohe rie' ri injo, ”Gelea nguppa kasalaang manna siso'di' ri tau inni.”

⁵ Mingka pela' bakkaki sa'ranna appau, lakua, ”Ia ngajara salai tau lohe riajaranNa risibatu Yudea, pakaramula ri Galilea na ambattumu mae konni.”

⁶ Rihattu lalangngere'na injo akkuta'nangi Pilatus, Apa tau intu se'rei tau battu ri Galilea?

⁷ Sungka'i laisse' ma'nassana Isa tau battu ripamarentaanna Herodes, ia lasuro erangi Isa mange ri Herodes, narihattu injo rie' todo'i ri Yerusalem.

Isa ri a'rakanna Herodes 23:8-12

⁸ Rihattunna Herodes lajanjangi Isa, ia sanna' rannuna. Saba' sangga sallomo ia a'ra' lajanjang, kanara ia sanging lalangngere passala'na Isa na ampa pole ia tutajalli akkulle lajanjang anteekamua ta'ranna Isa appaa'jari se're numasagala.

⁹ Ia assare lohe pakkuta'nang mange ri Isa, mingka Isa gele appihali.

¹⁰ Rihattu injomo sikonjo imang ponggaha na guru Tora' rieki todo'i mange ri a'rakang na tulusu appitinai mange ri Isa.

¹¹ Injo pole Herodes surang tantarana assalla na attua-tua ri Isa, lapipakei baju bakka' kakaraengang mange ri Isa ampai lasuro erang muliang mange ri Pilatus.

¹² Ri allo injo ampamu a'baji' Herodes surang Pilatus; rigelenapa injo assibaliangi.

Riparapa'i muliang Isa ri Pilatus 23:13-25

¹³ Jari Pilatus lapasse'rei sikonjo imang ponggaha na sikonjo ponggaha surang lohe pole tau maraeng,

¹⁴ na appaui mange ri iyai, ”Muerangi tau inni mae ri nakke assimpole tungajara sala ri tau lohea. Janjangi, Ia maemmu kuparessa ri a'rakammu, na battu risikonjo kasalaang numupitina injo mange ri Ia gelekale rie' kurumpa'.

¹⁵ Herodes gele todo'i anrumpa' kasalaanna, injomo saba'na ia lasuro erangi muliang mae ri kambe. Sitoje'na gele rie' manna siso'di' ripanggeokanNa nusiratang larihukkungang matei.

¹⁶ Jari, lakurabunna jua, ampai kulappasang.” [

¹⁷ Saba' parallui allappasang se're tau ritarungku ri iyai ri allo passua'-suarang injo.]

¹⁸ Mingka assama-samai a'gora bakka', ”Hunoi Isa, na Barabasmo lappasangangkang!”

¹⁹ Barabas inni ripantama'i ri pattarungkuang saba' maengi appakajuja lalang ri kota na kanara ripamunoang.

²⁰ Sikalipa pole appau bakka'i Pilatus mange ri iyai, saba' ia a'ra'i lalappasang Isa.

²¹ Mingka tulusu a'gora bakka'i lapihalii, lakuai, ”Salli'i Isa! Salli'i Isa!”

²² Lakua Pilatus makapintallunna mange ri iyai, ”Sitoje'na panggeokang daa anteekamua numaeng lageokang tau inni? Gele rie' kasalaang manna siso'di' kurumpa ri Ia, nasiratangi larihukkung mate. Jari, lakurabunna jua, ampai kulappasang.”

²³ Mingka a'gora bakka' ngase'i massa-massa na laerai, solanna Ia risalli', kateppusanna ambetai ripa'gora-gora bakka'nai.

²⁴ Jari latappuki Pilatus, solanna laturuki ripangeranai.

²⁵ Ia lalappasangi tau ripantama' injo ri pattarungkuang saba' appakajuja na ripamunoang injo assituru' ripangeranai, mingka Isa lapassareangi mange ri iyai laripaa'jari assituru' a'ra'nai.

Isa rierang larisalli' 23:26-32

²⁶ Rihattu laeranginnamo Isa, akkeo'i se're tau riareng Simon battu ri Kirene, tuampa rie' battu pantanrang kota, maeng injo lataroi salli' injo rate ri salangganna, solanna lasompo ampai minahang ri Isa.

²⁷ Sanna' lohena tau lapinahangi Isa; na lohe todo' tau bahine lapammarrangangi na laparaui.

²⁸ A'gilingi Isa mange ri iyai na lakua, ”Oe tau bahinena Yerusalem, akomo mupammarranganga, mingka kalemmu tommo mupammarrangang surang ana'-ana'mu!

²⁹ Saba' janjangi, larie' hattunna lalapaui tau: Sunggulalo bahine tamanang na pompong gele injo minang allaherang ana', surang tugele injo minang appasusu.

³⁰ Jari pakaramulamu tau inni lappau mange risikonjo bonto: La'boromoko taburikang mae! na mange risikonjo buttu: Tambungimakang mae!

