LUKAS 20 - Kitta' Passitallikang Bau KAREBA BAJI'

Pakkuta'nang ripassala kahasana Isa 20:1-8

¹ Rie' se're allo rihattunna Isa ngajara tau lohe ri Sapo Allataala na lapappauwangii Injili, riekimu imang ponggaha injo na guru Tora' surang tutoa-toa mange konjo

² na akkuta'nangi ri Isa, ”Pauwang sadakang mae battu rikahasa anteeang ripake anggeokang passala intu, na inai assare kahasa ri Kau!”

³ Pappihalinna Isa mange ri iyai, ”Nakke rie' todo' se're laKupakkuta'nangang mange ri kau. Pau todo'i mae ri Nakke:

⁴ Panriona Yahya nubattu ri Allataala iyareka nubattu jua ri rupatau?”

⁵ Assibisara ngase'i riparanna na lakua, ”Ampa rikua: Nubattu ri Allataala, a'nassamu lakuana: Ngura nageleiko tappa' ri ia?

⁶ Mingka ampa rikua: Nubattu ri rupatau, a'nassamu labundukinta batu tau lohe inni, saba' tappa' ngase'i, ma'nassana Yahya se'rei nabbi.”

⁷ Jari appihaliimu ma'nassana gele laisseki nubattu ri antee mae panriona injo.

⁸ Jari lakuamo Isa mange ri iyai, ”Ampa appakonjo, injo gele todo'i Kupau mange ri kau kahasa anteeang Kupake anggeokang ripassala injo.”

Pakkalebarang ripassala pakoko anggoro 20:9-19

⁹ Maeng injo Isa labisarai pakkalebarang inni mange ri tau lohe, ”Rie' tau a'bua' koko anggoro; maeng injo lapappitesangangi kokonna mange ripasahala ampai a'lampa mange ri kota maraeng nalasalloi.

¹⁰ Sungka'i larapi' hattu panduru, lasuromu se're atanna mange ri tau assahala injo, solanna lapassareangi sitangnga mange ri ia hassele koko anggoro'na. Mingka pasahala injo larabungi ata injo ampai lasuro muliang na tide' laerang-erang.

¹¹ Rimaenna injo, assuroi pole se're ata maraeng, mingka ata injo rirabung todo'i na ripela' siri'i, ampai risuro muliang na tide' todo' laerang-erang.

¹² Maenna injo assuroi isse' ata makatallu, mingka tau injo pole rilokoki ripasahala injo, ampai ripamballung ansulukang koko.

¹³ Jari lakuamo opuna koko anggoro injo: Apamo lakugeokang? Lakusuroi ana' sitau-tau kukamaseang injo; tantu ia lakangalikannai.

¹⁴ Mingka rihattunna pasahala injo lajanjang ana' injo, assamaturukimu, na lakua: Iamo inni tulaharisi'na, maemoko larihunoi, solanna kaharisanna inni a'jari anunta.

¹⁵ Jari lapamballungimu ansulukang koko ampai lahunoi. Konni-konni apamo lalageokang opuna koko injo mange ri iyai?

¹⁶ Kalennamo a'lampa mange ri koko anggoro'na na lalahuno ngase' pasahala injo, ampai lapappijamaang kokonna ri tau maraeng.” Rilalangngerinna injo appau ngasekimu, ”Andalalo appakonjo!”

¹⁷ Mingka Isa latangarai tau lohe injo na appaui, ”Ampa appakonjo apa pade' battuanna pau inni: Batu nulapela' injo tukang batu a'jarimu batu possi' sapo?

¹⁸ Inai jua a'dappe' rateanna batu injo, lapanra'i, na inai ladappeki batu injo, lajampei.”

¹⁹ Jari guru Tora' na imang ponggaha injo apparri-parri lalajakkala Isa, saba' laisse'i ma'nassana kalenna lakuangang Isa ripakkalebarang injo, mingka mallakii ri tau lohe.

Passala a'bajara bea ri Kaisar 20:20-26

²⁰ Sikonjo guru Tora' na imang ponggaha injo latili'-tilingi Isa. Assuroi mange ri Ia tau laa'juru-juru assimpole tau lambusu, solanna akkulle juai lasikko' Isa rise're pakkuta'nang na laparapaki Isa mange ri tukahasa na pamarenta.

²¹ Iyai injo akkuta'nang appakonni mange ri Isa, ”Guru, kambe taisse'i ma'nassana sikonjo pau surang pangajaramMu toje'i na geleKo mile tau, mingka lambusuKo ngajara a'ra'na Allataala.

²² Makala parallukang a'bajara bea mange ri kaisar iyareka andamakang?”

