LUKAS 2 - Kitta' Passitallikang Bau KAREBA BAJI'

Kalaheranna Isa 2:1-7

¹ Rihattu injo Kaisar Agustus appasulu'i se're parenta, lasuro dattarai sikuanna tau risibatu lino.

² Iamo inni pandattarang pakaramula rigeokang rihattunna Kirenius a'jari gubernur ri Siria.

³ Injomo saba'na, a'lampa ngase'mu lasuro dattara kalenna, ri kota assala'na.

⁴ Appakonjo todo'i Yusuf a'lampai battu ri kota Nazaret ri Galilea mange ri Yudea, ri kota Daud nuriareng injo Betlehem, – saba' ia assala'na battu ripinangka'na karaeng Daud –

⁵ solanna ridattara todo'i surangi Maria bajuanna, tulamana' kale injomo.

⁶ Ri riekinna ri injo larapi'mu hattunna Maria lamana',

⁷ na ia mana'i se're ana' bura'ne, ana' lihuana, jari laroko'i karampue na lapatinro ri tampa' panganreang binantang, kanara geleinna nguppa tampa' ri sapo sehaang.

Pakalahaki 2:8-20

⁸ Ri tampa' injo lohe pakalahaki ammari ri parang luara lajagai bakkalang binantanna ampa bangngi.

⁹ Sikalinna rie' se're malaeka'na Karaeng Allataala ammenteng riampi'nai na kala'biranna Karaeng Allataala lasinari siappuna na sanna' mallakinna.

¹⁰ Lakua malaeka' injo mange ri iyai, ”Ako malla', saba' sitoje'na kupappiissekangi mange ri kaui karannuang bakka' lamange risikuanna tau:

¹¹ Allo inni laheremu Pappasalama'mu, iamo intu Almase, Karaeng Allataala, ri kota Daud.

¹² Iamo inni tanrana ri kaui: Lanrumpa'ko se're ana' lolo riroko' karampue na tinro lalang ri tampa' panganreang binantang.”

¹³ Sikalinna kajanjangangi assurang malaeka' injo sibakkalang bakka' tantara Suruga appakala'biri Allataala, lakua,

¹⁴ ”Kala'birang ri Allataala ri tampa' nukaminang la'biri, na dame salehangang ri lino ritangngana rupatau ringai injo ri Ia.”

¹⁵ Sungka'i malaeka' injo labokoi ngase' na muliangi mange ri suruga, assikeokimu pakalahaki injo, ”Maemoko a'lampaki konni-konnina mange ri Betlehem larijanjangi apa kajariang konjomange, assimpole nulapappissekiang injo Allataala mae ri ditte.”

¹⁶ Jari a'nyara-nyaraimu a'lampa na larumpa'i Maria na Yusuf surang ana' lolo injo, attangnga tinro lalang ri panganreang binantang.

¹⁷ Rihattu lajanjanginna Ana' injo, lapappiissekangimu numaeng injo ripau ri iyai passala'na Ana' injo.

¹⁸ Lannasa ngase'i tau allangere risikonjo passala nulapau pakalahaki injo mange ri iyai.

¹⁹ Mingka Maria lananro ngase'i passala injo lalang ri atina na lapia'-piamui.

²⁰ Maeng injo muliang ngase'mu pakalahaki injo ampai akkelong-kelongi surang lapakala'biri Allataala saba' sikonjo nulalangngere na nulajanjang, assituru' i numaeng ripauwang injo mange ri iyai.

Isa risunna' na ripassareangi mange ri Karaeng Allataala – Simeon na Hana 2:21-40

²¹ Sungka'i ganna'mo karua allonna na Ia parallui risunna', Ia risarei areng Isa, iamo intu areng nulakuangang injo malaeka' riolo rigelenapa Ia ritianangang ri idonNa.

²² Jari rilarapi'na hattu appakatangkasa assituru' hukkung ri Musa, laerangimu Isa a'lampa ri Yerusalem lalapassareangi mange ri Karaeng Allataala,

²³ assimpole rie' ta'ukiri lalang rihukkunna Karaeng Allataala, ”Sikonjo ana' lihua bura'ne parallui ritangkasi ri Karaeng Allataala”,

²⁴ na assare koro'bang passidakka assituru' nulapau injo lalang rihukkunna Karaeng Allataala, iamo intu sikalabini bukkuru iyareka ruangkaju ana' bangkeng bodo.

²⁵ Ri Yerusalem rie' se're tau riareng Simeon. Ia se'rei tau naba na lambusu geo'na na attajangi panyihi-nyihi ri Israele, na Nyaha Tangkasa rie'i ri ia.

²⁶ Mange ri ia maeng ripappisa'biang ri Nyaha Tangkasa ma'nassana gele lamate ampa gelepai maeng lajanjang Almase, iamo intu Ia Turipile injo ri Karaeng Allataala.