³¹ Saba' ampa tau a'geo' appakonjo injo ri kaju attallasa, la'bipa pole nulaa'jari injo ri kaju mate?”

³² Rie' todo' rua tau maraeng rirenreng, iamo intu rua tau palukka' bakka' larihukkung mate surangi Isa.

Isa risalli' 23:33-43

³³ Sungka'i ambattumo ri tampa' nuriare' injo Bonto Ka'daroulu, lasallikimu Isa ri injo surang ruaiya palukka' bakka', se're risa'ri kananNa na se're risa'ri kairinNa.

³⁴ Appaui Isa: ”O Amma, riampungi kadorakaannai, saba' gele lapahang apa lageokangi.” Rihattu injo anggorongimu tantara injo laladahu-dahui pakeanNa.

³⁵ Tau lohe ammenteng injo na lajanjangi sikuanna. Mingka sikonjo ponggaha attua-tuai ri Isa, lakua, ”Tau maraeng lapakasalama', konni-konnia lappasang tommoi mange Ia tompa lapakasalama' kalenNa, ampa pade' Iamo Almase, tau ripile injo ri Allataala.”

³⁶ Tantara injo attua-tua todo'i ri Ia; lapatanjoangi anggoro kassi mange ri Ia

³⁷ na lakua, ”Ampa kaumo Karaeng tau Yahudi, pakasalama'i kalemMu!”

³⁸ Rie' todo' ukirang rateang ulunNa, ”Iamo inni Karaenna tau Yahudi.”

³⁹ Sala se're tau palukka' bakka' uranna Isa risalli' appau daa ri Ia, lakua, ”Gelejua kaumo Almase? Pakasalama'i kalemMu na kambe.”

⁴⁰ Mingka sitauang injo lapisangkai, lakua, ”Geleko malla' manna ri Allataala, saba' assimpolei hukkungang muuppa injo?

⁴¹ Ditte inni siratangki rihukkung, saba' riuppamu pa'balasa nusiratang battu ripanggeokanta, mingka tau inni gelekale rie' geo' salana manna siso'di'.”

⁴² Maeng injo appaui, ”Isa, riu'rangia, ampa rie'Ki mae assimpole Karaeng.”

⁴³ Lakua Isa mange ri ia, ”Sitoje'na Nakke appau ri kau, allo innimo kau assurangki lalang ri Suruga.”

Matei Isa 23:44-49

⁴⁴ Sungka'i latette' sampuloruamo ritangnga allona na sikali kalammangi laappu tampa' injo sa'genna tette' tallu,

⁴⁵ saba' gele assau matanna allo. Kaeng ampang-ampang rie' injo lalang ri Sapo Tangkasa bissa'i a'jari rua.

⁴⁶ Maeng injo appaui Isa bakka' sa'ranNa, ”O Amma, lalang ri limamMu Kupassareang nyahaKu.” Rimaenna appau appakonjo tappu'mu nyahaNa.

⁴⁷ Sungka'i ponggahana tantara injo lajanjang apa kajariang, ia lapakala'biri Allataala, lakua, ”Toje'i, tau inni tide' salaNa!”

⁴⁸ Sungka'i sikuanna tau lohe, tubattu injo a'domung ri injo lanilingi, lajanjangimu apa kajariang, muliangimu ampai lajaguri kalenna.

⁴⁹ Sikuanna tau uranna assiisse' Isa, antama' todo'i bahi'-bahine tuminahang injo battu ri Galilea, ammenteng dere ngase'i lajanjangi iangase'na nua'jari ri injo.

Isa riloangang 23:50-56a

⁵⁰ Rie'mo se're tau riareng Yusuf. Ia se'rei urang ri Pangadelang Agama, na se'rei tau baji' na naba todo'i. Ia gele assamaturu' ripanappukinna surang ripanggeokanna hakking injo.

⁵¹ Ia tau battu ri Arimatea, se're kota Yahudi na ia latajang-tajangi Pakkaraengang Allataala.

⁵² Iamo a'lampa mange ri Pilatus na laerai batangkalenna Isa.

⁵³ Rimaennamo lapanaung batangkalenna Isa battu ri salli', ia laroko'i kaeng lenan, ampai lapaonrang lalang ri kuburu ta'keke ri batu a'poong, na nugelepa minang ripappaonrangi tau mate.

⁵⁴ Allo injo allo pappasadiaang na a'birimmu laantama' allo Passambajangang.

⁵⁵ Sikonjo bahine rieki injo assurangi Isa battu ri Galilea, minahangi todo'i na lajanjangi kuburu injo na anteekamua batangkalenNa ripaonrang.

^56a Sungka'i muliangimo, appakasadiaimu rampa-rampa na minnya' hondu.

Attallasai muliang Isa 23:56b–24:12

^56b Ri allo Passambajangang injo ammari-mari ngase'i anjama assituru' hukkung Tora'.