²³ Mingka Isa latarrusui pikkirang daanai, jari akkuta'nangi mange ri iyai,

²⁴ ”Pappijanjangangi mae ri Nakke se're doe' seeng; gambara na arenna inai rie' ri injo?” Pappihalinnai, ”Gambara na arenna Kaisar.”

²⁵ Jari lakuamo Isa mange ri iyai, ”Ampa appakonjo pade' sareangi Kaisar dahuanna Kaisar na sareang todo'i Allataala dahuanna Allataala.”

²⁶ Jari geleimu akkulle lasikko' pau battu ri pappihalina Isa ri a'rakanna tau lohe. Ammangnga-mangnga ngase'i ripappihalinNa injo na ammottoki mamoi.

Pakkuta'nanna tau Saduki inni passala riattalasa muliang 20:27-40

²⁷ Maeng injo lohemo tau Saduki rie' mange ri Isa tugele laakui parie'na attallasa muliang battu rikamateang, na akkuta'nangi mange ri Isa,

²⁸ ”Guru, Musa laukiri parenta inni mae ri ditte: Ampa se're tau rie' uranna siana' bura'ne, matei na bahinenna rie' juapai, mingka tide' ana' labokoi, urannamo siana' parallu labontingi pambaluanna injo na lapianakii larie' pinangka'na ri uranna siana'.

²⁹ Rie'mo tau tuju assiana'. Tau lihua injo a'bontingi surang se're bahine, maeng injo mate na tide'pa ana' labokoi.

³⁰ Jari bahine injo ribontingii ri ana' makarua injo,

³¹ na ri ana' makatallu injo, na apppakonjo tarrusui ri tau tuju injo assiana', mate ngase'i na tide' ana' labokoi.

³² Kamaenganna, mate tommo bahine injo.

³³ Anteekamua bahine injo konni-konnina, inaimo ri tau tuju injo assiana' laa'jari bura'nenna ri allo attallasa injo muliang rikamateang? Saba' tujuiya maeng ngase'i labontingi.”

³⁴ Appihali Isa mange ri iyai, ”Tau lino inni a'bontingi na ripaa'bontingangi,

³⁵ mingka sikuanna turirapang siratang languppa dahuang ri allo riboko injo na ri attallasa injo muliang battu rikamateang, gele a'bonting surang ripaa'bontingang.

³⁶ Iyai injo gelemu lamate muliang; saba' iyai laassimpolemu malaeka' na iyai injo a'jari ana'-ana'na Allataala, kanara maenginnamo ripakaattallasa muliang.

³⁷ Passala attallasa'na muliang tau mate inni, Musa maengi lapappiissekang ri kitta' lalang ripau-pauwanna rompo' katinting, ri injo ia laare'i Karaeng Allataala assimpole Allataalana Abraham na Allataalana Ishak surang Allataalana Yakub.

³⁸ Ia gele Allataala ri tau mate inni, mingka Allataala ri tau attallasa, saba' ri a'rakanNa nguppa ngase'i tallasa tau inni.”

³⁹ Rilalangngere'na injo lohemo guru Tora' appau, ”Guru, naba toje'i pauMu injo.”

⁴⁰ Injomo saba'na gelemu baranii akkuta'nang mange ri Isa.

Passisambungbijaanna Isa surang Daud 20:41-44

⁴¹ Maeng injo appaui Isa mange ri iyai, ”Anteekamua tau inni akkulle appau ma'nassana Almase intu ana'na Daud?

⁴² Saba' Daudmo lapaui lalang ri kitta' Zaburu: Karaeng Allataala maengi appau mange ri Karaengku: Attolommoko risa'ri kanangKu,

⁴³ sa'genna Kubua' sikonjo balimMu a'jari pa'lisakang bangkemMu.

⁴⁴ Jari, ampa Daud a'ngare' ri Ia Karaeng, anteekamua lama'ring Ia ana'na todo'i?”

Isa appiu'rangi solanna tutu mange risikonjo guru Tora' 20:45-47

⁴⁵ Rihattu asse'reinna tau lohe injo appilangngeri, appaui Isa mange ri ana'-ana' gurunNa,

⁴⁶ ”Tutuiko mange risikonjo guru Tora' tulangai injo a'lingka-lingka makeang baju bakka' na langai todo'i narima salama' pappakala'biri ri pasara, tulangai injo attolong kaminang ri a'rakang ri sapo passambajangang na attolong rate ri ulu ripanganreang,

⁴⁷ tungalle passa injo sapo balu-balu na lalampangi matanna tau lohe inni ripangera dowaang lambere'na. Iyaimo injo languppa hukkungang kaminang sarro.”