LUKAS 22 - Kitta' Passitallikang Bau KAREBA BAJI'

Passamaturukang larihunoi Isa 22:1-2

¹ Ri allo pasua'-suarang bakka' langanre roti gele injo risare bibi, seppa'mu, nuriare' injo Pa'lappasang.

² Sikonjo imang ponggaha na guru Tora' a'bojai patteteang anteekamua ta'ranna solanna akkulle lahuno Isa, saba' malla'i ri tau lohe.

Yudas a'bali'ballang ri Isa 22:3-6

³ Maeng injo antama'mu Ibilisi ri Yudas, turiare' injo Iskariot, sala se'renna ri suro-suro sampulorua injo.

⁴ Yudasmo a'lampa mange ri imang ponggaha na ri ponggahana pajaga Sapo Allataala na assibisarai ngase'i, anteekamua ia akkulle lapassareang Isa mange ri iyai.

⁵ Sanna' rannuna na assamaturu' ngase'i laassare doe' mange ri ia.

⁶ Ia laturuki, na pakaramulamu a'boja hattu baji' lalapassareangi Isa mange ri iyai nagele kaissekang ri tau lohe.

Pappasadiaang langanre Pa'lappasang 22:7-13

⁷ Sungka'i larapi'mo allo passua'-suarang bakka' nganre injo roti gele risare bibi, iamo allo paralluna tau inni lanyumbele jimbala pa'lappasa.

⁸ Jari Isa lasuroi Petrus na Yahya, lakua: ”A'lampaiko, appakasadia kanreang Pa'lappasang ri ditte solanna nganreki.”

⁹ Lakuaimo mange ri Ia, ”Ri antee mae Mukaa'raki laripappasadiaang?”

¹⁰ PappihalinNa, ”Ampa antamakiko ri kota, laassijanjangiko se're tau ngerang bengki rassi ere. Pinahangi antama' ri sapo lapantamaki injo,

¹¹ na paui mange ri opuna sapo injo: Guru akkuta'nang mange ri kau: Riantee mae tampa' laKupake surang suro-suroKu langanre ri Pa'lappasang?

¹² Jari tau injo lalapanjo'jokangiko tampa' luara ri loteng nusangka'mo, ri injomoko parallu appakapasadia.”

¹³ Jari a'lampaimu na larumpa' toje'i assituru' ngase' nulapau injo Isa. Jari appakasadiamu kanreang Pa'lappasang.

Ritantuanna hattu panganre Pa'lappasang 22:14-23

¹⁴ Sungka'i larapi'mo hattunna, Isa attolongi nganre assurang-surang suro-suroNa.

¹⁵ PauNa mange ri iyai, ”Nakke sanna' pakubojainna langanre ri Pa'lappasang inni surang kau ngase', rigeleKupa risissa.

¹⁶ Saba' Nakke appau mange ri kaui: Gelemu laKukanre poleang sa'genna injo a'rupa lalang ri Pakkaraengang Allataala.”

¹⁷ Maeng injo Ia ngalle se're galasi anggoro, masa barakka'i, ampai appau, ”Alle inni na paa'dahu-dahuangi ri kaui.

¹⁸ Saba' Nakke appau ri kau: pakaramula rihattu inni Nakke gelema langinung poleang hassele ri poong anggoro sa'genna Pakkaraengang Allataala rie' mae.”

¹⁹ Maeng injo Ia ngalle roti, masa barakka'i, ampai latu'be-tu'be na lapaa'dahu-dahuangi mange ri iyai, lakua pauNa: ”Iamo inni batangkalengKu nuripasareang injo mange ri kaui; geokangi inni laa'jari pangu'rangi ri Nakke.”

²⁰ Lageokang appakonjo todo'i ri galasi anggoro injo rimaenginnamo nganre; lakua Isa, ”Galasi inni iamo passitallikang bau ri raraKu, nuripato'lo' mange ri kaui.

²¹ Mingka, janjangi, limanna tau lalapassareang injoa, rie'i assurangki ri mejang inni.

²² Saba' Ana' Rupatau laa'lampai assituru' numaemmo ritantuang, mingka silakamu tulapassareang injo!”

²³ Maeng injo pakaramulamu labisarai, inai ri iyai laa'geo' appakonjo?

Pa'bisaraang rihattu panganre Pa'lappasang 22:24-38

²⁴ A'jari tommo pa'beserang ri suro-surona Isa, inaimo akkulle rirapang lakaminang bakka' ri iyai.