²⁷ Ia mangei ri Sapo Allataala kanara ri Nyaha Tangkasa. Sungka'na Isa, Ana' injo rierang antama' ri tau toaNa lalageokangi mange ri Ia apa nulatantuang injo hukkung Tora',

²⁸ ia laruppai Ana' injo ampai laembang na lapakala'biri Allataala, lakua,

²⁹ ”Konni-konnina, Karaeng Allataala, konjomu naung atamMu inni a'lampa lalang dame salehangang, assituru' pauMu,

³⁰ saba' lajanjammu matangku kasalamakang battu injo ri Kau,

³¹ numaeng Mupakasadiaang injo ri a'rakanna sikonjo rupatau,

³² iamo intu sinara nulaappisa'bi ria'ra'Mu mange risikuanna tau maraeng na laa'jari kala'birang mangeri umma'Mu Israele.”

³³ Amma surang idonNa sanna' lannasa'na risikuanna nuripau ripassala'na Isa.

³⁴ Maeng injo Simeon labarakkaki ngase'i na appaui mange ri Maria, idonna Ana' injo, ”Sitoje'na Ana' inni ritantuangi laappadappe' iyareka laappakasalama' lohe tau ri Israele na laa'jarii tanra laammumbana pa'beserang

³⁵ solanna a'jari kaissekang pikkirang atina tau lohe injo. Mingka rie' se're hattu sallo' pa'dang lalatarrusui batemmu.”

³⁶ Ampa pole ri injo rie' todo'i Hana, se're nabbi bahine, ana' bahinena Fenuel battu ripinangka'na Asyer. Ia sarromu toana. Sungka'i maeng a'bura'ne ia tujuntaungi sallona assurangang bura'nenna,

³⁷ na konni-konnina balu-balumu na ummuru'na karuapulomu appa' taunna. Ia gele minang a'lampa battu ri Sapo Allataala na allo bangngi assambajang surang appuasa na ngera dowaang.

³⁸ Rihattu injo ia rie' todo'i ri injo na masa barakka'i mange ri Allataala na la'bisara passala'na Ana' injo mange risikuanna tau attajang kalappasang ri Yerusalem.

³⁹ Sungka'i maeng ngase'mo nuparallu injo rigeokang assituru' hukkung Tora', muliangimu mange ri kota pammarianna, iamo intu kota Nazaret ri Galilea.

⁴⁰ Pela' bakka'i Ana' injo na a'jari terasa nyahana, pela' sara'de'i na pangamaseanna Allataala rie'i ri Ia.

Isa ri ummuru'na sampulorua taung rie'i ri Sapo Allataala 2:41-52

⁴¹ Attaung-taungi tau toana Isa a'lampa mange ri Yerusalem ampa allo Pa'lappasang.

⁴² Sungka'i sampulomo ruantaung ummuru'na Isa a'lampaimu isse' mange ri Yerusalem assimpole biasana ri allo passua'-suarang injo.

⁴³ Sungka'i lappasamo allo passua'-suarang injo, rihattu a'lingkainnamo muliang, attaang juapa Isa ri Yerusalem nagele laisse' tau toaNa.

⁴⁴ Saba' pa'ngare'nai ma'nassana Ia rie' juai ritangngana tau lohe urannai sipa'lingkaang, siallomu bujuru sallona a'lingkai, ampai laboja Isa ribija-bijanna surang ripassiissekanna.

⁴⁵ Kanara geleinna larumpaki Isa, jari muliangimu mange ri Yerusalem na tarrusui laboja Isa.

⁴⁶ Sungka'i tallungallomo labojai lauppaimu Isa rie'i lalang ri Sapo Allataala ritangnga-tangngana guru agama injo, na appilangngeri surang assare pakkuta'nang mange ri iyai.

⁴⁷ Sikuanna tau allangngere injo ri Ia sanna' lannasa'na rikasara'dekanNa surang risikonjo ta'ranNa appihali.

⁴⁸ Rihattu lajanjanna Isa tau toaNa, ta'bangkaimu, jari appaui idonNa, ”Ana'ku, ngura Kau anggeokang nuappakonjo mae ri kambe? Janjangi, ammamMu suranga sanna' bata-batakang a'boja ri Kau.”

⁴⁹ PappihalinNa mange ri iyai, ”Ngura Nakke muboja? Geleika muisse' ma'nassana Nakke parallu rie' ri Saponna AmmangKu?”

⁵⁰ Mingka gele lapahangi apa lakuangang Isa mange ri iyai.

⁵¹ Jari muliamMu assurang ngase'i mange ri Nazaret; na tulusu tallasai lalang rikatuhonai. IdonNa lananro passala injo lalang ri atina.

⁵² Isa pela' bakka'i surang pela' sara'de'i, na pela' rikamaseangi ri Allataala surang ri rupatau.