LUKAS 21 - Kitta' Passitallikang Bau KAREBA BAJI'

Passidakkana se're balu-balu kaasi-asi 21:1-14

¹ Rihattunna Isa rie' ri Sapo Allataala, Ia anjanjangi lohe tau kalumannyang lapuna passidakkana ri patti pamunaang passidakkaang.

² Ia anjanjang todo'i se're balu-balu kaasi-asi appantama' rua doe' seeng ri patti injo.

³ Jari lakuamo Isa, ”Sitoje'na Nakke appau mange ri kaui: Balu-balu kaasi-asi inni la'bi loheang lapassareang battu ri iangase'na tau kalumannyang intu.

⁴ Saba' iyai injo assarei passidakka battu rikala'bi-la'bianna, mingka balu-balu inni assarei battu rikaasi-asianna, la'bipa pole ia lapassareang ngase'i uppa-uppana.”

Sapo Allataala larisosara 21:5-6

⁵ Sungka'i lohemo tau labisarai passala Sapo Allataala na ammangnga-mangnga ngase'i paballona sapo injo saba' ribelo-beloi ri batu ballo surang ri barang-barang battu ripakkoro'bangang, appaui Isa,

⁶ ”Larie' hattunna sallo' – apa mujanjangi ri intu gelemo larie' manna se're batu laripa'biang a'lonjo'; larisosara ngase'i.”

Pakaramulanamo kasissaang 21:7-19

⁷ Jari akkuta'nangimu ana'-ana' gurunNa mange ri Isa, ”Guru, sikuraiya kajariangi injo? Na anteekamua tanrana, ampa laa'jarimu?”

⁸ PappihalinNa, ”Tutuiko, solanna andako ripa'lingu. Saba' lalohe tau battu lapake arengKu na lakua: Nakkemo Almase, na: Seppa'mu hattunna. Akolalo pilangngerii.

⁹ Ampa allangngereko passala pa'bundukang na kajujaang, akomo malla'. Saba' iangase'na injo parallu riolo laa'jari, mingka injo gele a'battuang larie'mu hattu kala'busang.”

¹⁰ Appaui pole Isa mange ri iyai, ”Bangsa laassibali bangsa na pakkaraengang laassibali pakkaraengang,

¹¹ na laa'jari lidung bakka' na ri antee-tee jua mae larie' garring a'lele na kalarakang, na laa'jari todo'i passala nulaappakamalla' na tanra mara'-maraeng ri langi'.

¹² Mingka rigelenapa a'jari iangase'na injo larijakkaliko na larisissaiko; rierangko mange lariadeli ri sapo passambajangannai ampako lapantamaki ri pattarungkuang, na larirenrengiko mange ri pamarenta na ri tukahasa injo kanara arengKu.

¹³ Passala injo laa'jari hattu baji' ri kau laassare passa'bi.

¹⁴ Injomo saba'na pa'batu ri atimu, jari andai mupikkiri riolo pau passa'bi ri kalemmu.

¹⁵ Saba' Nakke jua laassare mange ri kau pappau pangisse', sa'genna tide'mo tau akkulle a'bali ri kau iyareka ripassala ribalimmu.

¹⁶ Larisassali todo'ko ri tau toamu, ri urammu siana', ri bija-bijammu surang ri baha'-bahaammu na lohe tau ri kaui larihuno

¹⁷ na larikali'kingangiko risikuanna tau kanara arengKu.

¹⁸ Mingka tide' manna silahara uhu' battu ri ulummu latantang.

¹⁹ Ampa tulusu jarre'ko, lamuuppai tallasa'mu.”

Passala sosara'na Yerusalem 21:20-24

²⁰ ”Ampa mujanjangi Yerusalem laappu tantara, piisseki ma'nassana a'birimmu larisosara.

²¹ Rihattu injo tau rieki injo ri Yudea parallui a'lampa nai' ri baho bonto, na tau rieki injo lalang kota parallui a'lampa dere, na tau rieki injo ri kampong-kampong andamu riolo antamaki ri kota,

²² saba' larapi'mu hattunna pa'balasang na sikonjo numaeng ta'ukiri laripa'rupa.

²³ Silakamo bahine tianang injo iyareka bahine appasusu injojuapa ana' lolo rihattu injo! Saba' larie' kajujaang sanna' bakka'na risikonjo pammariang na hukkungang mange ri bangsa inni,

²⁴ na lamatei ri mata pa'dang ampai rierangi assimpole turitarungku mange risikonjo bangsa, na Yerusalem larilisa'-lisa'i ri tau gele injo tappa' ri Allataala, sa'genna a'rupamu jammanna bangsa-bangsa injo.”

Hattu pariekanna mae Ana' Rupatau Pakkalebarang poong kaju ara 21:25-33

²⁵ ”Larie' tanra-tanra ri matanna allo na ri bulang surang ri bintoeng, na ri linona tau inni lamalla'i na lata'bangkai riallangngere'na moro' surang bakka'na bombang ri tamparang.

²⁶ Tau inni lamate kale-kalei ripamalla'na kanara bentere'na battu risikonjo nua'jari ri lino inni, saba' sikuanna tukahasa ri langi' laa'dappe' ngase'i.

²⁷ Rihattu injomo lalajanjangi tau Ana' Rupatau rie' mae a'dongko' ri rammang lalang risikonjo kakahasaang na kala'biranNa.

²⁸ Ampa iangase'na injo pakaramulamu a'jari, ammentengko na ammongako, saba' gelemu dere Tuappakasalama'mu.”

²⁹ Maeng injo lapaui Isa pakkalebarang inni mange ri iyai, ”Pariatisai poong kaju ara intu iyareka poong kaju maraenganna.

³⁰ Ampa mujanjangi sikonjo poong kaju assu'la' injo baji' muissekinna ma'nassana a'birimmu bambang allo.

³¹ Appakonjo todo'i, ampa mujanjangi passala injo a'jari, piisseki ma'nassana Pakkaraengang Allataala gelemu dere.

³² Sitoje'na Nakke appau mange ri kaui: Tau konni-konni gele laallalo, rigelenapa iangase'na injo a'jari.

³³ Langi' na lino inni laallalo, mingka pauKu gele minang laallalo.”

Pappasang solanna tutu 21:34-38

³⁴ ”Jagailalo kalemmu, na atimu andai tulusu appikkiri ripa'roa'-roakang na a'huja-huja surang rikabata-bataang tuju tallasa siallo sibangngi solanna rihattu rie'na Ana' Rupatau andai appabangka ri kau assimpole turipengko.

³⁵ Saba' hattu injo lapitabai ngase'i tau rie' injo ri lino inni.

³⁶ A'kaletutuiko na tuli ngera dowaangiko, solanna nguppaiko kagassingang lalappasa battu ri iangase'na nulaa'jari injo, na solanna attahangko ammenteng ri a'rakanna Ana' Rupatau.”

³⁷ Ampa alloi Isa ngajarai ri Sapo Allataala na ampa bangngii Ia ansulu'i na a'bangngi ri bonto riare' injo Bonto Zaitun.

³⁸ Ngesalakale juapai lohemo tau mange ri Ia lalang ri Sapo Allataala laappilangngeri ri Ia.