²⁵ Appaui Isa mange ri iyai, ”Sikonjo karaeng ri lino inni laparentai jannanganna na tau rie' injo kahasana riare'i pallapi' barambanna.

²⁶ Andako appakonjo, mingka inai kaminang toa ri kaui parallui a'jari assimpole kaminang longko na ponggaha assimpole pajampangi.

²⁷ Saba' inaimo la'bi bakkakang: tau attolong injo nganre, iyareka tau anjampangi injo? Tantu tau attolong injo nganre? Mingka Nakke rie' ritangnga-tangngamu assimpole pajampangi.

²⁸ Kaumo latulusu rie' surangang Nakke lalang risikonjo kamarasaiang laKuuppa injo.

²⁹ Nakkemo assare Pakkaraengang ri kau, assimpole AmmangKu maeng assare mae ri Nakke,

³⁰ solanna sallo' kaui sipanganreang na sipanginungngaiko lalang ri PakkaraengangKu na laattolongiko rate kadera kakaraengang langadeli sampulorua pinangka' ri Israele.

³¹ Simon, Simon, janjangi, Ibilisi assingaramu lalatapiko assimpole bae gandong,

³² mingka Nakke maeng Kupangera dowaangangiko, solanna tappa'mu andai appinra. Na kau, ampa ngu'rangimoko, pakaterasai katappakanna urammu siana'.”

³³ Appihali Petrus, ”Karaeng, nakke sadia laritarungku na mate kanara ri Kau!”

³⁴ Mingka appaui Isa, ”Nakke appau mange ri kau, Petrus, allo inni gelei laakkongkoroa' jangang, rigelenapa ganna' pintallung musassalia.”

³⁵ Maeng injo appaui Isa mange ri iyai, ”Rihattu Kusuroimmu a'lampa gele ngerang pamunaang doe', pamunaang bokong na sandala, apa geleiko kagannakang?”

³⁶ Pappihalinnai ngase', ”Gelekang manna siso'di'.” PauNa mange ri iyai, ”Mingka konni-konnina, inai rie' pamunaang doe'na parallui laerang, appakonjo todo'i turie' injo pamunaang bokonna; na inai gele rie' laampunnai parallui labalukang baju bakka'na ampai ammalli pa'dang.

³⁷ Saba' nakke appau mange ri kaui ma'nassana pau ri Kitta' Tangkasa inni parallui laripa'rupa ri Nakke: Ia laripassimpole risikonjo Tau appakajuja. Saba' apa nuta'ukiri passala ri Nakke injo ripa'rupamu.”

³⁸ Lakuaimo, ”Karaeng, inni rie' rua pa'dang.” PappihalinNa mange ri iyai, ”Ganna'mu intu.”

Ri koko Getsemani 22:39-46

³⁹ Maeng injo a'lampai Isa ansulukang kota na anteekamua biasana Ia mangei ri Bonto Zaitun. Suro-suroNa minahang todo'i ri Ia.

⁴⁰ Sungka'i ambattumo ri tampa' injo appaui Isa mange ri suro-suroNa, ”Ngera dowaangiko solanna andako lamma lalang ri kamarasiang.”

⁴¹ Maeng injo a'lampai Isa lasa'la' kalenna battu ri iyai larie'i barang sipambundukang batu derena, ampai akkolantu' na ngera dowaangi,

⁴² ”O AmmangKu, ampa Mukaa'raki, alle kasissaang inni battu ri a'rakangKu; mingka andamo a'ra'Ku, passangadinna a'ra'Mumo a'jari.”

⁴³ Jari rie'mo se're malaeka' battu ri langi' lapappijanjangang kalenna mange ri Isa laassare katerasang nyaha ri Ia.

⁴⁴ Sanna'i balisana Isa na pela' attoje'-toje'i ngera dowaang. Omasa'na a'jari assimpole rara ammatti'-matti' naung ri tana.

⁴⁵ Rimaenna injo ammentengi battu ripangera dowaanna na muliangi mange ri suro-suroNa, mingka Ia larapikangi tinro ngase' kanara pa'risi'na nyahanai.

⁴⁶ Lakua pauNa mange ri iyai, ”Ngura tinroiko? Ambaungiko na ngera dowaangiko solammu anda lamma lalang ri paso'ri.”

Rijakkalai Isa 22:47-53

⁴⁷ Rihattu a'bisarana juapa Isa rie'mo tau sibakkalang bakka', na suro-suroNa turiare' injo Yudas, sala se'renna suro battu risampulorua injo, a'lingka ri a'rakanna. Yudas laseppaki Isa ampai lahau.

