LUKAS 18 - Kitta' Passitallikang Bau KAREBA BAJI'

Pakkalebarang ripassala hakking jekkong 18:1-8

¹ A'bisarai pole Isa se're pakkalebarang mange ri iyai laappa'toje' rima'nassana parallu ngase'i tulusu ngera dowaang na tide' lanrena.

² PauNa, ”Lalang rise're kota rie' hakking gele malla' ri Allataala na gele rie' tau lakangaliki.

³ Ri kota injo rie' se're balu-balu tulusu mange ri hakking injo na lakua: Rialleanganga ri a'rakannna balingku.

⁴ Sallomu hattunna sanging palatolla'i hakking injo. Mingka maeng injo lanaha-nahai lalang ri atina: Mannamamo gelea malla' ri Allataala na gele todo' rie' tau kukangaliki,

⁵ mingka kanara balu-balu inni lapakasusaa, baji'mo kualleangangi pangerana, solanna andai samae-maena na kamaenganna labalianga.”

⁶ Lakua Karaeng Isa, ”Pina'na'i pauna hakking gele intu adele!

⁷ Gelejua Allataala laalleangangi sikuana tau ripile ri Allataala ampa allo bangngi akeo' mange ri Ia? Apa Ia appasoho'i hattu rigelenapa latulungi?

⁸ Nakke appau mange ri kaui: Ia lalassiri laalleangangi. Mingka, ampa Ana' Rupatau injo rie', makalanguppajuapai tau tappa' ri lino inni?”

Pakkalebarang ripassala tau Farisi surang palele sima 18:9-14

⁹ Mange ri tau lohe larapang injo kalenna naba na lajanjang tuna sikuanna tau maraeng, lapaui Isa pakkalebarang inni,

¹⁰ ”Rie' rua tau a'lampa mange ri Sapo Allataala langera dowaang; sitau Farisi na sitauang injo palele sima.

¹¹ Ammentengi tau Farisi injo na ngera dowaangi, appakonni: O Allataala, nakke sukkuru mange ri Kau, saba' gelea assimpole sikuanna tau maraeng, gelea tau palukka', gelei daa geo'ku', gelea pasangkili, na gele todo'a assimpole palele sima inni;

¹² pinruanga appuasa sijumaa, sanging assarea sidahu sampulona battu risikonjo uppa-uppaku.

¹³ Mingka palele sima injo ammenteng dere juai, na gele todo'i barani ammonga nai' ri langi', mingka ia tulusu lapurusu barambanna na lakua: O Allataala, rikamaseangi tau doraka inni.

¹⁴ Nakke appau mange ri kaui: Rimuliannamo tau inni ri saponna assimpole turipa'naba ri Allataala na tau maraeng injo gele. Saba' inai lapakala'biri kalenna, ia laripakatuna intu na inai lapakatuna kalenna ia laripakala'biri intu.”

Isa ambarakkaki ana'-ana' 18:15-17

¹⁵ Maeng injo lohemo tau battu laurang ana' ki'di'na mange ri Isa, solanna ri barakkaki ri Isa. Ri lajanjanna injo, ana'-ana' gurunna Isa kuku'i mange ri tau lohe injo.

¹⁶ Mingka lakeo' ngase'i Isa na lakua, ”Lappasangi ana'-ana' ki'di' intu mae ri Nakke, na ako pisangkai, saba' tau assimpole injomo intu opuna Pakkaraengang Allataala.

¹⁷ Sitoje'na Nakke appau mange ri kau: Inai jua gele anruppai Pakkaraengang Allataala assimpole ta'ranna ana' ki'di' inni, ia gele akkulle antama' ri injo.”

Tau kalumannyang inni sukkarai antama' ri Pakkaraengang Allataala 18:18-27

¹⁸ Rie' se're ponggaha mange akkuta'nang ri Isa, ”Guru baji' nyaha, apa nuparallu kugeokang lakuuppai tallasa mannannungang?”

¹⁹ Pappihalinna Isa, ”Ngura muare'a tau baji' nyaha? Tide' manna se're tau baji' nyahana maraenganna Allataala.

²⁰ Tantu muisse' ngase'na parenta inni: Ako assangkili, ako muno, ako a'lukka', ako assare sa'bi bura, ngali'ko ri ammammu surang ri idommu.”

