LUKAS 17 - Kitta' Passitallikang Bau KAREBA BAJI'

Lohe Pappiu'rangi 17:1-6

¹ Appaui Isa mange ri ana'-ana' gurunNa, ”Tantumu rie'na tulaappa'lingu, mingka balamo tau appa'rie' injo.

² Bajikangangi ampa gilingang batu risaakang ri kallonna, maeng injo rilabuangi ri tamparang, nalapassabaki sala se'renna ri tau ki'di' inni a'bua' kadorakaang.

³ Katutui kalemmu! Ampa urang siana'mu a'bua' kadorakaang, piu'rangii, na ampa lasassala kalenna, sarei ampung.

⁴ Injo pole ampa a'bua'i doraka mange ri kau pintujung siallo na pintujung todo'i mange ri kau ngera ampung na lakua: Kusassala kalengku, parallui muampungi.”

⁵ Jari lakuamo suro-suro injo mange ri Karaeng Isa, ”Ripakajarre'i katappakamba!”

⁶ Appihalimu Karaeng Isa, ”So'di injo rie' tappa'mu manna assimbakka'juai lisere sinahu, akkulleko appau ri poong kaju ara inni: Ta'bu'bu'ko na tatti'ja'ko ri tamparang, na ia tunru'i ri kau.”

Karaeng surang ata 17:7-10

⁷ ”Inai ri kau intu rie' se're atanna lapambingkungangi tana iyareka lakalahakiangi binantanna lappau mange ri ata injo, sungka'i muliammo battu ri koko: Maeko langanreki!

⁸ Gelejua sibale'na ia lappaui mange ri ata injo: Pappatalaanga kanre, ka'ba' jarre'i aja'mu na appantoroko sa'gengku ammono' nganre surang nginung. Maempa injo ampako akkulle nganre surang nginung.

⁹ Makala attarima kasi juai mange ri ata injo, saba' ata injo maeng ngase'mu lageokang apa nurisuroang injo mange ri ia?

¹⁰ Appakonjo todo'i ri kau intu. Ampa maeng ngase'mu mugeokang iangase'na nuripassuroang mange ri kau, parallui mupau: Kambe inni ata tide' jua matu-matunna; nutageokang sangga anggeokamba jua rinuparallu injo latageokang.”

Sampulo tau kattakang 17:11-19

¹¹ Lalang ripa'lingkaanNa mange ri Yerusalem Isa attete passimbanganna Samaria na Galilea.

¹² Rihattu antama'namo rise're desa rie'mo sampulo tau kattakang mange ri Isa laurangi assijanjang. Ammenteng dere juai,

¹³ na a'nga'ngarai: ”Isa, Guru, rikamaseangkang!”

¹⁴ Jari assailei Isa mange ri iyai na lakua: ”A'lampamoko, pappijanjangangi kalemmu mange risikonjo imang.” Na rihattu attangnga lalannai juapa sikalinna molemu katta'na.

¹⁵ Rie' se're tau battu ri iyai, muliangi na lapakabakka'i sa'ranna lapakala'biri Allataala,

¹⁶ maeng injo joppa'i ri a'rakang bangkenna Isa na appanai' sukkuru mange ri Isa. Tau injo tau Samaria.

¹⁷ Jari lakuamo Isa, ”Gelejua tau sampulo injo sumpae' mole ngase'i katta'na? Riantee mae tau kaassa injo?

¹⁸ Geleka rie' manna se're tau ri iyai muliang mae konni lapakala'biri Allataala maraenganna ri tau battu-battu inni?”

¹⁹ Maeng injo lakuamo Isa mange ri tau injo, ”Ammentengko na a'lampamoko, tappa'mu lapakasalama'ko.”

Pariekanna Pakkaraengang Allataala 17:20-37

²⁰ Sungka'i rikuta'nang risikuanna tau Farisi sikuraiya larie'i Pakkaraengang Allataala, pappihalinna Isa, ”Parie'na Pakkaraengang Allataala tide' tanra-tanra kajanjangang,

²¹ tau inni gele todo'i akkulle lakua: Janjangi, ia rie'i ri inni iyareka ia rie'i konjomange! Saba' sitoje'na Pakkaraengang Allataala rie'i ri kaui.”

²² Maeng injo lakuamo Isa ri ana'-ana' gurunNa, ”Larie' hattunna sallo' a'ra'i mujanjang siallo battu allonna Ana' Rupatau, mingka gelei akkulle mujanjangi.

²³ Rie'mo tau laappau mange ri kau: Janjangi, Ia rie'i konjomange; janjangi Ia rie'i ri inni! Akomo a'lampa mange konjo, akoimo minahang.

²⁴ Saba' assimpole kila' ta'bebe battu riappa'na langi' se'reang mange riappa'na langi' sihaliang, appakonjo todo'i sallo' passala'na Ana' Rupatau ri allo pariekanNa mae.

²⁵ Mingka Ia parallui languppa lohe kamarasaiang riolo na ritolla'i risikuanna tau konni-konni.

²⁶ Assimpole kajariang rihattunna Nabbi Nuhung laappakonjo todo'i rihattunna Ana' Rupatau:

²⁷ Nganre manginung ngase'i, a'bonting surang ripa'bontingangi, sa'genna larapi' hattunna Nabbi Nuhung antama' ri lopi injo, maeng injo battumu a'ba bakka' nalapakamate ngase'i.

²⁸ Appakonjo todo'i assimpole kajariang rihattunna Lot; nganre manginung ngase'i, a'balu' surang ammalli, a'lamungi surang appaenteng ngase'i sapo.

²⁹ Mingka rihattu ansulu'namo Lot battu ri Sodom, turungi bosi api surang bosi halerang battu ri langi' na lapakamate ngase'i.

³⁰ Appakonjo todo'i passala'na sallo' rihattunna Ana' Rupatau lapappijanjangang kalenNa.

³¹ Rihattu injo inai rie' rate ri sapo na apa-apanna lalangi ri sapo, andamu naung langalle, na appakonjo todo'i tau rie' injo ri koko, andamu muliang.

³² U'rangi kajariang ri bahinenna Lot!

³³ Inai jua apparri-parri lakatutui nyahana, ia latappela' nyahana, na inai tappela' nyahana, iamo lapakasalama'i.

³⁴ Nakke appau mange ri kaui: Ribangngi injo rie' rua tau ri patinroang, se're tau lariurang na se're tau injo laribokoi.

³⁵ Rie' rua bahine assurang anggiling, sitau lariurang na sitauang laribokoi.” [

³⁶ Ampa rie' rua tau ri koko, se're tau lariurang na se're tau laribokoi.]

³⁷ Akkuta'nangimu mange ri Isa, ”Karaeng, ri anteemae lakajariang?” Lakuamo Isa mange ri iyai, ”Ri antee-tee mae rie' bonara ri injo lohe kalaa' a'domung.”