⁴⁸ Jari appaui Isa mange ri ia, ”Oe Yudas, lalang ripanghau mupassareangi Ana' Rupatau?”

⁴⁹ Rihattunna, tau assurang-surang injo Isa, lajanjang apa kajariang, appaui ngase'mu, ”Karaeng, paralluika tabaliang tau intu surangang pa'dang?”

⁵⁰ Jari rie'mo sitau battu ri iyai lalumpaki pagahena Imang Bakka' injo sa'genna tappu' toli kananna.

⁵¹ Mingka appaui Isa, ”Ammono'ko.” Maeng injo Ia lakaraha tolinna tau injo na laapadakki'i muliang.

⁵² Rimaenna injo akkuta'nangi Isa mange risikonjo imang ponggaha na risikonjo ponggaha pajaga ri Sapo Allataala surang ri tutoa-toa rie' injo lalajakkalai, ”Pa'ngare'mu Nakke inni palukka', jari riekiko mae ngerang pa'dang surang panrabung?

⁵³ Kusa'ring allo-allo juai Nakke rie' ritangnga-tangngamu ri Sapo Allataala, na gele kalea mujakkali. Mingka iamo inni hattummu, na iamo inni kahasana kalammang injo.”

Isa risassali ri Petrus 22:54-62

⁵⁴ Jari rijakkalai Isa na rierangi battu ri tampa' injo. Ia riparapa'i mange ri saponna Imang Bakka' injo. Rihattu injo Petrus minahang derei.

⁵⁵ Ritangnga-tangngana jurunna sapo injo apparukkuki api ampai attolong ngase' risiappuna. Petrus mange todo'i attolong ritangnga-tangnganai.

⁵⁶ Sikalinna rie'mo se're pagahe bahine lajanjangi Petrus attolong riampi' api; latili'-tilingi, ampai appau, ”Tau inni uranna todo'i.”

⁵⁷ Mingka assassalai Petrus, lakua, ”Nakke gele kuisse' tau intu!”

⁵⁸ Gele sallo maenna injo rie'mo pole se're tau maraeng lajanjangi Petrus ampai appau, ”Kau sala se'renna todo'ko battu ri iyai!” Mingka appihali Petrus, ”Gele, nakke!”

⁵⁹ Barang sijaang sallona maenna injo rie'mo isse' se're tau maraeng anggaratta, ”Toje'i, tau inni uranna todo'i Isa, saba' ia tau Galilea todo'i.”

⁶⁰ Mingka appaui Petrus, ”Nakke gelei kuisse' numupau intu.” Rihattu injomo, riappauna juapa, angkongkoroa'mu jangang.

⁶¹ Jari a'gilingi Karaeng Isa latangarai Petrus. Sikalinna ngu'rangimu Petrus ma'nassana Karaeng Isa maengi lapau mange ri ia, ”Rigelenapa angkongkoroa' jangang ribangngi inni, kau pintallumma musassali.”

⁶² Jari ia a'lampai ansulukang ampai apparau saba' pa'risi nyahana.

Isa ri a'rakang pangadelang Agama 22:63-71

⁶³ Maeng injo tau lajakkala injo Isa, attua-tuai ri Ia na larabungii.

⁶⁴ Lalampangi matanNa ampai lakuta'nangi, ”Pausai mae inai pade' larabungKo?”

⁶⁵ Lohe juapa pole pau-pau daa lapaui mange ri Isa.

⁶⁶ Sungka'i tangnga allo asse'reimu la'rappung tutoa-toana bangsa injo surang sikonjo imang ponggaha na guru Tora' injo, ampai laparapaki Isa mange ri pangadelang Agamana,

⁶⁷ lakua, ”Ampa Kaumo intu Almase, pauwangkang mae.” Pappihalinna Isa, ”Manna injo Kupaui mange ri kau, gele juako latappa';

⁶⁸ na manna injo Nakke rie' lakukuta'nang mange ri kau, gele juako lappihali.

⁶⁹ Pakaramula rikonni-konnina Ana' Rupatau attolommu risa'ri kananna Allataala Tukaminang kahasa injo.”

⁷⁰ Lakuai ngase'mo, ”Ampa appakonjo, Kau inni Ana' Allataala?” Appihali Isa, ”Kau to'jua appau ma'nassana Nakkemo Ana' Allataala.”

⁷¹ Jari appau ngase'mu, ”Ngura parallu juapaki sa'bi? Dittemo rilangngere battu ri babaNa.”