²¹ Lakua tau injo, ”Iangase'na injo kugeokangi minang rikidi-kidiku juapa.”

²² Rilalangngere'na injo appaui Isa mange ri ia, ”Rie' juapa pole se're passala nuparallu mugeokang: balukang ngase'i apa nurie' ri kau na pa'dahu-dahuangi injo mange ri tau kaasi-asi, languppako pa'barang-barangang ri Suruga, maeng injo maeko konni na minahangko ri Nakke.”

²³ Sungka'i lalangngere tau injo pauna Isa, sarro pammassana nyahana, saba' sanna' kalumannyanna.

²⁴ Sungka'i lajanjang ma'nassana sarro pammassana nyahana, appaumu Isa, ”Sanna' toje' sukkara'na tau kalumannyang inni lantama' ri Pakkaraengang Allataala.

²⁵ Saba' la'bi lo'morangi sikaju unta ngusu' antama' ri balo jarung na tau kalumannyang antama' ri Pakkaraengang Allataala.”

²⁶ Appau ngase'mu tau allangngeri injo, ”Ampa appakonjo, inaimo akkulle ripakasalama'?”

²⁷ Lakuamo Isa, ”Nugele injo ma'ring ri rupatau inni, ma'ringi ri Allataala.”

Passahalang minahang ri Isa 18:28-30

²⁸ Appaui Petrus, ”Janjangi, kambe inni tabokoi ngase'mu sikonjo nurie' ri kambe na minahangkang ri Kau.”

²⁹ Lakuamo Isa mange ri iyai, ”Sitoje'na Nakke appau mange ri kaui, sikuanna tau nurikanarana Pakkaraengang Allataala nalabokoi saponna, iyareka bahinenna, iyareka uranna siana', iyareka tau toana iyareka ana'-ana'na,

³⁰ lalatarima muliang a'lappi rua rihattu inni jua, na ri allo riboko ia lanarimai tallasa mannannungang.”

Makapintallummu Isa lapappiissekang passala kasissaanna 18:31-34

³¹ Isa lakeo'i sampulo injo rua suro-suroNa, ampai appau mange ri iyai, ”Konni-konnina laa'lampaki mange ri Yerusalem na iangase'na numaeng laukiri sikonjo nabbi risesena Ana' Rupatau laripa'rupa.

³² Saba' Ia laripassareangi mange ri tau maraeng, laritua-tuai, larisallai na laripe'rui.

³³ Lalarabungi ampai lahunoi na ri allo makatalluna Ia laattallasai muliang.”

³⁴ Mingka, iyai gele sikali lapahang iangase'na injo; battuanna pau injo tassa'bui ri iyai na gele laisseki nulakuangang injo Isa.

Isa appakaanjanjang tau buta riampi'na Yerikho 18:35-43

³⁵ Rihattunna Isa seppa'mo laambattu ri Yerikho, rie' tau buta attolong ri biring lalang na ngera-ngerai.

³⁶ Rilalangngere'na lohe tau lumalo, akkuta'nangi, ”Apa injo?”

³⁷ Lakuamo tau lohe injo mange ri ia, ”Isa tau Nasaret injo lumalo.”

³⁸ Jari a'nga'ngaramu, ”Isa ana' Daud, rikamaseanga!”

³⁹ Tau lohe a'lingka injo ri a'rakang lapisangkai solanna sannang. Mingka pela' bakka'i sa'ranna a'nga'ngara, ”Oe ana' Daud, rikamaseanga!”

⁴⁰ Jari attaangi Isa na lasuro renrengi tau injo mange ri Ia. Sungka'i ambattumo mange riampi'Na, akkuta'nangi Isa mange ri ia,

⁴¹ ”Apa mukaa'raki solanna Kugeokangang ri kau?” Pappihalinna tau injo, ”Karaeng, solangku akkulle anjanjang!”

⁴² Jari lakuamo Isa mange ri ia, ”Konni-konnina anjanjammoko, tappa'mu lapakaanjanjangko!”

⁴³ Rihattu injo toje'jua akkullemu anjanjang, maeng injo minahangi ri Isa ampai lapakala'biri Allataala. Rilajanjanginna passala injo, jari sikuanna tau rie' ri injo lapakala'birii Allataala.